Êxodo 16

ಮನ್ನಾ ಅನಿ ಲಾವಕ್ಕಿ

1 ಇಜ್ರಾಯೆಲಾಂಚೊ ಸಗ್ಳೊ ತಾಂಡೊ ಎಲಿಮಿಕ್ನಾ ಜಾವ್ಕ್ ಲಾಗಲ್ಲ್ಯಾ ಮಾನಾ ತೆನಿ ಇಜಿಪ್ತ್ ದೆಶ್ ಸೊಡುನ್ ದೊನ್ವ್ಯಾ ಮೈನ್ಯಾಚ್ಯಾ ಪಂದ್ರಾವ್ಯಾ ದಿಸಿ ಎಲಿಮಿಕ್ ಅನಿ ಸಿನಾಯ್ ಮಡ್ಡಿಚ್ಯಾ ಮದ್ದಿ ಹೊತ್ತ್ಯಾ ಸಿನ್ ಮನ್ತಲ್ಯಾ ಡಂಗ್ಳಿತ್ ಯೆಲ್ಯಾನಿ. 2 ಡಂಗ್ಳಿತ್ ಇಜ್ರಾಯೆಲಾಂಚ್ಯಾ ಸಗ್ಳ್ಯಾ ತಾಂಡ್ಯಾನ್, ಮೊಯ್ಜೆ ಅನಿ ಆರೊನಾವರ್‍ತಿ ಗುನ್ಗುಟ್ಟುನ್, 3 "ಹೊತ್ತೊ ಪುರಾ ತಾಂಡೊ ಭುಕೆನ್ ಮರುಚೆ ಮನುನ್ ತುಮಿ ಅಮ್ಕಾ ಡಂಗ್ಳಿತ್ ಬಲ್ವುನ್ ಹಾನ್ಲ್ಯಾಸಿ, ಅಮಿ ಇಜಿಪ್ತಾತ್ ರ್‍ಹಾತಾನಾ ಸರ್ವೆಸ್ಪರಾಚ್ಯಾ ಹಾತಿತ್ ಮರ್ತಲೆ ಕವ್ಡೆಕಿ ಬರೆ ಹೊತ್ತೆ, ತನ್ನಾ ಅಮಿ ಮಾಸಾಚ್ಯಾ ಆಯ್ದಾನಾಂಚ್ಯಾ ಜಗ್ಗೊಳ್ ಬಸುನ್ ಪೊಟ್ ಭರ್ ಜೆಯ್ತ್ ಹೊತ್ತ್ಯಾಂವ್ ನ್ಹಯ್" ಮಟ್ಲ್ಯಾನಿ. 4 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್ ಅಬಕ್ ಮಿಯಾ ಮಳ್ಬಾಕ್ನಾ ಜೆವಾನ್ ದಿತಾ, ಹಿ ಲೊಕಾ ಹ್ಯಾ ಲೊಕಾ ಹರ್ ಎಕ್ ದಿಸಿಬಿ ಭಾಯ್ರ್ ಜಾವ್ನ್ ತ್ಯಾ ದಿಸಾಕ್ ಪಾಜೆ ಹೊಲ್ಲೆ ತವ್ಡೆಚ್ ಗೊಳಾ ಕರುನ್ ಘೆವ್ಚೆ, ಹೆಚ್ಯಾ ವೈನಾ ತೆನಿ ಮಾಜ್ಯಾ ಗೊಸ್ಟಿ ಸಾರ್ಕೆ ಚಲುಲಾತ್ಕಿ ನಾ ಮನುನ್ ಮಿಯಾ ಕಳ್ವುನ್ ಘೆತಾ. 5 ಸಾವೆಚ್ಯಾ ದಿಸಿ ತೆನಿ ಹಾನಲ್ಲೆ ತಯಾರ್ ಕರುನ್ ಘೆತಾತ್, ಖರೆ ತೆ ಸದ್ದಾ ಮಿಳ್ವುನ್ ಘೆಟಲ್ಲ್ಯಾಕಿಂತಾ ದೊನ್ ಪಟ್ಟ್ ಹೊವ್ನ್ ರ್‍ಹಾತಾ ಮನುನ್ ಸಾಂಗ್ಲ್ಯಾನ್. 