1 फाशोअ तिये मोशेहे कोयो, "तु आरोन, नादाब, अबीहू आन इस्राएलोअ सत्तर डायहांअरी यहोवाआ जागे उसे आवीत सेटे रोत वोंदजा; 2 मोशे एतुज यहोवाअ जागे आवुहूं जोवे; पोन बाकी माहें आहने ने आवुहूं जोवे. आन बिहरे माअहें तियाआ जागे उसे ने सोड़ुहूं जोवे."

3 मोशे माअहोंअ जागे जात कोइत यहोवाअ आखी गोठी आन आखा नियम कोत आप्या. ताहां आखे माअहें एका आवाजोम कोने वोल्ये, "जेतीही गोठी यहोवा देवे कोयीही तियी आखी गोठीही आमू मानहूं."✝24:3 यहो 4:3 4 ताहां मोशे यहोवाअ आखे वसने लेखीत देदे; आन रात्र्युउ उठीत कोइत डोगोअ निसे एक देवान्यो बोणायो आन इस्राएलोअ बारा पारवाड़ीइ परमाणे बारा खांबा बी बोणावया. 5 ताहां तिये थोड़ाक इस्राएल जुवान्याहां मोकल्या, तियां यहोवा देवोअ काजे गाराहा कोइलोअ काजे हानो वासड़ो आगीइ गाराहा कोअयो. 6 आन मोशे आरदो रक्त लेत कोइत वाटकामेहें मिक्यो, आन आरदो देवान्यापोअ हितड़ी देदो. 7 ताहां शप्पतेए पुस्तकोहो लेत कोइत माअहुंहूं वासीत कोइत उनाड़्यो; तियाहा उनाइत कोइत तियें कोयो, "जों किबी यहोवा देवे कोयोहो तों आखो आमू कोअहूं, आन तियाआ आदेश मानहूं."

8 ताहां मोशे रक्त लेत कोइत माअहूं पोअ हिपड़ी देदो, आन तियांहां कोयो, "पाला, ओं तिया शप्पतेए रक्त होय, जियाहा यहोवा या आखा वसनोपोअ तुमाअरी बांद्यीही."✝24:8 मत्तय 26:28; 1 करिन्थ 11:25

9 ताहां मोशे, आरोन, नादाब, अबीहू आन इस्राएलोअ सत्तर डायहां उसे डोगोपोअ गोया, 10 तियां इस्राएलोअ देवोहो पाल्यो. तियाआ गुडाआ थुड़ी निलमणीइ पाट्लाआ होस जेहें कि तेबी ओतो, जो जुगोअ होस साफसुफ ओतो. 11 आन तिये इस्राएलोअ मुख्यापोअ आथ ने उठाड़्यु; ताहां तियां देवोअ दर्शन कोअयो, आन खादोन पिदो.

12 ताहां यहोवा मोशेहे कोयो, "डोगोपोअ माआ जागे सोड़ीत आव आन तिहीं रो; आंय ताहूं डोणोअ पाटी, आन माहें सिकाय तेहें काजे आंय लेखल्यू नियम आन आदेश आपीही." 13 ताहां मोशे यहोशवा नावोअ तियाआ सेवकोअरी देवोअ डोगोपोअ सोड़ीत लागू. 14 आन डायहांहां बी तो ओं कोत कोइत गोयु, "जाअहूं जाआं आमू तुमाआ जागे फाशाअ ने आवो ताअहूं जाआं तुमू इंहीं आमाआ वाट पाल्या कोअजा; आन उनाआ, आरोन आन हूर तुमाअरी होय; जर एखाआ भान्गड़ ओत जाय, ताहां तियांआं जागे जाजा."

15 ताहां मोशे डोगो पोअ सोढ़ीत लागू, आन वादलो डोगोहो टापित लेदो. 16 ताहां यहोवाआ महिमा सिनाय डोगोपोअ सेवात गोयी, आन तों वादलो सोव दिही जाआं टापाइत रोयो; आन हांतवा दिही तिये मोशेहे वाद्लाआ विसमेहें रोत गोगाड़्यो. 17 डोगोअ सुटीपोअ यहोवाआ महिमा इस्राएलोअ नजरेमेहें हांगाड़ाआ होस देखाअयीते. 18 ताहां मोशे वाद्लाआ विसमेहें रोत डोगो पोअ सोड़ीत लागू. आन मोशे डोगो पोअ सालिही दिही आन सालिही रात रोयू.✝24:18 कायदा 9:9; मत्तय 4:2