1 ತೆನಿ ಮಾಜಿ ಯಾಜಕಾ ಹೊವ್ಕ್ ತೆಂಕಾ ಎಚುಕ್ ತಿಯಾ ಕರುಚೆ ಹೊಲ್ಲೆ ಕಾಮ್ ಕಾಯ್ ಮಟ್ಲ್ಯಾರ್, ಎಕ್ ಬೈಲಾಚೊ ಪಾಡೊ ಅನಿ ದೊಶ್ ನತ್ತಿ ಟಗರಾ ಘೆವ್ಚಿ. 2 ಅನಿ ಫುಗ್ ನಸಲ್ಲಿ ಭಾಕ್ರಿಯಾ, ತೆಲ್ ಮಿಳ್ವಲ್ಲಿ ಫುಗ್ ನಸಲ್ಲಿ ಹೊಳ್ಗಿಯಾ, ಅನಿ ಘಂವಾಚ್ಯಾ ಪಿಟ್ಟಾಚಿ ತೆಲ್ ಮಿಳ್ವಲ್ಲಿ ಫುಗ್ ನಸಲ್ಲಿ ಕಡ್ಮಾ ಕರುನ್ ಎಕುಚ್ ಭುಟ್ಟಿತ್ ಭರುನ್ ಘೆವ್ಚೆ. 3 ತೆಜ್ಯಾ ಮಾನಾ ತಿ ಭುಟ್ಟಿ, ಅನಿ ಬೈಲಾಚೊ ಪಾಡೊ ಅನಿ ಟಗರಾ ಹಾನುನ್ ಥವ್ಚೆ. 4 ತನ್ನಾ ಆರೊನಾಕ್ ಅನಿ ತೆಜ್ಯಾ ಲೆಕಾಕ್ನಿ ದೆವಾಕ್ ಬಗ್ತಲ್ಯಾ ಬಿಡಾರಾಚ್ಯಾ ದಾರಾಚ್ಯಾ ಜಗ್ಗೊಳ್ ಬಲ್ವುನ್ ಹಾನುನ್ ಪಾನಿಯಾನ್ ನಾವ್ಸುನ್, 5 ತೊ ಲಾಂಬ್ಲೊ ಝಗೊ ಅನಿ ಕವ್ಚಿಚ್ಯಾ ವಾಂಗ್ಡಾ ನೆಸ್ತಲಿ ವೈಲಿ ಅಂಗಿ ಅನಿ ಕವ್ಚಿ ಅನಿ ಸೊನ್ಯಾಚೊ ಪದಕ್ ಆರೊನಾಕ್ ನೆಸ್ವುನ್, ಚಮತ್ಕಾರಾಚೊ ಕಂಬ್ರೆಚೊ ಪಟ್ಟೊ ಭಾಂದುನ್, 6 ತೆಜ್ಯಾ ಟಕ್ಲ್ಯಾಕ್ ಪಾವ್ಡೊ ಭಾಂದುನ್, ಪಾವ್ಡಾ ವರ್‍ತಿ ದೆವಾಕ್ ನೆಮ್ಸುನ್ ಥವಲ್ಲೊ ನಿತಳ್ ಪಟ್ಟೊ ಭಾಂದ್ವುನ್, 7 ಅಭಿಶೆಕಾಚೆ ತೆಲ್ ತೆಜ್ಯಾ ಟಕ್ಲ್ಯಾ ವರ್‍ತಿ ವೊತುನ್ ಅಭಿಶೆಕ್ ಕರುಚೆ.

