10 "बाबल्याआ साड़ोअ एक वायदाआ पेटी बोणावजा; ते आड़ीस आथ नांबी आन पोली डेड़ आथ आन उसी डेड़ आथ जोवे. 11 आन तियीही सोका होना वाअहीं मायतेन बाअथे मोडाड़जा, आन पेटीइ उपोअ शारु वोलेहे होनाआ कोर बोणावजा. 12 तिहीं रोत तियां शारु गुडापोअ, होनाआ शार कोड़ी टाकाड़ीत कोइत एकी वोलेहे बेन आन एकी वोलेहे लागाड़ी देजा. 13 फाशाआ बाबल्योअ लाकड़ाआ डेंगारा बोणावीत लेजा, आन तियांहां बी होना वाअहीं मोडाड़जा. 14 आन डेंगाराहा पेटीइ बेनी वोलेहे कोड़ीमेहें टाकीत लेजा. जिया वाअहीं तियाआ वजन उसलीइता आवे. 15 ते डेंगारा पेटीइ कोड़ीमेहें रोअहूं देजा; आन तियाहा अलग मा कोअहा. 16 आन आंय जो ताहूं साक्शीपत्र आपिहीं तियाहा तियी पेटीमेहें मिकजी."

17 "फाशोअ सोका होनाआ एक टापणो बोणावजा; तों आड़ीस आथ नांबो जोवे, आन पोलो डेड़ आथोअ जोवे. 18 आन होनो टाकीत कोइत बेन फाकावाला देवदूत बोणावीत कोइत दयासनोअ टापणाआं बेनू वोल मिकाड़जी. 19 एक करुब*25:19 करुब एकी जातीइ फाकावालू देवदूत एकी मेरे आन बिहीरु करुब एकी मेरेपोअ मिकाड़जी; आन देवदूतोहो आन दयासनोअ टापणाहा नेहें एकाज तुकाड़ा वाअहीं बोणावीत कोइत तियाआ बेनू वोल पोअ मिकाड़जी. 20 तियां करुबोअ फाके उपोअ रोत एहेलेहे पोलावीत रोल्ये जेहें बोणावजा के दयासनोअ टापणो तियांआं वाअहीं टापाअलो रोअहूं जोवे, आन तियांआं सोब हुंबरा हुंबर आन दयासनोअ टापणाआ वोगेहे रोअहूं जोवे. 21 आन तिया टापणाहा पेटीपोअ लागाड़जा; आन जों साक्शीपत्र आंय ताहूं आपीहीं तियाहा तु पेटीइ मायते मिकजी.