उत्पत्ती 27

41 एसाव ते याकोबोअरी आब्हे आपल्या आशिर्वादोअ कोअते ठोटाय कोअतुतो; आन तिये विसार कोअयू , "आब्हू तोम थोड़ाक दिहोम मोअनारुज होय, ताहरुउ आंय माआ पाही याकोबोहो माइत टाकीहीं."

42 जेहेलाम रिबीकाहा तियीइ डायु बेटाह्हा एसावोअ ए गोठी कोताप्यी, ताहां तियी तियीइ हानीइला पोर्‍या याकोबोहो हादीत कोइत कोयो, "पाल, ताआ पाही एसाव ताहूं माइलाअ कोअते तियाआ मोनोम धिर तोइत रोयुहू. 43 तियाहा काजे माआ सोआ, ओमे, माआ गोठ मान, आन हारानोमेहें माआ पाही लाबानोअ जागे जातु रो; 44 आन थोड़ाक दिही जाआं, जाअहूं जाआं ताआ पायहोअ खोत ने उतरे ताअहूं जाआं तियाआज जागे रोजी. 45 ताहरुउ जेहेलाम ताआ पायहोअ खोत तापोअ रोत उतरे, आन जों काम तुमे तियाअरी कोअयोहो, तियाहा तो विहीराइत जाय; ताहां आंय ताहूं तिहीं रोत हादीत लेहीं. आंय एकेज दिही तुमू बेनू पोर्‍या रोत सेटे काहा ओत जांव?"