8 ತೆಜ್ಯಾ ಮಾನಾ ತೆಜ್ಯಾ ಲೆಕಾಕ್ನಿಬಿ ಜಗ್ಗೊಳ್ ಬಲ್ವುನ್ ತೆಂಕಾಬಿ ಲಾಂಬ್ಲೆ ಝಗೆ ನೆಸ್ವುಚೆ. 9 ಆರೊನಾಕ್ ಅನಿ ತೆಜ್ಯಾ ಲೆಕಾಕ್ನಿ ಕಂಬ್ರೆಚೆ ಪಟ್ಟೆ ಭಾಂದುನ್, ಪಾವ್ಡೆ ಭಾಂದ್ವುಚೆ. ತೆಂಕಾ ತೆಜ್ಯಾ ಮಾನಾ ಸದಾ ಸರ್ವತಾಚೊ ನೆಮ್ ಹೊವ್ನ್ ಯಾಜಕ್ ಪಾನ್ ಯೆತಾ, ಅಸೆ ಆರೊನಾಕ್ ಅನಿ ತೆಜ್ಯಾ ಲೆಕಾಕ್ನಿ ಯಾಜಕಾಚ್ಯಾ ಕಾಮಾಕ್ ನೆಮ್ಸುಚೆ.

10 ತೆಜ್ಯಾ ಮಾನಾ ತಿಯಾ ತ್ಯಾ ಪಾಡ್ಯಾಕ್ ದೆವಾಕ್ ಬಗ್ತಲ್ಯಾ ಬಿಡಾರಾಕ್ಡೆ ಹಾನುನ್, ಆರೊನಾನ್ ಅನಿ ತೆಜ್ಯಾ ಲೆಕಾನಿ ತೆಜ್ಯಾ ವರ್‍ತಿ ಹಾತ್ ಥವ್ಲ್ಯಾ ಮಾನಾ, 11 ತ್ಯಾ ಪಾಡ್ಯಾಕ್ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ಇದ್ರಾಕ್ ತಿಯಾ ಬಲಿ ಭೆಟ್ವುಚೆ. 12 ತ್ಯಾ ಪಾಡ್ಯಾಚ್ಯಾ ರಗ್ತಾತ್ಲೆ ಉಲ್ಲೆ ಘೆವ್ನ್, ಹಾತಿಚ್ಯಾ ಬೊಟಾನಿ ಬಲಿಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ಸಿಂಗಾಕ್ನಿ ಲಾವ್ನ್, ಹುರಲ್ಲೆ ರಗಾತ್ ಬಲಿಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ಮುಳಾಕ್ ವೊತುಚೆ. 13 ಭುತ್ತುರ್ಲಿ ಭಾಗಾ, ಅನಿ ಕಾಳಿಂಜ್, ದೊನಿ ಕಿಡ್ನಿಯಾ ಅನಿ ತೆಂಚ್ಯಾ ವರ್‍ತಿ ಹೊತ್ತೆ ಮಾಂದೆ ಘೆವ್ನ್ ಬಲಿಭೆಟ್ವುತಲ್ಯಾ ಕಟ್ಟ್ಯಾ ವರ್‍ತಿ ಜಾಳ್ವುಚೆ. 14 ಪಾಡ್ಯಾಚೆ ಮಾಸ್ ಅನಿ ಚಮ್ಡೆ ಅನಿ ಆಂತ್ಡಾ, ಗಾಂವ್ಚ್ಯಾ ಭಾಯ್ರ್ ನೆವ್ನ್ ಆಗಿನ್ ಜಾಳ್ವುಚೆ, ಹಿ ಪಾಪ್ ಪರಿಹಾರಾಚಿ ಬಲಿ ಹೊವ್ನ್ ಹಾಯ್.

