Êxodo 2

ಮೊಯ್ಜೆ ಉಪಾಜ್ತಲೆ

1 ಮಾನಾ ಲೆವಿಚ್ಯಾ ಘರಾನಾಚ್ಯಾ ಎಕ್ಲ್ಯಾನ್ ಲೆವಿ ಕುಳಿಚ್ಯಾ ಚೆಡ್ವಾಕ್ ಲಗಿನ್ ಕರುನ್ಗೆಟ್ಲ್ಯಾನ್. 2 ಅನಿ ತಿ ಬಾಯ್ಕೊ ಮಾನುಸ್ ಗರ್‍ವಾರ್ ರಾವ್ನ್ ತಿಕಾ ಎಕ್ ಝಿಲ್ಗೊ ಉಪಜ್ಲೊ, ಅನಿ ತೊ ಬಗುಕ್ ಲೈ ಸುಂದರ್ ಹೊತ್ತೊ, ತನ್ನಾ ತೆಕಾ ತಿನ್ ಮೈನೆ ನಿಪ್ವುನ್ ಥವ್ಲ್ಯಾನಿ. 3 ತೆಕಾ ಅನಿ ಲೈ ನಿಪ್ವುನ್ ಥವ್ಕ್ ಹೊಯ್ನಾ ಹೊತಾನಾ, ಎಕ್ ಬೆತ್ತಾಚಿ ಪೆಟಿ ಘೆವ್ನ್, ತೆಕಾ ಡಾಂಬರ್ ಲಾವ್ನ್ ಬಾಳ್ಸ್ಯಾಕ್ ತ್ಯಾತುರ್ ಥವ್ನ್ ನೈಲ್ ನ್ಹಯ್ಚ್ಯಾ ದಂಡೆಕ್ ಲಾಗುನ್ ಹೊತ್ತ್ಯಾ ಗವ್ತಾ ವರ್‍ತಿ ಥವ್ಲ್ಯಾನಿ. 4 ಬಾಳ್ಸ್ಯಾಕ್ ಕಾಯ್ ಹೊತಾಕಿ ಮನುನ್ ಬಗುಕ್ ತೆಚಿ ಅಕ್ಕಾ ಧುರ್ ಇಬೆ ಹೊತ್ತಿ.

5 ತನ್ನಾ ಫಾರೊವ್ ರಾಜಾಚಿ ಲೆಕ್ ನೈಲ್ ನ್ಹಯ್ತ್ ಪಾನಿ ನ್ಹಾವ್ಕ್ ಯೆಲಿ, ತಿಜಿ ಸೆವಕಿಯಾ ನ್ಹಯ್ಚ್ಯಾ ದಂಡೆಕ್ ಫಿರುನ್ಗೆತ್ ಹೊತ್ತಿ, ತನ್ನಾ ಫಾರೊವ್ ರಾಜಾಚ್ಯಾ ಲೆಕಿಕ್ ತಿ ಪೆಟಿ ಗವ್ತಾರ್ ಹೊತ್ತಿ ದಿಸ್ತಾ, ಅನಿ ತಿನಿ ಅಪ್ಲ್ಯಾ ಸೆವಕಿಕ್ ಧಾಡುನ್ ತಿ ಪೆಟಿ ಹಾನುಕ್ ಲಾವ್ಲಿನ್. 6 ತಿ ಪೆಟಿ ಉಗ್ಡುನ್ ಬಗ್ತಾನಾ, ಎಕ್ ಬಾಳ್ಸೆ ರಡಿತ್ ಹೊತ್ತೆ, ತಿಕಾ ತ್ಯಾ ಬಾಳ್ಸ್ಯಾ ವರ್‍ತಿ ಕಾಳ್ಜಿ ಯೆಲಿ, ತಿನಿ "ಹೆ ಬಾಳ್ಸೆ ಇಬ್ರಿಯಾ ಲೊಕಾಂಚೆ ಹೊವ್ಕ್ ಫಿರೆ" ಮಟ್ಲಿನ್.

7 ತನ್ನಾ ತೆಚ್ಯಾ ಅಕ್ಕಾನ್ ಯೆವ್ನ್, ಫಾರೊವ್ ರಾಜಾಚ್ಯಾ ಲೆಕಿಕ್, "ಮಿಯಾ ಜಾವ್ನ್ ಹ್ಯಾ ಬಾಳ್ಸ್ಯಾಕ್ ದುದ್ ಫಿವ್ಸುಕ್ ಎಕ್ ಇಬ್ರಿಯಾಂಚಿ ಬಾಯ್ಕೊ ಮಾನುಸ್ ಹಾನು ಕಾಯ್?" ಮಟ್ಲಿನ್.

