Luka 5

Yesu wasanghula oyaluzidwa oyamba

1 Siku limojhi, Yesu wadali waima mbhepete mwa nyanja ya Genesaleti, wandhu ambili adamzongazonga kuvechela mawu ya Mnungu. 2 Wadaona mabwato yawili mbhepete mwa nyanja, iyo idasiidwa ni alovi yao adachoka kupita kukonja makoka yao. 3 Yesu wadalowa mubwato umojhi uwo udali wa Simoni, wadampembha Simoni kuti wambwanyizile kujhiwe, patali pang’ono ni mbhepete mwa nyanja. Wadayamba kuliyaluza gulu la wandhu uku wakhala mkati mwa ujha bwato. 4 Yapo wadamaliza kuyaluza, wadamkambila Simoni, "Peleka mabwato kujhiwe ni mponye makoka kuti mvuwe njhomba." 5 Simoni wadayangha, "Imwe Ambuye tachita njhito yolemecha usiku wonjhe nisitidapate chilichonjhe. Nambho, pakuti mwakamba, tiliponya khokha." 6 Yapo adaponya makoka yao mmajhi, adapata njhomba zambili mbaka makoka yao yadayamba kung’ambika. 7 Adakolosa achanjao yao adali mbwato wina kuti ajhe kwatangatila. Adafika ni adajhaza njhomba mmabwato yonjhe yawili mbaka mabwato yadali ziwaziwa. 8 Simoni Petulo yapo wadaona nchimwecho, wadagwada panjhi pamaso pa Yesu ni kukamba, "Ambuye chokani pamaso panga, chifuko ine ni mundhu wochimwa!" 9 Pakuti iye ni achanjake adazizwa kupunda pakupata njhomba zochuluka. 10 Chimwecho, Yakobo ni Yohana wana a Zebedayo, anyiiwo adali alovi achanjake a Simoni, adazizwa kupunda. Yesu wadamkambila Simoni Petulo, "Usadaopa, kuyambila lelo siuvuanjho njhomba, siukhale owapeleka wandhu kwa Ambuye." 11 Basi, yapo adachicha mabwato yajha pamtunda, adasiya kila kandhu nikumchata Yesu.