15 ತೆಜ್ಯಾ ಮಾನಾ ತಿಯಾ ತ್ಯಾ ಟಗರಾಂತ್ಲೆ ಎಕ್ ಘೆವ್ನ್ ಆರೊನಾನ್ ಅನಿ ತೆಜ್ಯಾ ಲೆಕಾನಿ ತೆಚೆ ವರ್‍ತಿ ಹಾತಾ ಥವ್ಲ್ಯಾ ಮಾನಾ, 16 ತೆಕಾ ತಿಯಾ ಬಲಿ ಭೆಟ್ವುನ್ ತೆಚೆ ರಗಾತ್ ಬಲಿಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ಚಾರಿ ಮುಲ್ಲ್ಯಾಕ್ನಿ ವೊತುಚೆ. 17 ತನ್ನಾ ತಿಯಾ ತೆ ಟಗರ್ ಕಾಪುನ್ ತೆಚಿ ಅಂತ್ಡಾ ಅನಿ ಪಾಂಯಾ ಧುವ್ನ್ ಟಕ್ಲ್ಯಾಚ್ಯಾ ವಾಂಗ್ಡಾ ಥವ್ನ್, 18 ತೆ ಸಗ್ಳೆ ಬಲಿಭೆಟ್ವುತಲ್ಯಾ ಕಟ್ಟ್ಯಾರ್, ಸರ್ವೆಸ್ಪರಾಕ್ ಫುರಾ ಆಂಗ್ ಬಲಿ ಕರುನ್ ಭೆಟ್ವುಚೆ, ಹೆ ಸರ್ವೆಸ್ಪರಾಕ್ ಬರ್ಯಾ ವಾಸೆಚಿ ಬಲಿ ಹೊವ್ನ್ ಹಾಯ್.

19 ತೆಜ್ಯಾ ಮಾನಾ ತಿಯಾ ದೊನ್ವೆಚೆ ಟಗರ್ ಘೆವ್ನ್ ಆರೊನಾನ್ ಅನಿ ತೆಜ್ಯಾ ಲೆಕಾನಿ ತೆಜ್ಯಾ ವರ್‍ತಿ ಹಾತಾ ಥವ್ಲ್ಯಾ ಮಾನಾ, 20 ತಿಯಾ ತೆ ಟಗರ್ ಮಾರುನ್ ತೆಜ್ಯಾ ರಗ್ತಾತ್ ಉಲ್ಲೆ ಆರೊನಾಚ್ಯಾ ಅನಿ ತೆಜ್ಯಾ ಲೆಕಾಂಚ್ಯಾ ಉಜ್ವ್ಯಾಭಾಜುಚ್ಯಾ ಕಾನಾಂಚ್ಯಾ ತುದಿಕ್ನಿ ಅನಿ ಉಜ್ವ್ಯಾ ಹಾತಿಚ್ಯಾ ಥೊರ್ಲ್ಯಾ ಬೊಟಾಕ್ನಿ ಅನಿ ಉಜ್ವ್ಯಾ ಪಾಂಯಾಚ್ಯಾ ಥೊರ್ಲ್ಯಾ ಬೊಟಾಕ್ಬಿ ಲಾವ್ನ್, ಹುರಲ್ಲೆ ರಗಾತ್ ಬಲಿ ಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ಚಾರಿ ಮುಲ್ಲ್ಯಾಕ್ನಿ ವೊತುಚೆ. 21 ತವ್ಡೆಚ್ ನಸ್ತಾನಾ ತಿಯಾ ಬಲಿಭೆಟ್ವುತಲ್ಯಾ ಕಟ್ಟ್ಯಾಚ್ಯಾ ವೈಲ್ಯಾ ರಗ್ತಾತ್ ಅನಿ ಅಭಿಶೆಕಾಚ್ಯಾ ತೆಲಾತ್ ಉಲ್ಲೆ ಕಾಡುನ್ಗೆವ್ನ್ ಆರೊನ್ ಅನಿ ತೆಜ್ಯಾ ಕಪ್ಡ್ಯಾ ವೈನಿ ಅನಿ ತೆಜ್ಯಾ ಲೆಕಾಂಚ್ಯಾ ಕಪ್ಡ್ಯಾ ವೈನಿ ಸಿಪ್ಡುಚೆ, ಅಸೆ ತೊ ಅನಿ ತೆಚಿ ಪೊರಾ ಕಪ್ಡ್ಯಾಂಚ್ಯಾ ವಾಂಗ್ಡಾ ನಿತಳ್ ಹೊತಾತ್.

