1 Kandi ico gihe, igisagara c’i Yeriko cari cugawe bikomeye kubera gutinya Abisirayeli. Nta muntu yasohoka canke ngo yinjire.

2 Maze Uhoraho abarira Yosuwa ati: "Ehe raba nshize Yeriko mu maboko yanyu, hamwe n’umwami waho n’abasoda baho bahambaye. 3 Mwe n’ingabo zawe nimuzunguruke igisagara rimwe gusa ku musi, muzobikore imisi itandatu. 4 Muzojane n’abaherezi indwi bitwaje inzamba zikozwe mu mahembe y’intama, bagendere imbere y’Isandugu. Ku musi ugira indwi, muzozunguruke ico gisagara incuro indwi, abo baherezi bariko baravuza izo nzamba. 5 Nimwumva abaherezi bavugije inzamba n’ijwi rirengera, abasoda bose bazoce na bo bashira ijwi hejuru basemerere cane, inzitiro z’igisagara zizoca zisenyuka, abantu bose bazoce binjira, umwe wese yinjirire aho azoba atumbereye."

6 Nuko Yosuwa mwene Nuni aca akoranya abaherezi, ababwira ati: "Nimurerure Isandugu y’Isezerano y’Uhoraho, abaherezi indwi bo muri mwebwe batware inzamba bagendere imbere yayo." 7 Aca ategeka abasoda ati: "Genda! Nimuzunguruke igisagara, kandi habeho ingabo zigendera imbere y’Isandugu y’Isezerano y’Uhoraho."

8 Yosuwa ahejeje kubwira abantu ivyo, ba baherezi indwi bitwaje inzamba baca bagendera imbere y’Uhoraho, bavuza za nzamba. Ya Sandugu y’Isezerano na yo irabakurikira. 9 Abasoda bafise ibigwanisho na bo baja imbere ya ba baherezi bitwaje inzamba, abandi bakurikira isandugu, kandi abaherezi bagenda baravuza inzamba. 10 Ariko Yosuwa yari yababwiye ati: "Ntimuze muvuze akaruru k’intambara, ntimuze muvuze urwamo, ndetse ntihaze hagire ijambo na rimwe muvuga, gushika umusi nzobabwira, ico gihe ni ho muzokoma akaruru." 11 Nuko batwara Isandugu y’Uhoraho, bazunguruka ico gisagara rimwe gusa, bahejeje abantu baca basubira mu mahema yabo, bararaho.

12 Bukeye Yosuwa avyuka kare mu gitondo, ba baherezi na bo barerura ya Sandugu y’Uhoraho. 13 Abo baherezi indwi bitwaje inzamba baja imbere, bagendera imbere y’Isandugu y’Uhoraho bavuza inzamba. Abasoda bafise ibigwanisho bakurikira Isandugu y’Uhoraho, inzamba na zo ziriko ziravuzwa. 14 Ku musi ugira kabiri bazungurutse ico gisagara incuro imwe, baca basubira mu mahema yabo. Bamara imisi itandatu babigira gutyo.

15 Ku musi ugira indwi bavyuka hakiri kare cane, bazunguruka ico gisagara nk’uko bahora babigira, mugabo uwo musi bakizunguruka incuro indwi. 16 Ku ncuro igira indwi, abaherezi bavugije inzamba, Yosuwa aca abwira abantu ati: "Koma akaruru, kuko Uhoraho abahaye kino gisagara! 17 Igisagara n’ibikirimwo vyose bibe ishikanwa k’Uhoraho. Ariko muzigame maraya Rahabu n’abo mu nzu yiwe, kuko yakingiye abatasi bacu. 18 Ntihagire ikintu na kimwe mu vyagenewe guturirwa mwisigariza, kuko mwoba mwikwegeye kuranduka, kandi mwoba mukwegeye ingorane n’umuvumo Abisirayeli mu mahema yabo. 19 Amafeza, inzahabu, n’ibikozwe mu mwakaka no mu vyuma, bibe ivyejejwe vy’Uhoraho, bijanwe mu kigega ciwe."

20 Inzamba ivuze, abantu baca bakoma akaruru n’inkomezi zabo zose. Ubwo nyene inzitiro z’i Yeriko zica zirasenyagurika, umusoda wese aca yinjirana aho yari atumbereye, bafata ico gisagara, 21 batikiza ivyo muri ico gisagara vyose, baranduza inkota abakibamwo bose: abagabo, abagore, abana, abatama, inka, intama n’indogoba.

22 Yosuwa abarira ba bagabo babiri baja gutata ico gisagara ati: "Nimuje ku nzu ya maraya, muzane abari muri yo bose nk’uko mwabimurahiye." 23 Ba bagabo bari bagiye gutata ico gisagara baca binjira kwa Rahabu, baramusohokana; we na se, na nyina, abo bavukana hamwe n’abari muri iyo nzu bose. Basohokana umuryango wose, babashira hafi y’aho Abisirayeli bari bashinze amahema yabo.

24 Baca baturira igisagara cose, n’ivyari muri co, ariko inzahabu, ifeza, ibikozwe mu mwakaka no mu vyuma, babitwara mu bubiko bwo mu nzu y’Uhoraho. 25 Maze Yosuwa arokora ubuzima bwa maraya Rahabu n’umuryango wiwe wose n’ivyo yari afise vyose, kuko yanyegeje abatasi Yosuwa yarungitse i Yeriko. Gushika n’ubu aracaba mu Bisirayeli.

26 Uwo mwanya Yosuwa ashira umuvumo kuri ico gisagara ati:

"Haravumwe imbere y’Uhoraho umuntu azosubira kwubaka iki gisagara Yeriko.

Amatanguriro yaco niyayashiraho azobure umwana wiwe w’imfura,

kandi ageze gushiraho inzugi z’irembo azobure umuhererezi."

27 Uko ni ko Uhoraho yabanye na Yosuwa, na we amenyekana mu gihugu cose.