6 ಮೊಯ್ಜೆನ್ ಅನಿ ಆರೊನಾನ್ ಇಜ್ರಾಯೆಲ್‌ಕಾರಾಕ್ನಿ, "ತುಮ್ಕಾ ಇಜಿಪ್ತ್ ದೆಸಾಕ್ನಾ ಸುಟ್ಕಾಕರಲ್ಲೆ ಸರ್ವೆಸ್ಪರಾನುಚ್ ಮನ್ತಲೆ ಸಾಂಚೆಕ್ಡೆ ತುಮ್ಕಾ ಕಳ್ತಾ; 7 ಸಕ್ಕಾಳ್ಚೆ ಸರ್ವೆಸ್ಪರಾಚಿ ಮಹಿಮಾ ತುಮ್ಕಾ ದಿಸ್ತಾ, ತುಮಿ ತೆಜ್ಯಾ ವರ್‍ತಿ ಗುನ್ಗುಟ್ತಲಿ ಗೊಸ್ಟಿಯಾ ತೆಕಾ ಆಯಿಕ್ಲಾ, ತುಮಿ ಅಮ್ಚೆ ವರ್‍ತಿ ಕಶ್ಯಾಕ್ ಗುನ್ಗುಟ್ತ್ಯಾಸಿ? ಅಮಿ ಲೈ ಕಮ್ಮಿಚೆ" ಮನುನ್ ಸಾಂಗ್ಲ್ಯಾನ್. 8 ಮೊಯ್ಜೆನ್, "ಸಾಂಚೆಕ್ಡೆ ಸರ್ವೆಸ್ಪರ್ ತುಮ್ಕಾ ಮಾಸೆಚೆ ಜೆವಾನ್ ಅನಿ ಸಕ್ಕಾಳ್ಚೆ ಪಾಜೆ ತವ್ಡಿ ಭಾಕ್ರಿಯಾ ದಿತಾ. ತುಮಿ ಗುನ್ಗುಟ್ತಲೆ ಸರ್ವೆಸ್ಪರಾಕ್ ಪಾವ್ಲೆ, ತೆ ತುಮಿ ಗುನ್ಗುಟ್ತಲೆ ಸರ್ವೆಸ್ಪರಾಕ್ ಖರೆ ಅಮ್ಕಾ ನೈ, ಮಿಯಾ ಅನಿ ಆರೊನ್ ಲೈ ಕಮ್ಮಿಚೆ" ಮಟ್ಲ್ಯಾನ್. 9 ಅನಿ ಮೊಯ್ಜೆನ್ ಆರೊನಾಕ್, ತಿಯಾ ಇಜ್ರಾಯೆಲ್ ಲೊಕಾಂಚ್ಯಾ ತಾಂಡ್ಯಾಚ್ಯಾ ಜಗ್ಗೊಳ್ ಜಾವ್ನ್, ಸರ್ವೆಸ್ಪರಾನ್ ತುಮಿ ಗುನ್ಗುಟ್ತಲೆ ಆಯ್ಕಲ್ಲ್ಯಾ ಸಾಟ್ನಿ ತುಮಿ ಸಗ್ಳೆ ಗೊಳಾ ಹೊವ್ನ್ ತೆಚ್ಯಾ ಇದ್ರಾಕ್ ಯೆವ್ಚೆ ಮನುನ್ ಹುಕುಮ್ ದಿ, ಮಟ್ಲ್ಯಾನ್. 10 ಆರೊನ್ ಇಜ್ರಾಯೆಲ್ ಲೊಕಾಂಚ್ಯಾ ವಾಂಗ್ಡಾ ಬೊಲ್ತಾನಾ, ತೆನಿ ಡಂಗ್ಳಿಕ್ಡೆ ಬಗಟ್ಲ್ಯಾನಿ ತನ್ನಾ ಸರ್ವೆಸ್ಪರಾಚಿ ಮಹಿಮಾ ಮಳ್ಬಾತ್ ದಿಸ್ಲಿ.