22 ಮಾನಾ ಪಟ್ಟಾಭಿಶೆಕಾಕ್ ಭೆಟ್ವಲ್ಲ್ಯಾ ಟಗರಾಚೆ ಮಾಂದೆ, ಸೆಪ್ಡಿಚೆ ಮಾಂದೆ ಅನಿ ಕಾಳಿಂಜಿ ವೈಲೆ ಮಾಂದೆ, ಅನಿ ದೊನಿ ಕಿಡ್ನಿಯಾ ಅನಿ ತೆಂಚ್ಯಾ ವೈಲೆ ಮಾಂದೆ, 23 ಉಜ್ವಿ ಜಾಂಗ್ ಅನಿ ಸರ್ವೆಸ್ಪರಾಚ್ಯಾ ಇದ್ರಾಕ್ ಬುಟ್ಟಿತ್ ಥವಲ್ಲಿ ಫುಗ್ ನಸಲ್ಲಿ ಸಾಮಾನಾ ಅನಿ ಎಕ್ ಬಾರಿಕ್ಲಿ, ತೆಲ್ ಮಿಸಳಲ್ಲಿ ಎಕ್ ಹೊಳ್ಗಿ ಅನಿ ಎಕ್ ಕಡಂ ಘೆವ್ನ್, 24 ತೆ ಸಗ್ಳೆ ಆರೊನ್ ಅನಿ ತೆಜ್ಯಾ ಲೆಕಾಂಚ್ಯಾ ಹಾತಿತ್ ದಿವ್ನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಉವ್ವಾಳುಚೆ. 25 ಮಾನಾ ತೆ ತೆಂಚ್ಯಾ ಹಾತಿತ್ನಾ ಕಾಡುನ್ಗೆವ್ನ್ ಬಿಲಿ ಕಟ್ಟ್ಯಾಚ್ಯಾ ವರ್‍ತಿ ಸಗ್ಳೆ ಆಂಗ್ ಬಲಿಚ್ಯಾ ವಾಂಗ್ಡಾ ಸರ್ವೆಸ್ಪರಾಕ್ ಜಾಳ್ವುತಲಿ ಬಲಿ ಭೆಟ್ವುಚೆ, ಸರ್ವೆಸ್ಪರಾಕ್ ತೆ ಬರ್ಯಾ ವಾಸೆಚಿ ಬಲಿ ಹೊವ್ನ್ ಹಾಯ್.

26 ಅನಿ ಆರೊನಾಚ್ಯಾ ಪಟ್ಟಾಬಿಶೆಕಾಕ್ ಭೆಟ್ವಲ್ಲ್ಯಾ ಟಗರಾಚ್ಯಾ ಛಾತಿಚೊ ಭಾಗ್ ಘೆವ್ನ್ ಕರುನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಉವ್ವಾಳುಚೆ. ತುಕಾ ಪಾವುಚೊ ಹೊಲ್ಲೊ ವಾಟೊ ತೊಚ್ ಹೊವ್ನ್ ಹಾಯ್. 27 ಆರೊನಾಕ್ ಅನಿ ತೆಜ್ಯಾ ಲೆಕಾಕ್ನಿ ಬಲಿಚಿ ದಿಕ್ಷಾ ದಿತಾನಾ, ಭೆಟ್ವಲ್ಲ್ಯಾ ಟಗರಾಚ್ಯಾ ಮಾಂಸಾತ್, ಉವ್ವಾಳಲ್ಲ್ಯಾ ಛಾತಿಚೊ ಭಾಗ್ ಯಾಜಕಾಂಚ್ಯಾ ವಾಟ್ಯಾಕ್ ಎಗ್ಳುನ್ ಥವಲ್ಲ್ಯಾ ಜಾಂಗೆಕ್ ದೆವಾಚೆ ಕರುನ್ ನೆಮುಚೆ. 28 ತೆ ಆರೊನಾಕ್ ಅನಿ ತೆಜ್ಯಾ ಪಿಳ್ಗಿಚ್ಯಾಕ್ನಿ ಸದಾ ಸರ್ವತಾಚೊ ನೆಮ್ ಕರುನ್ ದಿವ್ಚೆ, ತೆ ಯಾಜಕಾಂಚ್ಯಾ ವಾಟ್ಯಾಕ್ ನೆಮುನ್ ಹೊಲ್ಲೆ ಹಾಯ್, ಇಜ್ರಾಯೆಲ್ ಲೊಕಾನಿ ಸಮಾಧಾನಾಚಿ ಬಲಿ ಕರುನ್ ಜನಾವರಾ ಭೆಟ್ವುತಾನಾ ತೊ ಭಾಗ್ ಯಾಜಕಾಂಚ್ಯಾ ಸಾಟ್ನಿ ಎಗ್ಳುನ್ ಥವ್ಚೆ.

