1 Abakuru b’umuryango w’Abalewi begera umuherezi Eliyazeri, na Yosuwa mwene Nuni, hamwe n’abakuru b’iyindi miryango ya Isirayeli, 2 bari i Shilo mu gihugu c’i Kanani, bababwira bati: "Uhoraho yategetse Mose ko muzoduha ibisagara tubamwo, n’uburagiro bw’ibitungwa vyacu."

3 Nuko, nk’uko Uhoraho yabitegetse, Abisirayeli baca baha Abalewi ibisagara n’uburagiro bikurikira nk’iragi ryabo:

4 Ubupfindo bwa mbere bwerekana umuryango wa bene Kohati hakurikijwe abakuru b’inzu ziwugize. Abalewi bakomoka kuri Aroni umuherezi bahabwa ibisagara icumi na bitatu mu vyari vyahawe Yuda, Simeyoni na Benyamini.

5 Abo mu ruvyaro rwa Kohati bari basigaye bahabwa nk’imigabane yabo ibisagara icumi mu vyari vyahawe imiryango ya Efurayimu, Dani, n’igice c’umuryango wa Manase.

6 Abo mu ruvyaro rwa Gerishoni bahawe nk’imigabane yabo ibisagara icumi na bitatu mu vyari vyahawe imiryango ya Isakari, Asheri, Nafutali, n’igice c’umuryango wa Manase w’i Bashani.

7 Abo mu ruvyaro rwa Merari bahabwa ibisagara icumi na bibiri mu vyari vyahawe imiryango ya Reyubeni, Gadi na Zebuloni.

8 Nuko Abisirayeli bashitsa ivyo Uhoraho yategetse Mose, mu guha Abalewi ibisagara n’uburagiro bwavyo nk’uko ubupfindo bwagiye buravyerekana.

9 Bahawe ibisagara n’amazina yavyo mu miryango ya Yuda na Simeyoni. 10 Aya ni yo mazina y’ibisagara vyahawe uruvyaro rwa Aroni, bakomoka ku nzu ya Kohati Umulewi kuko ubupfindo ari bo bwerekanye ubwa mbere:

11 Kiriyati-Araba ari ho Heburoni, mu misozi miremire ya Yuda, hamwe n’uburagiro buhakikuje. Araba yari sekuruza wa Anaki. 12 Ariko imirima n’imihana yari ikikuje ico gisagara vyari vyahawe Kalebu mwene Yefune nk’iragi ryiwe. 13 Ibisagara bikurikira hamwe n’uburagiro bwavyo ni vyo vyahawe uruvyaro rw’umuherezi Aroni: Heburoni, igisagara c’ubuhungiro ku wishe umuntu atabishaka, Libuna, 14 Yatiri, Eshitemowa, 15 Holoni, Debiri, 16 Ayini, Yuta na Beti-Shemeshi. Vyose hamwe vyari ibisagara icenda n’uburagiro bwavyo, ni vyo bahawe muri iyi miryango ibiri.

17 Ibisagara vyo mu muryango wa Benyamini babahaye ni:

Gibeyoni, Geba, 18 Anatoti na Alumoni. Vyose hamwe vyari ibisagara bine n’uburagiro bwavyo.

19 Ibisagara vyahawe abaherezi, ari rwo ruvyaro rwa Aroni, biri kumwe n’uburagiro bwavyo, vyose hamwe vyari icumi na bitatu.

20 Abakohati bari basigaye bo mu muryango wa Lewi bahawe nk’imigabane ibisagara bikurikira mu muryango wa Efurayimu:

21 Mu misozi miremire ya Efurayimu bahahawe:

Shekemu, igisagara c’ubuhungiro ku wishe umuntu atabishaka; hamwe na Gezeri, 22 Kibuzayimu na Beti-Horoni. Vyose hamwe vyari ibisagara bine biri kumwe n’uburagiro bwavyo.