11 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಚ್ಯಾ ವಾಂಗ್ಡಾ ಬೊಲುನ್, 12 "ಇಜ್ರಾಯೆಲ್ ಲೊಕಾ ಗುನ್ಗುಟ್ತಲೆ ಮಾಕಾ ಆಯ್ಕಲಾ, ತಿಯಾ ತೆಂಕಾ, ತುಮಿ ಸಾಂಚೆಕ್ಡೆ ಮಾಸಾಚೆ ಜೆವಾನ್ ಜೆವ್ತ್ಯಾಸಿ, ಸಕ್ಕಾಳಿ ಪಾಜೆ ತೌಡಿ ಭಾಕ್ರಿಯಾ ಖಾತ್ಯಾಸಿ, ಅನಿ ಹೆಚ್ಯಾ ವೈನಾ ಮಿಯಾಚ್ ತುಮ್ಚೊ ಸರ್ವೆಸ್ಪರ್ ಮನುನ್ ತುಮ್ಕಾ ಕಳ್ತಾ ಮನುನ್ ತೆಂಕಾ ಸಾಂಗುಚೆ" ಮಟ್ಲ್ಯಾನ್. 13 ಸಾಂಜ್ ಹೊತಾನಾ ಲಾವಕ್ಕಿಯಾ ತೆಂಚ್ಯಾ ಬಿಡಾರಾಂಚ್ಯಾ ವರ್‍ತಿ ಧಾಪುನ್ ಪಡ್ಲಿ, ಸಕ್ಕಾಳಿ ಇಬ್ಬನಿ ಬಿಡಾರಾಂಚ್ಯಾ ಭೊತ್ಯಾನಿ ಪಡ್ಲಿ. 14 ಇಬ್ಬನಿ ಸುಕುನ್ ಗೆಲ್ಲ್ಯೆ ತನ್ನಾ ಡಂಗ್ಳಿತ್ಲ್ಯಾ ಜಿಮ್ನಿ ವರ್‍ತಿ ಬಾರಿಕ್ ರವೊ ಗತಿನ್ ಪಡಲ್ಲೆ ದಿಸ್ಲೆ. ತೆ ಪಿಟ್ಟಾ ಸಾರ್ಕೆ ಫಾಂಡ್ರೆ ಹೊತ್ತೆ, 15 ಇಜ್ರಾಯೆಲಾಂಚ್ಯಾ ಲೊಕಾನಿ ತೆ ಬಗ್ತಾನಾ, ಎಕಾ ಮೆಕಾಕ್ನಿ ತೆ ಮನ್ನಾ ಮಟ್ಲ್ಯಾನಿ, ಕಶ್ಯಾಕ್ ಮಟ್ಲ್ಯಾರ್ ತೆ ಕಾಯ್ ಮನ್ತಲೆ ತೆಂಕಾ ಕಳುಕ್ನಾ, ತನ್ನಾ ಮೊಯ್ಜೆನ್ ಸರ್ವೆಸ್ಪರಾನ್ ದಿಲ್ಲಿ ಭಾಕ್ರಿಯಾ ಹಿಚ್ ಹೊಯ್, ಮಟ್ಲ್ಯಾನ್. 16 ಸರ್ವೆಸ್ಪರಾನ್ ತೆಂಕಾ ಹುಕುಮ್ ದಿಲ್ಲೆ ಕಾಯ್ ಮಟ್ಲ್ಯಾರ್, ಹರ್ ಎಕ್ಲೊಬಿ ಅಪ್ನಿ ಕವ್ಡೆ ಖಾತಾ ತವ್ಡೆ ಗೊಳಾ ಕರುನ್ ಘೆಂವ್ದಿತ್, ಎಕ್ಲ್ಯಾಕ್ ತಿನ್ ಶೆರ್ ತೌಡೆ ಬಿಡಾರಾತ್ ಹೊತ್ತ್ಯಾ ಲೊಕಾಂಚ್ಯಾ ಅಂಕ್ಯಾ ಪ್ರಕಾರ್ ಗೊಳಾ ಕರುನ್ ಘೆವ್ಚೆ ಮಟ್ಲ್ಯಾನ್.

