માથ્થી 14

ઈસુ પાણી પર ચાલે છે

22 ટોળાને વિદાય કયાઁ પછી તરત જ ઈસુએ શિષ્યોને હોડીમાં બેસાડીને સામે કિનારે તેમની આગળ મોકલ્યા, 23 તેઓને વિદાય કયાઁ પછી, તેઓ પોતે પહાડ પર પ્રાર્થના કરવા માટે ગયા. તે મોડી રાત્રે તેઓ ત્યાં એકલા હતા. 24 અને હોડી પહેલેથીજ જમીનથી ઘણી દૂર હતી, પવન સામો હોવાને કારણે તોફાની મોજાંઓમાં સપડાઈ ગઈ હતી.

25 સવારના થોડા સમય પહેલાં સરોવર પર ચાલીને ઈસુ તેઓની પાસે જતા હતા. 26 જયારે શિષ્યોએ તેમને પાણી પર ચાલતાં જોઈને તેઓ બી ગયાં, તેઓએ કહ્યું "તે કોઈ ભૂત છે!" ને બીકથી તેઓએ બુમ પાડી.

27 પણ ઈસુએ તરત તેઓને કહ્યું, "ગભરાશો નહિ, હિંમત રાખો! એ તો હું છું!"

28 ત્યારે પિતરે તેમને જવાબ આપ્યો, "પ્રભુ! જો એ તમે હો, તો મને કહો કે હું પાણી પર ચાલીને તમારી પાસે આવું."

29 તેમણે એ કહ્યું, "આવ!"

તેથી પિતર હોડીમાંથી ઊતરીને પાણી પર ચાલીને ઈસુની તરફ આવવાં લાગ્યો. 30 પણ જયારે તેણે પવન જોયો, ત્યારે તે ડરી ગયો અને ડુબવા લાગ્યો. ને બૂમ પાડી ઊઠયો, "પ્રભુ, મને બચાવો!"

31 તરત જ ઈસુએ હાથ લાંબો કરીને તેને પકડી લીધો અને તેમણે કહ્યું, "ઓ અલ્પવિશ્વાસી! તેં કેમ સંદેહ આણ્યો?"

32 અને જયારે તેઓ હોડીમાં ચઢી ગયા, પવન શાંત થઈ ગયો. 33 અને હોડીમાં જેઓ હતા તેઓએ તેમની આરાધના કરી, કહ્યું, "સાચે જ તમે ઈશ્વરપુત્ર છો."