8 ಫಾರೊವ್ ರಾಜಾಚ್ಯಾ ಲೆಕಿನ್, "ಜಾ ಅನಿ ಘೆವ್ನ್ ಯೆ" ಮಟ್ಲಿನ್, ತನ್ನಾ ತ್ಯಾ ಚೆಡ್ವಾನ್ ಜಾವ್ನ್ ತ್ಯಾ ಬಾಳ್ಸ್ಯಾಚ್ಯಾ ಅವ್ಸಿಕುಚ್ ಬಲ್ವುನ್ ಹಾನ್ಲಿನ್. 9 ಫಾರೊವ್ ರಾಜಾಚ್ಯಾ ಲೆಕಿನ್, ತ್ಯಾ ಬಾಯ್ಕೊ ಮಾನ್ಸಿಕ್ "ಹ್ಯಾ ಬಾಳ್ಸ್ಯಾಕ್ ನ್ಹೆವ್ನ್ ಮಾಜ್ಯಾ ಸಾಟ್ನಿ ದುದ್ ದಿವ್ನ್ ಬಾಳಗ್, ಮಿಯಾ ತುಕಾ ಮಜುರಿ ದಿತಾ," ಮಟ್ಲಿನ್, ತ್ಯಾ ಬಾಯ್ಕೊ ಮಾನ್ಸಿನ್ ತ್ಯಾ ಬಾಳ್ಸ್ಯಾಕ್ ನ್ಹೆವ್ನ್ ಅಪ್ಲೆ ದುದ್ ದಿವ್ನ್ ಬಾಳಗ್ಲಿನ್. 10 ತೊ ಝಿಲ್ಗೊ ಮೊಟೊ ಹೊಲೊ ತಿನಿ ತೆಕಾ ಫೊರಾವ್ ರಾಜಾಚ್ಯಾ ಲೆಕಿಕ್ಡೆ ಹಾನುನ್ ದಿಲಿನ್, ತನ್ನಾ ರಾಜಾಚ್ಯಾ ಲೆಕಿನ್ ತೆಕಾ ಅಪ್ಲ್ಯಾ ಲೆಕಾ ಸಾರ್ಕೆ ಬಾಳಗ್ಲಿನ್, ಅನಿ "ಹೆಕಾ ಮಿಯಾ ಪಾನಿಯಾತ್ನಾ ವೈರ್ ಕಾಡ್ಲಾ," ಮನುನ್, ತೆಕಾ "ಮೊಯ್ಜೆ"*2:10 ಮೊಯ್ಜೆ, ಮಟ್ಲ್ಯಾರ್ ಪಾನಿಯಾತ್ನಾ ವರ್‍ತಿ ಕಾಡುನ್ ಹೊಲ್ಲೊ. ಮನುನ್ ನಾವ್ ಥವ್ಲಿನ್.

ಮೊಯ್ಜೆ ಮಿದ್ಯಾನಾಕ್ ಪಳುನ್ ಜಾತಲೆ

11 ಮೊಯ್ಜೆ ಮೊಟೊ ಹೊಲೊ, ಎಕ್ ದಿಸಿ ತೊ ಅಪ್ಲ್ಯಾ ಸ್ವತ್ಯಾಚ್ಯಾ ಹೆಬ್ರೊವಾಚ್ಯಾ ಭಾವಾಕ್ನಿ ಭೆಟುಕ್ ಜಾವ್ನ್, ತೆನಿ ತರಾಸಾನ್ ಕಾಮಾ ಕರುಕ್ ವಾಪ್ರುನ್ ಹೊವ್ಲಾ ಮನುನ್ ಬಗ್ಲ್ಯಾನ್, ಅನಿ ಎಕ್ ಇಜಿಪ್ತಾತ್ಲೊ ಮಾನುಸ್, ಅಪ್ನಾಚ್ಯಾ ಸ್ವತ್ಯಾಚ್ಯಾ ಲೊಕಾಂತ್ಲ್ಯಾ ಹೆಬ್ರೊವಾಕ್ ಜಿವ್ ಕಾಡುಕ್ ಲಾಗಲೆ ಬಗಟ್ಲ್ಯಾನ್. 12 ತೆನಿ ಅಜುಭಾಜುಕ್ ಬಗುನ್, ಕೊನ್ಬಿ ನಾ ಮನುನ್ ಕಳ್ವುನ್, ಘೆವ್ನ್ ತ್ಯಾ ಇಜಿಪ್ತಾಚ್ಯಾ ಮಾನ್ಸಾಕ್ ಜಿವ್ ಕಾಡುನ್ ರೆತಿತ್ ಪುರ್ಲ್ಯಾನ್. 13 ದುಸ್ರೆಂದಿಸಿ ತೊ ಅನಿಬಿ ಫಿರುಕ್ ಗೆಲ್ಲ್ಯಾ ತನ್ನಾ, ಹೆಬ್ರೊವಾಂಚಿ ದೊನ್ ಮಾನ್ಸಾ ಝಗ್ಡೆ ಕರಿತ್ ಹೊತ್ತ್ಯಾನಿ, ಚುಕ್ ಕರಲ್ಲ್ಯಾ ಮಾನ್ಸಾಕ್ ಮೊಯ್ಜೆನ್, "ಕಶ್ಯಾಕ್ ತಿಯಾ ಅಮ್ಚ್ಯಾ ಇಬ್ರಿಯಾಕ್ ಮಾರ್ತೈಯ್?" ಮಟ್ಲ್ಯಾನ್.