17 ಇಜ್ರಾಯೆಲ್ ಲೊಕಾಕ್ನಿ ತಸೆಚ್ ಕರುನ್ ಉಲ್ಲ್ಯಾನಿ ಲೈ, ಅನಿ ಉಲ್ಲ್ಯಾನಿ ಕಮ್ಮಿ ಗೊಳಾ ಕರ್ಲ್ಯಾನಿ. 18 ಲೈ ಗೊಳಾ ಕರಲ್ಯಾಕ್ನಿ ಲೈ ಗಾವ್ಕ್ ನಾ, ಅನಿ ಕಮ್ಮಿ ಗೊಳಾ ಕರಲ್ಲ್ಯಾಕ್ನಿಬಿ ಕಮ್ಮಿ ಹೊವ್ಕ್ ನಾ, ಹರ್ ಎಕ್ಲ್ಯಾಕ್ಬಿ ಅಪ್ನಾಚ್ಯಾ ಜೆವ್ನಾಕ್ ಫಿರೆ ಹೊತಾ ತೌಡೆಚ್ ಗಾವ್ಲೆ. 19 ಮೊಯ್ಜೆನ್ ತೆಂಕಾ ಹ್ಯಾತುರ್ ಕೊನ್ಬಿ ದುಸ್ರೆಂದಿಸಾ ಪಾತರ್ ಥವ್ನ್ ಘೆವ್ಚೆ ನ್ಹಯ್ ಮನುನ್ ಸಾಂಗ್ಲ್ಯಾನ್. 20 ಹೊಲ್ಯಾರ್ಬಿ ಉಲ್ಲ್ಯಾ ಲೊಕಾನಿ ಮೊಯ್ಜೆಚಿ ಗೊಸ್ಟ್ ಆಯ್ಕಿ ನಸ್ತಾನಾ, ತೆ ಸಕ್ಕಾಳಿ ಪತರ್ ಥವ್ನ್ ಘೆಟಲ್ಲೆ ತನ್ನಾ ತೆ ಕಿಡೆ ಪಡುನ್ ವಾಸ್ ಉಟಲ್ಲಿ, ತನ್ನಾ ತೆಂಚ್ಯಾ ವರ್‍ತಿ ಮೊಯ್ಜೆಕ್ ರಾಗ್ ಯೆಲೊ.

21 ಅಸೆಚ್ ತೆಂಚ್ಯಾತ್ ಹರ್ ಎಕ್ಲೊಬಿ ಖಾತಾ ತವ್ಡೆ ಸದ್ದಾ ಸಕ್ಕಾಳಿ ತೆನಿ ತೆ ಗೊಳಾ ಕರಿತ್, ನಿಂಬಾರ್ ಯೆಲ್ಲ್ಯಾ ಸಾರ್ಕೆ ತೆ ಕರ್ಗುನ್ ಜಾಯ್.

22 ಸಾವೆಚ್ಯಾ ದಿಸಿ ದೊನ್‍ಪಟ್ ಭಾಕ್ರಿಯಾ ಮಟ್ಲ್ಯಾರ್, ಎಕ್ಲ್ಯಾಕ್ ಸಾ ಶೆರ್ ಹೊಯ್ ಸಾರ್ಕೆ ಗೊಳಾ ಕರಲ್ಯಾ ಸಾಟ್ನಿ ತಾಂಡ್ಯಾಚ್ಯಾ ಸಗ್ಳ್ಯಾ ಮುಖಂಡಾನಿ ಯೆವ್ನ್ ಮೊಯ್ಜೆಕ್ ಕಳ್ವುಲ್ಯಾನಿ. 23 ಸರ್ವೆಸ್ಪರಾನ್ ತೆಂಕಾ ಸಾಂಗಲ್ಲಿ ಗೊಸ್ಟ್ ಹಿಚ್, ಉದ್ದ್ಯಾ ಆರಾಮ್ ಕರ್‍ತಲೆ ನಿತಳ್ ಸಬ್ಬಾತಾಚೊ ದಿಸ್ ಹೊವ್ನ್ ಹಾಯ್, ಭಾಜ್ತಲೆ ಹೊತ್ತೆ ಸಗ್ಳೆ ಆಜುಚ್ ಭಾಜುನ್ ಘೆವಾ. ಸಿಜ್ವುತಲೆ ಹೊತ್ತೆ ಸಿಜ್ವುನ್ ಘೆವಾ, ಹ್ಯಾತುರ್ ಹುರಲ್ಲೆ ಸಗ್ಳೆ ಸಕ್ಕಾಳಿ ಪತರ್ ಥವ್ನ್ ಘೆವಾ ಮಟ್ಲ್ಯಾನ್. 