29 ಆರೊನಾಚ್ಯಾ ಮಾನಾ ತೆಜ್ಯಾ ಲೆಕಾಕ್ನಿಬಿ ತೆಚೆ ಯಾಜಕಾಚೆ ಕಪ್ಡೆಚ್ ವಾಪ್ರುಚೆ, ತೆನಿ ಪಟ್ಟಾಬಿಶೆಕ್ ಹೊವ್ನ್ ಮೊಟ್ಟ್ಯಾ ಯಾಜಕಾಚ್ಯಾ ಕಾಮಾಕ್ ನೆಮುನ್ ಯೆಲ್ಲ್ಯಾ ತನ್ನಾ ತೆ ಕಪ್ಡೆ ನೆಸುಚೆ. 30 ತೆಜ್ಯಾ ಲೆಕಾತ್ನಿ ತೆಜ್ಯಾ ಬದ್ಲಾಕ್ ಮೊಟೊಯಾಜಕ್ ಹೊವ್ನ್ ನೆಮಲ್ಲೊ ನಿತಳ್ ಜಾಗ್ಯಾರ್ ಸರ್ವೆಸ್ಪರಾಚಿ ಸೆವಾ ಕರುಕ್ ದೆವಾಕ್ ಬಗ್ತಲ್ಯಾ ಬಿಡಾರಾಚ್ಯಾ ಬಿತ್ತುರ್ ಗುಸಲ್ಲ್ಯಾಕ್ನಾ ಸಾತ್ ದಿಸಾಂಚ್ಯಾ ಪತರ್ ತೆಚ್ ಕಪ್ಡೆ ನೆಸುನ್ಗೆವ್ನ್ ರಾವ್ಚೆ.

31 ಆರೊನಾಚ್ಯಾ ಅಬಿಶೆಕಾಕ್ ಭೆಟ್ವಲ್ಲ್ಯಾ ಟಗರಾಚೆ ಮಾಂಸ್ ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ಸುರಾತುಚ್ ಸಿಜ್ವುಚೆ. 32 ಅರೊನಾನ್ ಅನಿ ತೆಜ್ಯಾ ಲೆಕಾನಿ ತ್ಯಾ ಟಗರಾಚೆ ಮಾಂಸ್ ಅನಿ ಭುಟ್ಟಿತ್ಲಿ ಭಾಕ್ರಿಯಾ ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ದಾರಾತುಚ್ ಜೆವಾನ್ ಕರುಚೆ. 