14 ತೆಕಾ ತ್ಯಾ ಮಾನ್ಸಾನ್, "ಕೊನ್ ತುಕಾ ಅಮ್ಚ್ಯಾ ವರ್‍ತಿ ಧನಿ ಅನಿ ಝಡ್ತಿ ಕರ್ತಲೊ ಮನುನ್ ನೆಮ್ಲಾತ್? ತ್ಯಾ ಇಜಿಪ್ತಾಚ್ಯಾ ಮಾನ್ಸಾಕ್ ಜಿವ್ ಕಾಡ್ಲೆ ಸಾರ್ಕೆ ಮಾಕಾಬಿ ಜಿವ್ ಕಾಡುಚೆ ಮನುನ್ ಕರ್‍ಲೆ ಕಾಯ್?" ಮಟ್ಲ್ಯಾನ್, ತನ್ನಾ ಮೊಯ್ಜೆ ಖರೆಚ್ಬಿ ಹೆ ಕಾಮ್ ಸಗ್ಳ್ಯಾಕ್ನಿ ಕಳುನ್ ಯೆಲೆ ಮನುನ್ ಭಿಂಯಾಲೊ. 15 ಫಾರೊವ್ ರಾಜಾಕ್ ಹಿ ಖಬರ್ ಕಳಲ್ಲ್ಯಾ ತನ್ನಾ, ತೆನಿ ಮೊಯ್ಜೆಕ್ ಜಿವ್ ಕಾಡ್ಸುಚೆ ಮನುನ್ಗೆವ್ನ್ ಹೊತ್ತೊ, ತನ್ನಾ ಮೊಯ್ಜೆ ಫಾರೊವ್ ರಾಜಾಕ್ನಾ ಪಳುನ್ ಜಾವ್ನ್, ಮಿದ್ಯಾನ್ ದೆಶ್ಯಾತ್ ಎಕ್ ಭಾಂಯಿಚ್ಯಾ ಜಗ್ಗೊಳ್ ಬಸ್ಲೊ. 16 ಮಿದ್ಯಾನಾಚ್ಯಾ ಯಾಜಕಾಕ್ ಸಾತ್ ಲೆಕಿಯಾ ಹೊತ್ತಿ, ಅನಿ ತೆನಿ ಭಾಂಯಿಕ್ಡೆ ಯೆವ್ನ್ ಅಪ್ಲ್ಯಾ ಬಾಬಾಚ್ಯಾ ಶೆಳಿಯಾಕ್ನಿ ಪಾನಿ ಪಾಜ್ವುಕ್ ಸಾಟ್ನಿ ಪಾನಿ ಕಾಡುನ್ ಡೊನ್ಯಾತ್ನಿ ಭರುಕ್ಲಾಗಲೆ. 17 ಖರೆ ಬಕ್ರಿ ರಾಕ್ತಲ್ಯಾನಿ ಯೆವ್ನ್ ತೆಂಕಾ ಪಳ್ಸುನ್ ಘಾಟ್ಲ್ಯಾನಿ, ತನ್ನಾ ಮೊಯ್ಜೆ ಜಾವ್ನ್ ತೆಂಕಾ ಮಜ್ಜತ್ ಕರುನ್ ತೆಂಚ್ಯಾ ಶೆಳಿಯಾಕ್ನಿ ಪಾನಿ ಪಾಜ್ವುಲ್ಯಾನ್. 18 ತೆನಿ ಅಪ್ಲೊ ಬಾಬಾ ರೆವುಯೆಲಾಚ್ಯಾ ಜಗ್ಗೊಳ್ ಯೆಲ್ಲ್ಯಾ ತನ್ನಾ, ತೆನಿ ತೆಂಕಾ, "ತುಮಿ ಆಜ್ ಕಶ್ಯಾಕ್ ಯೆವ್ಡ್ಯಾ ಲಗ್ಗುನಾ ಯೆಲ್ಯಾಸಿ?" ಮನುನ್ ಇಚಾರ್‍ಲ್ಯಾನಿ. 19 ತೆನಿ ತನ್ನಾ "ಇಜಿಪ್ತಾಚ್ಯಾ ಎಕ್ ಮಾನ್ಸಾನ್ ಬಕ್ರಿ ರಾಕ್ತಲ್ಯಾಂಚ್ಯಾಕ್ನಾ ಅಮ್ಕಾ ರಾಕುನ್, ಅಮ್ಚ್ಯಾ ಸಾಟ್ನಿ ಪಾನಿ ಕಾಡುನ್ ಶೆಳಿಯಾಕ್ನಿ ಪಾಜ್ವುಲ್ಯಾನ್" ಮಟ್ಲ್ಯಾನಿ.

