1 यीं गोठ्यीइ फासाड़ी एहेलोहो ओवो, के मिसरोअ राजाअ पिवाड़नारे आन रांदीत आपनारे तियांआं मालख्योअ विरुध्दाम गुनू कोअयू. 2 ताहरुउ फारो तियां बेनू आधिकारीही, मोन्ज्ये पिवाड़नाराआ मुख्याहा, आन रांदीत आपनाराआ मुख्याहा, बेनू पोअ खोत लागी. 3 तिये तियांहां तोइत कोइत राजवाड़ाआ राखवाल्योंअ मुख्याआ कोअमेहें, तियीज जेलेमेहें, जिहीं योसेफ बोंद ओती, टाकी देदा. 4 ताहरुउ फारोअ राखवाल्योअ मुख्ये तियांहां योसेफोअ आथोम होप्या, आन तो तियांआं सेवा साकरी कोउ वोल्यू; ताहराआ ते थोड़ाक दिही जेलेम रोया.

5 मिसरोअ राजाअ पिवाड़नारु आन रांदीत आपनारु, जेलेम बोंद ओता, तियां बेनू एकीज रातीम, तियां-तियांआं हुशारीइ पुरमाणे होपनो देख्यो. 6 वेगीइ जेहेलाम योसेफ तियांआं जागे मायते गोयु, ताहां तियांअहें पाल्य, ताहां ते बेनू नाराज होय. 7 तिये फारोअ आधिकारीही, जे तियाअरी तियाआ मालख्योअ कोअमेर्‍यीइ जेलेम बोंद ओता, फुश्यो, "आज तुमू नुरपाईं काहा उतारीत रोयाहा?"

8 तियां योसेफोहो कोयो, "आमू बेनू जोओं होपनो पाल्योहो, पोन इंहीं तियां होपनाआ अर्थ कोत आपनारो कोडोज कायने." योसेफे तियांहां कोयो, "होपनाआ अर्थ कोइलाआ देवोअ काम कायनाहां के? माहूं तुमाआ होपने कोतापा."

9 ताहरुउ पिवाड़नारु आधिकारी तियाआ होपनो योसेफोहो कोत आपू वोल्यू: "आंय होपनामेहें देख्यो के माआ सामने एक दाराक्शाआ वेलो होय; 10 आन तिया दाराक्शाआ वेलाम तिन डाल्यी होय; आन तियीइ डिरा फुटा, ते फुल्या, आन तिया फुलोअ गुम्साम दाराक्शे लागीत कोइत पाके. 11 फारोअ वाटकू माआ आथोम ओतू; आन आंय तियां दाराक्शाहा लेत कोइत फारोअ वाटकाम निपट्ये, आन वाटकू फारोअ आथोमेहें आप्यू."

12 ताहरुउ योसेफे तियाहा कोयो, "याअ अर्थ ओं होय : तिन डाल्यीइ अर्थ तिन दिही होय; 13 तियाहा काजे तिन दिहोअ मायते फारो राजा ताआ सतकार कोए,*40:13 मोन्ज्ये, ताआ मानपान ओवे आन फाशुउ तो ताहूं ताआ पद वापिस आपे, आन तू होय तेहेंज कोइत फारोअ पिवाड़नारु बोणीत कोइत तियाआ वाटकू तियाआ आथोम फाश्यु आप्या कोअही. 14 ताहरुउ जेहेलाम ताआ हाजो ओत जाय ताहां माहूं ओर कोअजी, आन मापोअ मेरवानी कोइत फारोअ आगाड़ी माआ गोठ्यी कोत आपजी, आन या जेलेम रोत माहूं सोड़वीइजी. 15 काहाके इब्री देसोम रोत माहूं सोइत लेत आयेहे; आन इंहीं बी आंय एहेलोहो कोड्लोज काम नाहां कोअयो, जिया वाअहीं आंय यी आंदाराआ कोठड़ीम टाकाओ."

16 जाहां रांदीत आपनारे मुख्ये पाल्य के होपनाआ अर्थ हाजो निहींयो ताहां तिये योसेफोहो कोयो, "आंय बी होपनो देख्योहो, माआ मुन्कापोअ पांडी रोटाअ तिन टोपली होय; 17 आन उपऱ्यीइ टोपलीमेहें फारोअ कोअते आखी जातीइ रांदल्यी वस्तु होय; आन सिड़े माआ मुन्कापोर्‍यीइ टोपलीमेहें रोत तियीं वस्तुहू खातेहे."

18 योसेफे कोयो, "याआ अर्थ ओं होय: तिन टोपलीइ अर्थ तिन दिही होय. 19 तिन दिहोअ मायते फारो ताआ मुन्को वाडीत ताहूं साड़ोअ उसे टांगाड़ी देय, आन सिड़े ताआ माहां टोसी टोसीइ खानारे."

20 तिसरे दिही फारोअ जल्म दिही ओतू, तिये तियाआ आक्खा आधिकारीही पांगात आप्यी, आन तियांमेहें पिवाड़नारा आधिकारीही आन रांदीत आपनारा आधिकारीही बेनुहूं जेलेम रोत काडाड़्या. 21 तिये पिवाड़नारा आधिकारीही तियाआ पद वापिस आप्यो, ताहरुउ तो फारोअ आथोम वाटकू आपू वोल्यू. 22 पोन रांदीत आपनारा आधिकारीइ तिये टांगी देवाड़्यु, जेहें कोइत के योसेफे तियांआं होपनाआ अर्थ तियांहां कोताप्योतो. 23 पोन तिये पिवाड़नाराआ आधिकार्‍ये योसेफोअ ओर ने मिक्यी; पोन तियाहा विहराइत गोयु.