24 ಮೊಯ್ಜೆನ್ ಹುಕುಮ್ ದಿಲ್ಲ್ಯಾ ಸಾರ್ಕೆ ತೆನಿ ತೆ ದುಸ್ರೆಂದಿಸಾ ಪಾತರ್ ಥವ್ನ್ ಘೆಟಲ್ಲ್ಯಾ ತನ್ನಾ, ತೆಕಾ ವಾಸ್ಬಿ ಯೆವ್ಕನಾ, ಅನಿ ತ್ಯಾತುರ್ ಕಿಡೆಬಿ ಹೊವ್ಕ್ ನಾತ್. 25 ತನ್ನಾ ಮೊಯ್ಜೆನ್, ಆಜ್ ಹೆ ಖಾವಾ ಕಶ್ಯಾಕ್ ಮಟ್ಲ್ಯಾರ್, ಆಜ್ ಸರ್ವೆಸ್ಪರಾಚೊ ಅರಾಮ್ ಕರ್ತಲೊ ಸಬ್ಬಾತಾಚೊ ದಿಸ್ ಮನುನ್ ನಿರ್ದಾರ್ ಹೊಲ್ಲ್ಯಾ ಸಾಟ್ನಿ ತುಮ್ಕಾ ಬಿಡಾರಾಚ್ಯಾ ಭಾಯ್ರ್ ಕಾಯ್ಬಿ ಗಾಯ್ನಾ, 26 ಸಾ ದಿಸ್ ತುಮಿ ತೆ ಗೊಳಾ ಕರುಚೆ, ಸಾತ್ವೆಚೊ ದಿಸ್ ಆರಾಮ್ ಕರ್ತಲೊ ಹೊಲ್ಲ್ಯಾ ಸಾಟ್ನಿ ಬಾರಿಕ್ಲಿಬಿ ರ್‍ಹಾಯ್ನಾ ಮಟ್ಲ್ಯಾನ್ ತಸೆಚ್ ಹೊಲೆ. 27 ಸಾತ್ವೆಚ್ಯಾ ದಿಸಿ ಉಲ್ಲಿ ಲೊಕಾ ಭಾಕ್ರಿಯಾ ಗೊಳಾ ಕರುಕ್ ಮನುನ್ ಬಾರ್ಯಾ ಗೆಲೆ, ಖರೆ ತೆಂಕಾ ಕಾಯ್ಬಿ ಗಾವ್ಕ್ ನಾ. 28 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, "ಅನಿ ಕವ್ಡೆ ಪತರ್ ತುಮಿ ಮಾಜಿ ಹುಕುಮಾ ತಿರಸ್ಕಾರ್ ಕರ್ತ್ಯಾಶಿ?" ಮಟ್ಲ್ಯಾನ್. 29 ಸರ್ವೆಸ್ಪರಾನ್ ತುಮ್ಕಾ ಆರಾಮ್ ಕರ್ತಲೊ ದಿಸ್ ದಿಲ್ಲ್ಯಾ ಸಾಟ್ನಿ ತುಮ್ಕಾ ಸಾವೆಚ್ಯಾ ದಿಸಾತ್ ದೊನ್ ದಿಸಾಚಿ ಭಾಕ್ರಿಯಾ ದಿಲ್ಯಾನಾಯ್, ಹರ್ ಎಕ್ಲೊಬಿ ಅಪ್ನಿ ಹೊತ್ತ್ಯಾಕ್ಡೆ ರಾವ್ಚೆ ಕೊನ್ಬಿ ಅಪ್ಲೊ ಜಾಗೊ ಸೊಡುನ್ ಜಾವ್ಚೆ ನ್ಹಯ್ , ಯಾದ್ ರಾಂವ್ದಿತ್, 30 ತಸೆ ಹೊವ್ನ್ ಲೊಕಾನಿ ಸಾತ್ವ್ಯಾ ದಿಸಿ ಕಾಯ್ಬಿ ಕಾಮ್ ಕರಿ ನಸ್ತಾನಾ ಆರಾಮ್ ಕರ್ಲ್ಯಾನಿ.