23 Ibisagara bikurikira n’uburagiro bwavyo ni vyo abaherezi bahawe mu muryango wa Dani:

Eliteke, Gibetoni, 24 Ayaloni na Gati-Rimoni. Vyose hamwe vyari ibisagara bine, biri kumwe n’uburagiro bwavyo.

25 Mu gice c’umuryango wa Manase bahahawe:

Tanaki na Gati-Rimoni, n’uburagiro bwavyo. Vyose hamwe vyari ibisagara bibiri.

26 Ibisagara vyose hamwe vyahawe imiryango ya Kohati yari yasigaye vyari icumi n’uburagiro bwavyo.

27 Uruvyaro rwa Gerishoni, iyindi nzu yo mu muryango w’Abalewi, rwahawe ibisagara bikurikira n’uburagiro bwavyo:

mu gice c’umuryango wa Manase:

Golani kiri muri Bashani; igisagara c’ubuhungiro ku wishe umuntu atabishaka, na Beshitera, n’uburagiro bwavyo. Vyari ibisagara bibiri.

28 Mu muryango wa Isakari, bahahawe ibisagara bikurikira biri kumwe n’uburagiro bwavyo:

Kishiyoni, Daberati, 29 Yarimuti na Eni-Ganimu. Vyose hamwe vyari ibisagara bine n’uburagiro bwavyo.

30 Mu muryango wa Asheri, bahahawe ibisagara bikurikira biri kumwe n’uburagiro bwavyo:

Mishali, Abudoni, 31 Helikati na Rehobu. Vyose hamwe vyari ibisagara bine n’uburagiro bwavyo.

32 Mu muryango wa Nafutali bahawe ibisagara bikurikira biri kumwe n’uburagiro bwavyo:

Kedeshi muri Galilaya; igisagara c’ubuhungiro ku wishe umuntu atabishaka, Hamoti-Dori na Karitani. Vyose hamwe vyari ibisagara bitatu biri kumwe n’uburagiro bwavyo.

33 Ibisagara vyose hamwe vyahawe imiryango y’Abagerishoni biri kumwe n’uburagiro bwavyo vyari icumi na bitatu.

34 Abalewi bari bagisigaye, ari bo b’Abamerari bahawe ibisagara bikurikira n’uburagiro bwavyo:

mu muryango wa Zebuloni:

Yokineyamu, Karuta, 35 Dimina na Nahalali. Vyose hamwe vyari ibisagara bine, n’uburagiro bwavyo.

36 Mu muryango wa Reyubeni baronse ibisagara bikurikira biri kumwe n’uburagiro bwavyo:

Bezeri, Yahiza, 37 Kedemoti na Mefayati. Vyose hamwe vyari ibisagara bine.

38 Mu muryango wa Gadi bahawe ibisagara bikurikira biri kumwe n’uburagiro bwavyo:

Ramoti c’i Gileyadi; igisagara c’ubuhungiro ku wishe umuntu atabishaka, Mahanayimu, 39 Heshiboni na Yazeri. Vyose hamwe vyari ibisagara bine.

40 Ibisagara vyose vyahawe nk’imigabane imiryango y’Abalewi bo mu nzu ya bene Merari vyari icumi na bibiri.

41 Ibisagara vyahawe Abalewi mu gihugu cari cafashwe n’Abisirayeli vyari mirongo ine n’umunani, biri kumwe n’uburagiro bwavyo. 42 Igisagara kimwekimwe cose muri ivyo caba gifise uburagiro bugikikuje.

43 Nuko Uhoraho aha Isirayeli igihugu yari yararahiye ko azogiha ba sekuruza, baragifata kiba icabo, bakibamwo. 44 Uhoraho abaha akaruhuko aho bari hose, nk’uko yari yarabirahiye ba sekuruza babo. Nta mwansi wabo n’umwe yashoboye kubahagarara imbere, Uhoraho yagumye atanga abansi babo mu maboko yabo. 45 Nta sezerano ryiza na rimwe Uhoraho yari yarasezeraniye Isirayeli ritashitse; ivyo yasezeranye vyose yarabishikijije.