Êxodo 4

मोशेहे देवोप रोत समत्कारोअ सेक्ती जोड़त्ली

1 ताहां मोशे उत्तर आप्यो, "तें माआं गोठीपोअ विश्वास ने कोए आन माआ गोठी ने उनाय, पोन कोय, ‘यहोवा देवे ताहूं दर्शन नाहां आप्यो.’"

2 यहोवा देवे तियाहा कोयो, "ताआ आथोमेहें फोअलो की ओं?" तिये कोयो, "डेंगार."

3 तिये कोयो, "यीही पुंयी पोअ टाकी दे." ताहां जे डेंगार टाक्यी ते हाप बोणित गोयी, आन मोशे तियाआ सामने रोत सेटे गुगद्यू. 4 ताहां यहोवा देवे, मोशेहे कोयो, "आथ आगाड़ी कोइत याआ सेपटी तोइत ले." जाहां तिये आथ आगाड़ी कोइत तियीही तोअयी ताहां फाशुउ तो हाप डेंगार बोणीत गोयू. 5 "काहाके तें माहें विश्वास कोअहूं जोवे के तुमाआं डायहांआं देव, यहोवा देवे मोन्ज्ये अब्राहाम, इसाहाक आन याकोबोअ यहोवा देवे ताहूं दर्शन आप्योहो."

6 फाशोअ यहोवा देवे मोशेहे ओं बी कोयो, "ताआ आथ सातीपोअ मिकीत टाप." ताहां तिये सोताआ आथ सातीपोअ मिकीत टापित लेदू; तिहीं रोत फाशुउ काडीत पाल्यू ते तियाआ आथ वोडा दुखो वाअहीं बोर्फाआ होस पांडू बोणित गोयुहू. 7 ताहां तिये कोयो, "ताआ आथ फाशुउ साती पोअ मिकीत टाप." तिये सोताआ आथ सातीपोअ मिकीत टापित लेदू; आन जाहां तिये तो आथ सातीपोअ रोत काड्यू, ताहां तो वापिस फाशुउ बाकी डिलोअ होस होय तेहेलुज बोणीत गोयू. 8 यहोवा देवे कोयो, "जर ते ताआ गोठीइ विश्वास ने कोए आन पेहली निशाणीही ने माने, ताहां दुसरी निशाणीइ विश्वास कोए. 9 आन जर तें यां बेनू निशाणीइ विश्वास ने कोए आन ताआ गोठीही ने माने, ताहां तु नील नोयीइ थोड़ोक पाईं लेत आवीत कोइत कोअड़ी जागेहे ओली देजी; जों पाईं तु नोयीम रोत लेत आविही तों कोअड़ी जागेहे रक्त बोणित जाय."

10 मोशे यहोवा देवोहो कोयो, "नाहां, प्रभु, माहूं मा मोकलिही, माहूं गोगता नाहां जमती, सुरवातिही रोतीज नाहां जमती, आन जेहेलाम तुमे माहूं गोगाड़्यू, तेहेलाम बी नाहां, आंय तोम गोगताम तोतराअत्लु आन जिबीमेहें बोबड़्यू होय."

11 यहोवा देवे मोशेहे कोयो, "माअहुंउं सोब कोडे बोणायीही? आन माहुंहूं कुंगो, बोयरो, देखनारो, नेत आंद्लो आंय यहोवा सोड़ीत कोडो बोणावत्लो? केहें तो आंय यहोवा नाहां के. 12 ओमे जा, आंय ताहूं गोगीइलाअ मदत कोअहीं, आन ताहूं की कोअलोअ ओय तों कोत आपिहीं."

13 तिये कोयो, "माआं प्रभु, मेरवानी कोइत बिहीरा एखाहा मोकल."

14 ताहां यहोवा देवोहो मोशेपोअ खोत सोड़्यी आन तिये कोयो, "ताआ पाही लेवी कुटूंबाआ आरोन कायनाहां के? माहूं मुंदू होय तो वारुहूं गोगीत सेकेहे, आन तो ताहूं मिलीइलोअ काजे आवेहे आन तो ताहूं देखीत खुस ओत जाय. 15 तियाहा काजे तु तियाअरी गोठी कोअजी, आन की कोइलोअ होय तों तियाहा कोजी. आंय तुमू बेनुहूं बी गोगीइलाअ मदत कोअहीं, आन कि कोअलोअ तों सिकाड़ीहीं. 16 तो ताआ वोतीइ माअहोंअरी गोगे; तु तियाआ काजे देव ठरही. 17 तु ए डेंगार लेत जात कोइत यीज वाअहीं निशाणी देखाड़जी."

