1 दर्शनको बेँसीको विरुद्धमा भविष्यवाणी:

अहिले तिमीहरूलाई के भयो,

कि तिमीहरू सबै जना घरका कौसीहरूमा चढेर गयौ?

2 हे होहल्‍ला र खैलाबैला भरिएको सहर,

हे हलचल र उत्तेजनाले भरिएको नगर;

मारिएका तेरा मानिसहरू तरवारद्वारा मारिएका होइनन्,

न त तिनीहरू लडाइँमा मारिएका हुन्।

3 तेरा सबै अगुवाहरू एकसाथ भागेका छन्;

तिनीहरू कुनै धनु नचलाई पक्रिएका छन्।

तेरा शत्रुहरू टाढा छँदै तँ भागिस्,

र तिमीहरू एकसाथ कैदमा लगियौ।

4 यसकारण मैले भनेँ, "मबाट गइहाल;

मलाई धुरुधुरु रुन देओ।

मेरा जातिको संहारमा

मलाई सान्त्वना दिने प्रयास नगर।"

5 सेनाहरूका याहवेह, प्रभुकहाँ

दर्शनको बेँसीमा खैलाबैला, कुल्चीमिल्ची

र आतङ्कको एउटा दिन छ;

पर्खाल भत्काउने

र पहाडहरूसित कराउने एउटा दिन छ।

6 एलामले आफ्ना सारथीहरू र घोडाहरूसित

आफ्नो धनु राख्ने ठोक्रो भिर्छ;

कीरले ढालको खोल निकाल्छ।

7 तेरा अति उत्तम बेँसीहरू रथहरूले भरिएका छन्,

र सहरका मूलढोकाहरूमा घोडचढीहरू खटाइएका छन्।

8 यहूदाको सुरक्षा हटाइएको छ;

अनि त्यस दिन तैँले वनमा भएको

राजमहलका हतियारहरूतिर हेरिस्;

9 तैँले दावीदको सहरका

धेरै पर्खालहरूमा धाँदाहरू देखिस्;

तैँले तल्‍लो पोखरीमा

पानी जम्मा गरिस्।

10 तैँले यरूशलेममा भवनहरू गनिस्,

र पर्खाल बलियो पार्न घरहरू भत्काइस्।

11 तैँले पुरानो कुवाको पानीको निम्ति

दुई वटा पर्खालहरूको बीचमा एउटा जलाशय निर्माण गरिस्,

तर तैँले त्यसलाई निर्माण गर्नुहुनेतिर हेरिनस्;

अनि धेरै पहिले त्यसलाई योजना गर्नुहुनेलाई आदर गरिनस्।

12 त्यस दिन प्रभु, सेनाहरूका याहवेहले

तँलाई त्यससित रुन र विलाप गर्न,

आफ्नो केश लुछ्न

र भाङ्ग्रा लगाउन बोलाउनुभयो।

13 तर हेर, आनन्द र रमाहट,

पशुहरू संहार गर्ने र भेडाहरू मार्ने,

मासु खाने र मद्य पिउने काम भइरहेछ!

तिमीहरू भन्छौ, "लौ, खाऔँ र पियौँ;

किनकि भोलि त हामी मर्नेछौँ!"

14 सेनाहरूका याहवेहले मैले सुन्‍ने गरी यो प्रकट गर्नुभएको छ: "यो पाप तेरो मृत्युको दिनसम्म प्रायश्‍चित हुनेछैन" प्रभु, सेनाहरूका याहवेह भन्‍नुहुन्छ।

15 प्रभु, सेनाहरूका याहवेह यसो भन्‍नुहुन्छ:

"जा, त्यस भण्डारेलाई,

राजमहलको जिम्मामा रहेको शेब्नालाई यसो भन्:

16 तँ यहाँ के गर्दैछस्, र तँलाई

यहाँ आफ्नो लागि चिहान बनाउन कसले अनुमति दियो?

यस उचाइमा आफ्नो चिहान खोप्ने,

र चट्टानमा आफ्ना निम्ति खोपेर विश्रामस्थल बनाउने अधिकार कहाँबाट पाइस्?

17 "होशियार, याहवेहले तँलाई बलियो गरी पक्रनुहुन्छ;

अनि तँ शक्तिशाली मानिस सुन्, तँलाई उहाँले टिपेर टाढा फ्याँकिदिनुहुनेछ।

18 उहाँले तँलाई कसेर पोको पार्नुहुनेछ;

अनि एउटा भकुण्डोजस्तै ठूलो देशमा हुर्‍र्याइदिनुहुनेछ।

त्यहीँ नै तँ मर्नेछस्,

र त्यहाँ तेरा तेजस्वी रथहरू जाकिनेछन्,

र ती तेरा मालिकको घरानाका निम्ति शर्मको कुरा हुनेछ!

19 म तँलाई तेरो जिम्मेवारीको कामबाट हटाउनेछु,

र तँ आफ्नो पदबाट निकालिनेछस्।

20 "त्यस दिन म हिल्कियाहको छोरा, मेरो सेवक एल्याकीमलाई बोलाउनेछु। 21 म त्यसलाई तेरो पोशाक पहिर्‍याइदिनेछु र त्यसलाई तेरो पटुका बाँधिदिनेछु; अनि तेरा सबै अधिकार त्यसलाई सुम्पिदिनेछु। त्यो यरूशलेममा बस्‍नेहरूका निम्ति र यहूदाको घरानाका निम्ति पिता हुनेछ। 22 म त्यसका काँधमा दावीदको घरानाको साँचो राखिदिनेछु; त्यसले जे खोल्छ, त्यो कसैले थुन्‍न सक्दैन; अनि त्यसले जे थुन्छ, त्यो कसैले खोल्न सक्दैन। 23 म त्यसलाई एउटा स्थिर ठाउँमा गाडिएको किलाझैँ गाड्नेछु। त्यो आफ्ना पिताको घरानाका निम्ति एउटा सम्मानको आसन हुनेछ। 24 आफ्नो परिवारको सम्पूर्ण महिमा—त्यसका सन्तान र शाखाहरू, त्यसका हरेक स-साना पात्रहरू—कचौरादेखि गाग्रोसम्मको महिमा त्यसमा नै निर्भर गर्नेछ।"

25 सेनाहरूका याहवेह घोषणा गर्नुहुन्छ, "त्यस दिन दृढ स्थानमा गाडिएको त्यो किला उखेलिनेछ; त्यो काटिएर ढल्नेछ, र त्यसमा झुण्डिएको भारी छिनेर जानेछ।" याहवेह बोल्नुभएको छ।