33 ತೆಂಕಾ ಯಾಜಕಾಚ್ಯಾ ಕಾಮಾಕ್ ಮಿಳ್ವುಕ್ ಅನಿ ದೆವಾಚ್ಯಾ ಕಾಮಾಕ್ ನೆಮುಕ್ ಪಾಪ್ ಪರಿಹಾರ್ ಕರುಕ್ ಭೆಟ್ವಲ್ಲ್ಯಾ ಬಲಿಚೆ ಜೆವಾನುಚ್ ತೆನಿ ಜೆವ್ಚೆ ಅನಿ ಕೊನಿಬಿ ತೆ ಜೆವಾನ್ ಜೆವ್ಚೆ ನ್ಹಯ್ , ತೆ ನೆಮುನ್ ಥವಲ್ಲೆ ಜೆವಾನ್. 34 ಬಲಿ ಭೆಟ್ವಲ್ಲೆ ಜೆವಾನ್ ನಾತರ್ ಮಾಂಸ್ ಕಾಯ್ತರಿಬಿ ದುಶ್ರ್ಯಾ ದಿಸಿ ಸಕ್ಕಾಳಿ ಪತರ್ ಹೊಲ್ಲ್ಯಾರ್, ತೆ ದೆವಾಚೊ ಸಾಮಾನ್ ಹೊಲ್ಲ್ಯಾ ಸಾಟ್ನಿ ಕೊನಿಬಿ ಖಾಯ್ನಸ್ತಾನಾ ಜಾಳ್ವುಚೆ. 35 ಮಿಯಾ ತುಮ್ಕಾ ಸಾಂಗಲ್ಲ್ಯಾ ಸಾರ್ಕೆಚ್ ಸಾತ್ ದಿಸ್ ಪತರ್ ಹ್ಯೊ ನೆಮ್ ಕರುನ್ ಆರೊನಾಕ್ ಅನಿ ತೆಜ್ಯಾ ಲೆಕಾಕ್ನಿ, ಯಾಜಕ್ ಕಾಮಾಕ್ ನೆಮ್ಸುಚೆ. 36 ಹರ್ ಎಕ್ ದಿಸಾಬಿ ಪಾಪ್ ಪರಿಹಾರ್ ಸಾಟ್ನಿ ಎಕ್ ಬೈಲ್ ಭೆಟ್ವುಚೆ.

ತವ್ಡೆಚ್ ನಸ್ತಾನಾ ಬಲಿಚೊ ಕಟ್ಟೊ ನಿತಳ್ ಕರುಕ್ ಸಾಟ್ನಿ ತೆಜ್ಯಾ ವರ್‍ತಿ ಪಾಪ್ ನಿತಳ್ ಕರ್ತಲಿ ಬಲಿ ಭೆಟ್ವುನ್, ತೆ ದೆವಾಚ್ಯಾ ಸೆವಾ ಸಾಟ್ನಿ ನೆಮ್ಸುಚೆ. 37 ಅಸೆಚ್ ಬಲಿಭೆಟ್ವುತಲ್ಯಾ ಕಟ್ಟ್ಯಾ ಸಾಟ್ನಿ ಸಾತ್ ದಿಸಾಬಿ ಪಾಪ್ ಪರಿಹಾರ್ ಕರ್ತಲೊ ಸನ್ ಕರುನ್ ತೆ ಪರ್ತಿಸ್ಟೆ ಕರುಚೆ, ಬಲಿಚೊ ಕಟ್ಟೊ ನಿತಳ್ ರಾವ್ಚೊ, ಬಲಿಚ್ಯಾ ಕಟ್ಟ್ಯಾಕ್ ಲಾಗ್ತಲೆ ಸಗ್ಳೆಬಿ ನಿತಳ್ ರಾವ್ಚೆ.

