1 जेहेलाम अब्राम नोवह्यान्नोव वोरह्योअ ओत गोयु, तेहेलाम यहोवा तियाहा दर्शन आपीत कोइत कोयो, "आंय सर्वसेक्तिमान देव होय; तु माआं हुजरीम साल*17:1 हुजरीम साल मोन्ज्ये, माआ सामने साल आन निर्दुस रोअलाआ कोशित कोओ. 2 आंय ताअरी शप्पत लेहीं, आन ताआ पारवाड़ीही जाअखीलीही वादाड़ीहीं." 3 ताहां अब्राम उबडू पोड़ीत कोइत वोंद्यो: आन देव तियाअरी ए गोठी कोतू गोयु, 4 "देख, माआं शप्पत ताअरी बांदाइत रोय, तियाहा काजे तू जाअखीला देसोअ टोलाआ मुख्य आब्हू ओत जाही. 5 तियाहा काजे ओमे रोत ताआ नाव अब्राम*17:5 अब्राम मोन्ज्ये, पान्गीइल्यू आब्हू ने रोय, पोन ताआ नाव अब्राहाम*17:5 अब्राहाम मोन्ज्ये, जाअखा जोओंअ आब्हू✝17:5 रोम 4:17 रोये; काहाके आंय ताहूं देसोअ टोलाआ मुख्य आब्हू ठरवी देदुहू. 6 आंय ताहूं जाअखीलुहू पान्गाड़ीहीं आन ताहूं जाअखीला देसोअ थुड़ो बोणावी देहीं, आन ताआ पारवाड़ीमेहें राजा उब्जे. 7 आन आंय ताआ आन ताआ फासाड़ी आवनारी पिड़ीइ देव रोहीं, एहलीही हादाजोल्म्यीइ शप्पत ताअरी आन ताआ फासाड़ी आवनारी पिड़ीइरी लेहो.✝17:7 लुक 1:55; गलाती 3:16 8 आन जियामेहें तू जिवण्यु कोत रोहे ओ पुरु कनान देस आंय ताहूं आन ताआ फासाड़ी ताआ पारवाड़ीही बी हादाजल्म्युउं खाजगी जागु कोत आपीहीं,✝17:8 प्रेशित 7:5 आन आंय तियांआं देव रोहीं."

9 फाशुउ देवे अब्राहामोहो कोयो, "तू बी माअरी लेद्ली शप्पतेए पालन कोअजी; तू आन ताआ फासाड़ी ताआ पारवाड़ बी तियां तियांआं पिड़ीमेहें तियी शप्पतेए पालन कोअहूं जोवे.✝17:9 प्रेशित 7:8; रोम 4:11 10 माअरी लेद्ली शप्पत ए होय के तुमामेएं आखा माट्योअ खतना ओवुहूं जोवे. यीइ शप्पतेए पालन ताहूं आन ताआ फासाड़ी ताआ पारवाड़ीही कोअहूं पोड़े. 11 तुमू जिवज्योअ खतना कोइत लेजा: जे शप्पत माआन तुमाआ विसमेहें होय, तियाआ एज निशाणी रोय. 12 पिड़ीन पिड़ीमेहें निस्ता ताआ पारवाड़ीइ एताज माटी नाहां, पोन जे ताआ कोअमेहें उबज्याय, नेते पारकाप रोत पोशा आपीत कोइत वेसाता लेदाय; एहेला आखा माटी बी जेहेलाम आँठ दिहोअ ओत जाय, ताहां तियांआं खतना कोअहूं जोवे. 13 जे ताआ कोअमेहें उबजे, नेत ताआ पोशावाअहीं वेसाता लेदाय, तियांआं खतना नक्की ओवुहूं जोवे; एहें कोइत माआ शप्पत जियीइ निशाणी तुमाआ डिलोम ओवे ते हादाजोल्म्यीइ रोये. 14 जो माटी बिगर खतनाआ रोय, मोन्ज्ये जियाआ टोंडीइ सुटक्य तोड़ीत कोइत खतना ने ओवो ओय, ताहां तियाहा तियांआं माअहूंमेहें रोत आरवीत टाकुहूं जोवे, काहाके तिये माअरी लेद्ली शप्पतेहे तोड़ी देदीही."✝17:14 उत्प 17:24; 21:4