मोशेए मिसर देसोम वापिस आवीइलो

18 ताहां मोशे तियाआ होवराह्हा यित्रोअ जागे वापिस गोयू आन कोयो, "माहूं वाट लागाड़ मोन्ज्ये मिसर देसोम रोनारा माआ पाव्हीइलाहा आंय जात कोइत पालिहीं, के तें का ओमे जाआं जिवते होय के नाहां." यित्रे कोयो, "हाजी हुतेहे जा."

19 मोशे मिद्यान देसोम ओतू तेहेंज यहोवा देवे मोशेहे कोयो, "मिसर देसोम वापिस जा; काहाके जें ताआ जिव लेअहूं होदतेते तें मोइत गोयेहे."✝4:19 प्रेशित 7:34; मत्तय 2:20 20 ताहां मोशे तियाआ लाडी आन पोऱ्याहां गोदड़ापोअ बोहाड़ीत मिसर देसोअहें देवे आपल्यी ते डेंगार लेतुज फाशुउ वापिस निहीयु.

21 ताहां यहोवा देवे मोशेहे कोयो, "जाहां तू मिसर देसोम पोतीही ताहां दिहान मेक के जे समत्कार आंय ताआ ताबाम आप्याहा तियां आखाहा फारोअ सामने देखाड़जी; पोन आंय तियाआ मोनोहो कड़क कोइ देहीं, आन तो माआं माहुंहूं ने जाअहूं देय. 22 आन तु फारोहो कोजी, ‘यहोवा देव एहें कोहे, के इस्राएल माआ बेटुह्हू आन डायु पोर्‍यू होय.✝4:22 कायदा 1:31; यिर्म 31:9 23 आन आंय ताहूं कोत देदोहो के माआ बेटाह्हाहा माआ आराधना सेवा कोए तेहें जाअहूं दे; आन तुमे ओमे जाआं तियाहा नाहां जाअहूं देदू तिहीं वाअहीं ओमे आंय ताआ डाया पोऱ्याहा माईंत टाकी देहीं.’"

24 ताहां एहेलोहो ओवो के वाटेज रोअलाअ जागेहे यहोवा देवे मोशेहे माइलोअ कोशित कोअयी. 25 ताहां सिप्पोरा एक वाडाल्लुहू डोण विशू आन तियीइ बेटाह्हाआ टोंडीइ सुटक्यो वाडीत टाक्यो, आन एहें कोत कोइत मोशेए गुडापोअ टाकी देदो, "खोरीज तू माआं कोअते रक्तावालू माआं माटी होय." 26 ताहां यहोवा देवे मोशेहे सोड़ी देदू. तियी वेले खतनाआ वाखरी तियी कोयो, "तु रक्त वोहाड़नारु माआ माटी होय."

27 ताहां यहोवा देवे आरोनोहो कोयो, "मोशेहे मिलीइलोअ काजे रानोम जा." ताहां तो गोयू आन देवोअ डोगोपोअ तियाहा मिल्यू आन तियाहा गुउं देदू. 28 ताहां मोशे आरोनोहो ओं कोत देखाड़्यो के यहोवा देवे की की गोठी कोत मोकल्यीही, आन कोड्ली कोड्ली निशाणी देखाड़ीलोअ आदेस आप्युहू. 29 ताहां मोशे आन आरोन जात कोइत आखा इस्राएल माअहोंअ डायहांहां टोलू कोअया. 30 आन जेती गोठी यहोवा देवे मोशेहे कोयीते ते आखी आरोने तियांहां कोत देखाड़्यी, आन माअहोंअ सामने ते निशाणी बी देखाड़्यी. 31 आन माअहें तियांआं गोठीपोअ विश्वास कोअयू; आन यहोवा देवे इस्राएलोअ कालजी लेदीही आन तियांआं दुखोपोअ नजर टाक्यीही, ओं उनाइत तियां टुंगा पोड़ीत वोंद्यो.✝4:31 निर्ग 14:31; योहान 2:11