1 यहोवा देवे जेते रानठ्ये जनवारे बोणायेते, तियां आखामेहें हाप जास्ती कोदऱ्यू ओतू;✝3:1 प्रगटी 12:9; 20:2 तिये बायीही कोयो, "‘तुमू या बोगिसाआ कोड्लाज साड़ोअ फोलवो मा खाहा,’ एहें खोरीज देवे कोयोहो के?"

2 बायी हापोहो कोयो, "या बोगिसाआ साड़ोअ फोलवो आमू खात सेकतेहे; 3 पोन जों साड़ बोगिसाआ विसमेहें होय तियाआ फोलवाआ बाप्तिमेहें देवे कोयोहो, के तुमू याहा मा खाहा आन याहा आथ बी मा लागाड़हा, नेत मोईत जाहा."✝3:3 प्रगटी 12:9; प्रगटी 20:2

4 ताहां हापे बायीही कोयो, "तुमू हुदाअलीज ने मोअहा! 5 पोन देव सोताहा जाअहें के जेदिहीं तुमू याआ फोलवो खाहा तेदिहींज तुमाआं डोआ उगड़ीत जाय, आन तुमुहूं हाजा बाक्ताआ ओकल जोड़ीत जाय, आन तुमू देवोअ हारके ओत जाहा."✝3:5 यहे 28:2

6 आन जाहां बाय देख्यो के तिया साड़ोअ फोल खाअलाआ काजे हाजो, आन देख्यामेहें मोनोहो गोमतो, आन ओकल आपनारो एहेलोहो बी होय; ताहां तियी तिया फोलोहो तोड़ीत कोइत खादो, आन तियीइ माट्योहो बी आप्यो, आन तिये बी खादो. 7 ताहराआ तियां बेनुउं डोआ उगड़ीत गोया, आन तियांहां मुंदू पोड़्यु के तें नागरेज होय; तियाहा काजे तियां अंजीरोअ पाने जोड़ीत जोड़ीत खोस्टी बोणावीत लेदी.

8 ताहां हांजेपोअ हेली वेले बोगिसामेहें यहोवा देव फिरत्लू हासवीत आदाम आन तियाआ लाडी नेहें यहोवा देवोअ नजरे ने पोड़ुहूं जोवे काजे बोगिसामेऱ्याआ साड़ोमेहें निकाइत गोये. 9 ताहां यहोवा देवे आदामोहों हाद कोइत फुश्यो, "तू का होय?"

10 तिये कोयो, "आंय ताआ आवाज उनाअयू माहूं बिक लागी, काहाके आंय नागरु ओतू, तियाहा काजे निकाइत गोयु."

11 देवे कोयो, "कोडे ताहूं कोयो के तू नागरु होय? जिया साड़ोअ फोल आंय ताहूं मा खाही कोयोतो, केहें तियाआ फोल तुमे खादो के?"

12 आदामे कोयो, "जे बोईं तुमे माअरी रोयतेहें आप्यीही तेज बोईं तिया साड़ोअ फोल माहूं आप्यो, आन तों आंय खादो."

13 ताहां यहोवा देवे तियी बोईंहीं कोयो, "ओं तुमे की कोअयोहो?" तियी बोईं कोयो, "हापे माहूं ठोगी देदी✝3:13 2 करिन्थ 11:3; 1 तिम 2:14 कोत आंय तों खात लेदो."

14 ताहां यहोवा देवे हापोहो कोयो, "तुमे जों ओं कोअयोहो तियाहा काजे तू आखा कोर्‍याआ जनवारोअ, आन आखा जोंगल्या जनवारो रोत वादार हारापवालो होय; तू पोटावाअहीं होरकीत सालीही, आन मोया-जिवताआ कादुउ साटतो रोही; 15 आन आंय ताआ आन यी बोईंइं विसमेहें, आन ताआ पिड़ी आन यीइ बोईंइं पिड़ीइ विसमेहें दुस्मोनी तियार कोअहीं; तो ताआ मुन्को पेस्के, आन तू तियाआ खेटवोहो टोसही."✝3:15 प्रगटी 12:17

16 फाश्योअ तियी बोईंहीं देवे कोयो, "आंय ताआ पिड़ा आन ताआ पोटाअरी ओवीइलाआ दुखोहो जास्ती वादाड़ीहीं; तू पिड़ाम ओत कोइत पोर्‍याहा उब्जाड़ीही; तेबी तु ताआ माट्योअरीज रोअलो इश्शा कोअही, आन तो तापोअ राज वापरे."

17 आन आदामोहों तिये कोयो, "तू जो ताआ लाडीइ गोठ उनाअयू, आन जिया साड़ोअ फोलवाआ बाप्तिमेहें आंय ताहूं आदेश आप्युतो के तू तियाहा मा खाही, तियाहा तुमे खादोहो, तियाहा काजे यी पुंयींहीं ताआ उस्ती हाराप लागुहू. तू यीइ कामाय मोया-जिवताआ कोश्टो कोअतीज खाया कोअही; 18 आन ते ताआ काजे काटे आन वोणसू उगाड़े, आन तू खेतोअ कामाय खाही;✝3:18 इब्री 6:8 19 आन तु मोया-जिवताआ निंडे गामगोजरोअ रोटू खाया कोअही, आन आखरीमेहें तू कादुव बोणीत जाही, काहाके तू तिहींजमेहें रोत निहींयुहू; तू कादुउ ते होय आन कादुउज बोणीत जाही."

20 आदामे तियाआ लाडीइ नाव हव्वा मिक्यो; काहाके जेते माअहें जिवते होय तियां आखाआ वेगीइ आयही तेज ओवी. 21 आन यहोवा देवे आदाम आन तियाआ लाडीइ काजे सांबड़ाआ आंगड़े बोणावीत कोइत तियांहां पोवाड़ी देदे.

22 यहोवा देवे कोयो, "मोनवीही हाजा बाक्ताआ ओकल जोड़ीत गोयीही, तों आमामेर्‍याआ एकाआ होस ओत गोयोहो; तियाहा काजे ओमे एहेलोहो ने ओवुहूं जोवे, के तों आथ टाकीत कोइत जिवनोअ साड़ोअ फोल बी तोड़ीत कोइत खात लेय आन सादा जिवतो रोय." 23 तियाहा काजे जिया कादवूम रोत तियाहा बोणायोहो, तिहींजमेहें मेहेंनत कोए तेहें काजे यहोवा देवे तियाहा एदेन बोगिसाम रोत बारथे काडी देदो. 24 तिहींइं फासाड़ी देवे जिवनोअ साड़ोअ वोल जानारी वाट राखीत बोहे तेहें काजे एदेनेए बोगिसाआ उक्तामाअहें करुब*3:24 करुब एकी जातीइ फाकावालू देवदूत नावोअ देवदूतोहों राखवाली कोए तेहें मिक्या. शारु वोल गोरगोर फिरनारी आगीइ तारवाआ मेक्यी.✝3:24 यहे 28:16