Matayo 25

Lamulo lotela la mayiko!

31 "Mwana wa Mundhu yapo siwajhe muulemelelo wake pamojhi ni atumiki a kumwamba a Mnungu, onjhe pamojhi naye yapo siwakhale pampando wa ufumu uku wali mfumu. 32 Wandhu wonjhe a maiko siyasonghane pamaso pake, ni naye siwapatule ngati owesa mbelele umo wapatula mbelele ni mbuzi. 33 Siwaziike mbelele kwene, ni mbuzi kumanjele. 34 Ndiipo mfumu siwakambile anyiwajha ali kwene, ‘Majhani anyiimwe mwapachidwa mwawi ni Atate kulandila ufumu waikidwa anyiimwe kuyambila kuumbidwa kwa jhiko. 35 Nidali ni njala mdanipacha chakudya, ni nidali nilujho mdanipacha majhi ya kumwa, ni nidali mlendo mdanilandila mnyumba zanu. 36 Nidalibe njhalu mdaniveka, nidali odwala mdanidwaza ni nidali mndende mdaniyendela.’ 37 Pamenepo wandhu abwino siamuyanghe Mbuye, ‘Liti tidakuonani muli ninjala tidakupachani chakudya ni liti mudali ni lujho tidakupachani majhi ya kumwa? 38 Liti tidakuonani mwali alendo niife kukulandilani kapina udalibe njhalu ni tidakupacha njhalu? 39 Liti mumadwala kapina mwamangidwa mndende tidakuyendelani?’ 40 Mfumu siwaayanghe, ‘Zene nikukambilani, umo mwamchitila mmojhi wa anyiyawa abale wanga yawo sajhikoza, mwanichitila ine!’"

41 "Ndiipo siwakambile wajha ali kumanjele, ‘Chokani kwanga anyimwe mwalosedwa, pitani kumoto wa muyaya waikilidwa Satana ni atumiki wake! 42 Nidali ni njala anyiimwe simudanipache chakudya, nidali ni lujho anyiimwe simudanipache majhi, 43 nidali mlendo anyiimwe simudanilandile, nidalibe njhalu anyiimwe simudanipache, nidali odwala ni nidali mndende anyiimwe simudajhe kuniyendela.’ 44 Ndiipo naonjho siamuyanghe, ‘Ambuye, liti tidakuonani imwe muli ni njala kapina muli ni lujho kapina mwali alendo kapina mudalibe njhalu kapina muli odwala ni muli mndende sitidakutangatileni?’ 45 Mfumu siwaayanghe, ‘Zene nikukambilani, ngati mudakana kwaathangatila mmojhi wa waang’ono yawa, mwanichitila ine.’ 46 Anyiyawa siapelekdwe kuchilango cha muyaya, nambho anyiwajha wandhu abwino siapite ku umoyo wa muyaya."