38 ಹರ್ ಎಕ್ ದಿಸಿಬಿ ಬಲಿಚ್ಯಾ ಕಟ್ಟ್ಯಾರ್ ಭೆಟ್ವುಚೆ ಹೊಲ್ಲೆ ಕಾಯ್ ಮಟ್ಲ್ಯಾರ್, ಎಕ್ ವರ್ಸಾಚಿ ದೊನ್ ಬಕ್ರಿ ಸದ್ದಾಬಿ ಬಲಿ ಭೆಟ್ವುಚೆ. 39 ತ್ಯಾತುರ್ ಎಕ್ ಸಕ್ಕಾಳಿ ಅನಿ ಎಕ್ ಸಾಂಚೆಕ್ಡೆ ಬಲಿ ಭೆಟ್ವುಚೆ. 40 ಎಕ್ ಅನಿ ಅರ್ದೊ ಸೆರ್ ಒಲಿವಾಚೆ ತೆಲ್ ಅನಿ ತಿನ್ ಸೆರ್ ಘಂವಾಚೆ ಪಿಟ್ಟ್ ಮಿಳ್ವುನ್, ದಾನೆ ಭೆಟ್ವುಕ್ ಸಾಟ್ನಿ ಪೈಲೆಚ್ಯಾ ಬಕ್ರ್ಯಾ ವಾಂಗ್ಡಾ ಜಾಳ್ವುಚೆ, ಪಾನಿ ಭೆಟ್ವುಸಾಟ್ನಿ ಎಕ್ಬಿ ಅರ್ದೊ ಸೆರ್ ವಾಯ್ನ್ ಜಾಳ್ವುಚೆ. 41 ಸಾಂಜೆಕ್ಡೆ ದೊನ್ವೆಚೆ ಬಕ್ರೆ ಜಾಳ್ವುತಾನಾ, ದಿಸಾನಿ ಕರಲ್ಲ್ಯಾ ಸಾರ್ಕೆಚ್ ತೆಜ್ಯಾ ವಾಂಗ್ಡಾ ದಾನೆ ಅನಿ ವಾಯ್ನ್ ಭೆಟ್ವುಚೆ, ಸರ್ವೆಸ್ಪರಾಕ್ ತೆ ಬರ್ಯಾ ವಾಸೆಚಿ ಬಲಿ ಹೊವ್ನ್ ರ್‍ಹಾತಾ. 42 ತುಮಿ ಅನಿ ತುಮ್ಚ್ಯಾ ಪಿಳ್ಗಿಚಿ ಲೊಕಾ ಹಿ ಸಗ್ಳೆ ಅಂಗ್ ಬಲಿ ದೆವಾಕ್ ಬಗ್ತಲ್ಯಾ ಗುಡಿಚ್ಯಾ ಇದ್ರಾಕ್ ಹರ್ ಎಕ್ ದಿಸಾಬಿ ಕರುಚೆ, ಮಿಯಾ ತ್ಯಾ ಗುಡಿತ್ ತುಮ್ಕಾ ದಿಸುನ್ ತುಮ್ಚ್ಯಾ ವಾಂಗ್ಡಾ ಬೊಲ್ತಾ. 43 ಮಿಯಾ ಇಜ್ರಾಯೆಲಾಕ್ನಿ ದಿಸ್ತಲೊ ಥೈಚ್, ಮಿಯಾ ಥೈ ದಿಸ್ತಲ್ಯಾ ಪರ್ಬಾವಾ ಸಾಟ್ನಿ ತೊ ಜಾಗೊ ನಿತಳ್ ಹೊತಾ. 44 ಮಿಯಾ ದೆವಾಕ್ ಬಗ್ತಲೆ ಬಿಡಾರ್ ಅನಿ ಬಲಿಚೊ ಕಟ್ಟೊ ನಿತಳ್ ಜಾಗೊ ಕರ್ತಾ, ಆರೊನಾಕ್ ಅನಿ ತೆಜ್ಯಾ ಲೆಕಾಕ್ನಿ ಮಾಜಿ ಯಾಜಕಾ ಕರುನ್ಗೆತಾ. 45 ಮಿಯಾ ಇಜ್ರಾಯೆಲಾಂಚ್ಯಾ ಮದ್ದಿ ವಸ್ತಿ ರಾವ್ನ್ ತೆಂಕಾ ದೆವ್ ಹೊತಾ. 46 ಮಿಯಾಚ್ ತೆಂಚೊ ದೆವ್ ಸರ್ವೆಸ್ಪರ್ , ತೆಂಚ್ಯಾ ಮದ್ದಿ ವಸ್ತಿರಾವ್ಕ್ ಮನುನ್ ತೆಂಕಾ ಇಜಿಪ್ತಾಕ್ನಾ ಭಾಯ್ರ್ ಹಾನಲ್ಲೊ ಅಪ್ನಾಚೊ ಸರ್ವೆಸ್ಪರ್ ದೆವ್ ಮಿಯಾಚ್ ಮನುನ್ ತೆನಿ ಕಳ್ವುನ್ ಘೆತಾತ್.