1 इस्राएलोअ मोन्जे याकोबोअ बेटाह्हाआ नावे, जे जिव जिवोअ कुटुंबाहा आरी लेत कोइत याकोबोअरी मिसर देसोम आवयाते, ते ए होय: 2 रूबेन, शिमोन, लेवी, यहुदा, 3 इस्साखार, जबुलून, बिन्यामीन, 4 दान, नफ्ताली, गाद आन आशेर. 5 आन योसेफ तोम मिसर देसोम पेलुज आवीत रोयुतो. याकोबोअ सोताआ पारवाड़ीमेहें जे उब्ज्ये ते आखेज सत्तर*1:5 सत्तर थोड़ाक जुना शास्त्रा लेखोमेहें सत्तर आन थोड़हाम पोन्शात्तर लेख्योहो जोएं ओते. 6 योसेफ आन तियाआ आखा पाही आन तियाआ पिड़ीइ आखे माअहें मोइत गोये. 7 पोन इस्राएलोअ पिड़ी फुलीन-फोली वोल्यी; आन ते माहें जास्तीज मजबुत ओवते गोये, आन एतेहे जाअखे वादीत गोये के आखू देस तियां वाअहीं पोआइत गोयु.✝1:7 प्रेशित 7:17

8 मिसर देसोम एक नोवू राजा गादीपोअ बोठू जो योसेफोहो ने ओलखीइतुतो. 9 तिये तियाआ माअहोंहों कोयो, "पाला, इस्राएलवाले आपा रोत जाअखे आन मजबुत बोणित गोयेहे. 10 तियाह काजे आवा, आपू यांअरी हुशारी वाअहीं वेवारो कोअहूं, एहें ने ओवुहूं जोवे के जेहेलाम ते जाअखीलेहे वादीत जाय आन जर लढाय कोइलाआ वेल आवीत पोड़े, ताहां आपाआ दुस्मोनोअरी मिलित कोइत आपाअरी लढाय कोए आन या देसोम रोत निहीत जाते रोय."✝1:10 प्रेशित 1:1-10 11 तियाह काजे मिसर देसोवाले तियांपोअ काम कोआड़नारा मुकड़दोमोहों नेम्या के ते तियांपोअ वोजू टाकी टाकीइ तियांहां तारास देअहूं जोवे; आन तियां फारो राजाआ काजे पितोम आन रामसेस नावोअ बेन गोडावनवाले होयरे बोणावये. 12 पोन जेहें जेहें ते तियांहां दुख देते गोये तेहें तेहें ते वादते आन पसरीइते गोये; तियाह काजे ते मिसर देसो वाले इस्राएलवालाहां जाअखीलेहें बित कोइत सीस कोए वोल्ये. 13 तेबी मिसरवालां इस्राएलवालाहां उदाबादीज जोरो वाअहीं कामे कोआड़्ये, 14 आन तियांआं जिवोहो गारो, इटे आन खेतोअ बाती बातीइ कामोवाअहीं तियांहां ओसवी देदे; किबी काम तें तियांहां उदाबादीज कोआड़तेते.

15 शिप्रा आन पूआ नावोअ यी बेन इब्री हुंवारकीहीं मिसरोअ राजे आदेस आप्यु के, 16 "जाहां तुमू इब्री बोईंहीं ठाल्ली पाड़हा ताहां नजर टाकीत पालजा, जर सोऊ ओवू ताहां माइत टाकजा, आन जर सोई ओवे ताहां जिवती रोअहूं देजा." 17 पोन ते हुंवारकी देवोहो बित सालतीते, तियाह काजे मिसरोअ राजाआ आदेस ने मानित सोआहा बी जिवताज रोअहूं देतीते. 18 ताहां मिसरोअ राजे हादाड़ीत कोइत फुश्यो, "तुमू जे सोआहा जिवताज रोअहूं देत्यीही, ताहां एहेलोहो काहा कोअत्यीही?"

19 हुंवारक्यी फारोहो कोयो, "इब्री बोईं मिसरवालीइं होस कायनाहां; ते एती उतवाल्यी होय के, आमू हुंवारकी ने पोतत्ली तेहेंज ते ठाल्ली पोड़ीत जात्ली." 20 तियाह काजे देवे हुंवारकीइं हाजो कोअयो; आन ते माअहें गणतीमेहें खुब वादीत कोइत जाअखीलेहें ताकतवान ओत गोये. 21 एताआ काजे के हुंवारकीहीं देवोहो बित सालतीते, तिहीं वाअहीं तिये तियींइं कोएं थांगे लागाड़्ये. 22 ताहां फारो राजा तियाआ आखा माअहोंहों आदेस आप्यू के, "इब्री माअहोंओं जेता सोआ उब्जे तियां आखाहा नील नोयीमेहें टाकी देजा आन आखी सोईहीं जिवती रोअहूं देजा."