15 फाशुउ देव अब्राहामोहो कोयो, "ताआ लाडी जे सारे होय, तियीही तु ओमे सारे मा कोही, तियीइ नाव सारा रोय. 16 आंय तियीही आशिर्वाद आपिहीं, आन तियीइ पेटे ताहूं एक सोऊ आपिहीं; आन आंय तियीही जाअखीला देसोअ मुख्य आयही बोणीत जाय एहेलुहू आशिर्वाद आपिहीं; आन तियीइ पारवाड़ीमेहें राजो राजोअ राजा उबजे."

17 ताहरुउ अब्राहाम वोंदीत लेदोन ओंहयू, आन मोनाआ मोनोम कोनु वोल्यू, "केहें होव वोरह्योअ माट्योअ बी पोर्‍य ओवे के? आन सारा जे नोव्वोद वोरह्योअ होय ते पोर्‍याहा जल्म आपित सेके के?" 18 आन अब्राहामे देवोहो कोयो, "इस्माएल ताआ नजरेम टिकीत रोय! ओंज भारपुर होय."

19 ताहां देवे कोयो, "हुदाअलीज ताआ लाडी साराप रोत ताहूं एक पोर्‍यू उबजे; आन तु तियाआ नाव इसाहाक मिकजी; आन आंय तियाअरी एहलीही शप्पत लेहीं जे तियाआ फासाड़ी तियाआ पारवाड़ीइ काजे हादाजोल्म्यीइ शप्पत रोय. 20 इस्माएलोअ बाप्तिमेहें बी आंय ताआ उनाअयुहू; आंय तियाहा बी आशिर्वाद आपिहीं, आन तियाहा पान्गाड़ीहीं आन वोडू बोणावी देहीं; तियाप रोत बारा पुडारी उबजे, आन आंय तियाप रोत एक वोडू देस बोणावीहीं. 21 पोन आंय माआ शप्पत इसाहाकोअरीज लेनारु जो साराआ पेटे आवते साल यीज होमसे उबजे." 22 ताहां देवे अब्राहामोअरी गोठी कोइलाआ आलहाअयू आन तियाआ जागे रोत उसे जातु रोयू.

23 ताहरुउ अब्राहामे तियाआ पोर्‍यू इस्माएलोहो लेदू; आन तियाआ कोअमेहें जेता उबज्याते, आन जेत्ता तियाआ पोशा वाअहीं वेसाता लेदाते, मोन्ज्ये तियाआ कोअमेहें जेता माटी ओता तियां आखाहा लेत कोइत तेदिहींज देवोअ वसनोअ परमाणे तियांआं खतना*17:23 खतना यी रितीमेहें टोंडीइ सुटक्य तोड़ीत टाकत्ले. कोअयो. 24 जाहां अब्राहामोअ टोंडीइ सुटक्य तोड़ीत कोइत खतना ओवो, ताहां तो नोवह्यान्नोव वोरह्योअ ओतू. 25 आन जाहां तियाआ पोर्‍या इस्माएलोअ टोंडीइ सुटक्य तोड़ीत कोइत खतना ओवो, तेहेलाम तो तेरा वोरह्योअ ओतू. 26 अब्राहाम आन तियाआ पोर्‍यू इस्माएल बेनू बाहा-बेठाआ खतना एकेज दिही ओवो; 27 आन तियाआ कोअमेहें जेता माटी ओता, जे कोअमेहें उबज्याते, आन जे पारकाप रोत पोशाआ लेदाते, तियां आखाआ खतना बी आरीज ओवो.