31 ಇಜ್ರಾಯೆಲ್ ಲೊಕಾನಿ ತ್ಯಾ ಜೆವ್ನಾಕ್ ಮನ್ನಾ ಮನುನ್ ನಾವ್ ಥವ್ಲ್ಯಾನಿ. ತೆ ಸಾಂಬಾರಾಚ್ಯಾ ದಾನ್ಯಾಂಚ್ಯಾ ಸಾರ್ಕೆ ಅನಿ ಫಾಂಡ್ರೆ ಹೊತ್ತೆ, ಅನಿ ತೆಚಿ ರುಚ್ ಮ್ಹಾಂವ್ ಮಿಸಳಲ್ಲ್ಯಾ ಪೊಳ್ಯಾಂಚ್ಯಾ ಸಾರ್ಕೆ ರುಚಿ ಹೊತ್ತಿ. 32 ಮೊಯ್ಜೆನ್ ಲೊಕಾಕ್ನಿ, "ಸರ್ವೆಸ್ಪರ್ ಹ್ಯಾ ವಿಶಯಾತ್ ಹುಕುಮ್ ದಿತಲೆ ಕಾಯ್ ಮಟ್ಲ್ಯಾರ್, ಮಿಯಾ ಇಜಿಪ್ತ್ ದೆಸಾತ್ನಾ ತುಮ್ಕಾ ಭಾಯ್ರ್ ಹಾನಲ್ಲ್ಯಾ ತನ್ನಾ ಡಂಗ್ಳಿತ್ ಖಾವ್ಕ್ ದಿಲ್ಲೆ ಜೆವಾನ್ ತುಮ್ಚಾ ತುಮ್ಚ್ಯಾ ಪಿಳ್ಗಿಚೆ ಲೊಕಾ ಬಗಿ ಸಾರ್ಕೆ ತೆಂಚ್ಯಾ ಸಾಟ್ನಿ ಎಕ್ಲೊ ಖಾತಲೆ ತವ್ಡೆ ಮನ್ನಾ ಥವ್ನ್ ಘೆವ್ಚೆ" ಮಟ್ಲ್ಯಾನ್. 33 ಮೊಯ್ಜೆನ್ ಆರೊನಾಕ್, "ತಿಯಾ ಎಕ್ ಆಯ್ದಾನ್ ಘೆವ್ನ್ ಎಕ್ಲೊ ಖಾತಲೆ ತವ್ಡೆ ಮನ್ನಾ ತ್ಯಾತುರ್ ಭರುನ್ ತುಮ್ಚ್ಯಾ ಪಿಗ್ಳಿಚ್ಯಾಕ್ನಿ ಬಗುಕ್ ಸಾಟ್ನಿ ಮನುನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಥವ್" ಮಟ್ಲ್ಯಾನ್. 34 ಸರ್ವೆಸ್ಪರಾನ್ ಮೊಯ್ಜೆಕ್ ಹುಕುಮ್ ದಿಲ್ಲ್ಯಾ ಸಾರ್ಕೆಚ್ ಆರೊನಾನ್ ತೆ ಮನ್ನಾ ಕರಾರಾಚ್ಯಾ ಪೆಟಿಚ್ಯಾ ಫಿಡೆ ಥವ್ಲ್ಯಾನ್. 35 ಇಜ್ರಾಯೆಲ್ ಲೊಕಾನಿ ವಸ್ತಿ ರ್‍ಹಾತಲ್ಯಾ ದೆಶ್ಯಾಕ್ ಯೆವ್ನ್ ಪಾವಿ ಪಾತರ್ ಚಾಳಿಸ್ ವರಿಸ್ ತೆ ಮನ್ನಾ ಖಾಲ್ಯಾನಿ, ಕಾನಾನ್ ದೆಶ್ಯಾತ್ ರ್‍ಹಾತಲ್ಯಾ ಜಾಗ್ಯಾಕ್ ಯೆವ್ನ್ ಪಾವಿ ಪಾತರ್ಬಿ ತೆ ಮನ್ನಾಚ್ ಖಾಲ್ಯಾನಿ. 36 ಗೊಮೆರ್ ಮನ್ಲ್ಯಾರ್ ಎಫಾತ್*16:36 ಎಫಾತ್ ಮಟ್ಲ್ಯಾರ್, ಲೈ ಕರುನ್ ತಿಸ್ ಸೆರ್. ಧಾತ್ಲೊ ಎಕ್ ವಾಟೊ.