20 ತನ್ನಾ ತೆನಿ ಅಪ್ಲ್ಯಾ ಲೆಕಿಯಾಕ್ನಿ, "ತೊ ಮಾನುಸ್ ಖೈ ಹಾಯ್? ತೆಕಾ ಕಶ್ಯಾಕ್ ಸೊಡುನ್ ಯೆಲ್ಯಾಸಿ? ತೆಕಾ ಬಲ್ವಾ, ತೊ ಅಮ್ಚ್ಯಾ ವಾಂಗ್ಡಾ ಜೆವಾನ್ ಕರುಂದಿತ್," ಮಟ್ಲ್ಯಾನ್.

21 ಅಸೆ ಮೊಯ್ಜೆನ್ ತ್ಯಾ ಮಾನ್ಸಾಚ್ಯಾ ಘರ್‍ಹಾತ್ ರಾವ್ಕ್ ನಿರ್ದಾರ್ ಕರ್ಲ್ಯಾನ್, ಅನಿ ತೆನಿ ಅಪ್ಲಿ ಲೆಕ್ ಜಿಪ್ಪೊರಾ ಮನ್ತಲಿಕ್ ಮೊಯ್ಜೆಕ್ ದಿವ್ನ್ ಲಗಿನ್ ಕರ್ಲ್ಯಾನ್. 22 ತಿಕಾ ಎಕ್ ಝಿಲ್ಗೊ ಉಪಜ್ಲೊ ಅನಿ ತೆನಿ ತೆಕಾ ಗೆರ್ಶೊಮ್*2:22 ಗೆರ್ಶೊಮ್, ಮಟ್ಲ್ಯಾರ್, ಪರ್ವಾಸಿ ಮನುನ್ ನಾವ್ ಥವ್ಲ್ಯಾನ್, ಕಶ್ಯಾಕ್ ಮಟ್ಲ್ಯಾರ್, "ಮಿಯಾ ದುಶ್ರ್ಯಾ ದೆಶ್ಯಾತ್ ಎಕ್ ಪರ್ದೆಶಿ ಹೊವ್ನ್ ಹಾಯ್" ಮಟ್ಲ್ಯಾನ್.

23 ಅಸೆ ಹೊವ್ನ್ ಲೈ ದಿಸಾ ಕಳದ್ಲ್ಯಾಮಾನಾ ಇಜಿಪ್ತಾಚೊ ರಾಜಾ ಮರ್ಲೊ, ಖರೆ ಇಜ್ರಾಯೆಲ್ ಲೊಕಾ ಅನಿಬಿ ಗುಲಾಮ್ ಪಾನಾತ್ ವಳ್ವಳುಲಾಗಲಿ, ತೆನಿ ಅಪ್ನಾಕ್ನಿ ಆದಾರ್ ಪಾಜೆ ಮನುನ್ ಬೊಬ್ ಮಾರ್ಲ್ಯಾನಿ, ತಿ ಬೊಬ್ ದೆವಾಕ್ಡೆ ಪಾವ್ಲಿ. 24 ದೆವಾನ್ ತಿ ಬೊಬ್ ಆಯಿಕ್ಲ್ಯಾನ್, ಅನಿ ಅಪ್ನಿ ಅಬ್ರಾಹಾಮ್, ಇಸಾಕ್ ಅನಿ ಜಾಕೊಬಾಕ್ಡೆ ಕರಲ್ಲೊ ಕರಾರ್ ಯಾದೆಕ್ ಹಾನುನ್ ಘೆಟ್ಲ್ಯಾನ್. 25 ತನ್ನಾ ದೆವಾನ್ ಇಜ್ರಾಯೆಲ್‌ ಲೊಕಾಕ್ನಿ ಬಗುನ್ ತೆಂಕಾ ದಯಾ ದಾಕ್ವುಲ್ಯಾನ್.