1 Di Dawid ntɔlaasiɛ ni di lɛkayo nɔɔ sɛmaa yi, ni aatɔkɔ ɔlaabuɛtɛtɛ Natan alɛ, "Nyu, ami nsi di sida sewoso lɛkayo kamɛ, kafɔɔ Yaa lɛlakaa nwu n-yɛ di lɛkpaayo kalɔ."

2 Ni di Natan latɔkɔ Dawid alɛ, "Lɛsaa lele ninsi fɔ diisi yi, bla ni, diekye Yaa nsiko fɔ."

3 Kafɔɔ di kakyɛ nwu yi, Yaa ɔlaa lawa kuata Natan alɛ:

4 "Tɔɔkyɛ faalaatɔkɔ kpɛmblatɛ nii Dawid falɛ, ‘Nnya ɔlaa wɔ di SAATE nwu kobuɛ ni alɛ: Diele afɔ ninle nnwɔ nimatofo leyo antɛɛ nsiɛ ni kaamɛ. 5 Diayɔ ni di dii le lakpaa ni Israel ladieko ni di Egipte diɛbase ni di miɛ dii le mmle, niinsiɛ di leyo kamɛ nnya. Ndie di lɛkpaayo ninwii kamɛ nsifi lɛbamba, ndie di kasiɛkɔ kanwii nsifi kabamba. 6 Kakɔ lele ladie ku Israel batii bamuu buasifi yi, diidii ntakaalɛ batunletɛ lɛma kuonwii, mba latɔkɔ nlɛ bakpaa ni batii nlɛ, "Obe oso minaditofo sida sewoso leyo bitɛɛ?" ’

7 "Ni kanunua yi, tɔkɔ kpɛmblatɛ nii Dawid falɛ, ‘Nnya ɔlaa wɔ di SAATE wɔ Ninlenke ni kobuɛ ni alɛ: Lakpaa fɔ lakyeko sɛfa kaweekɔ ku babɔkɛɛ ɔkpa kamɛ lawako nlɛ bale sɛka di batii nii Israel suoto. 8 Ntoosiɛko fɔ di kakɔ lele fɛɛkyɛ, ntootososa kafɔɔ balo lɛfɔ bamuu di anu lɛfɔ. Nfɛ kamata leyooto lɛfɔ nte fɛle batii kplɛkplɛ ba ayooto ninte ni kaasɔ suoto. 9 Kamata kafɔɔ batii nii Israel lɛba, kamatɛ ma kafɔɔ alɛ baawɛ kafa lɛma kamu, manamansinkpee ma ni kubuɛ kafɔɔ. Amumu bablatɛ dilɔbasinyiinka ma, fɛ mmle baabla ni di kasɔkakyekɔ nwu 10 baabla ni diayɔ ni di obe wɔ ladiki ni batunletɛ di batii nii Israel suoto. Kamawakosa balo lɛfɔ bamuu kasɔ.

" ‘Kobuɛ ntɔkɔ fɔ nlɛ SAATE nwu kamatɛ leyo lɛfɔ kamɛ batii anta fɔ: 11 Nse ayi lɛfɔ ntoloo, feesifi bate lɛfɔ nfũ yi, kamata kafutu lɛfɔ obi an-yila fɔ kaanya, babisuɔtɔbi lɛfɔ bamu onwii, kamatɛ sɛka kalɛkɔ nɔɔ kafɔɔ. 12 Nnwɔɔ ninle nnwɔ nimatofo leyo antɛɛ ni nɛ, kamase lɛkakpomii nɔɔ kafɔɔ dinaa ni kaloo. 13 Kamale nwɔ kote, nnwɔɔ kafɔɔ abale mi obisuɔtɔbi. Namaklee lɛbɔmbɔ nii nfũ di nnɛɛ nɔɔ diidii, fɛ mmle laklee ni lafũ ni di mba niale fɔ ni katũ fɛ baka nfũ. 14 Kamayɔ nwɔ nse di batii nii ku sɛka kalekɔ nii kanya dinaa ni kaloo; kamatɛ sɛka kalekɔ nɔɔ dinaa ni kaloo.’"

15 Natan latɔkɔ Dawid odikiotuo sɛlaa se mmle simuu.

16 Ninfɛ di Ɔka Dawid lakyɛ aalasiɛ di SAATE nwu anu aabuɛ alɛ:

"Oo SAATE Yaa, owe nle, obe kafɔɔ ninle leyo nii kamɛ batii, alɛ fatɔɔkpaa mi fɛbadunko nfũ mmle? 17 Nle mmle kafɔɔ ditapɔ di anu lɛfɔ, Oo Yaa, fatɔɔkakatɛ feekyeko mmle di kpɛmblatɛ lɛfɔ leyo kamate ni di dii kaamaa. Oo SAATE Yaa, fatoonyu mi fɛ ami ninle otii wɔ niɛtɛ ɛɛtaka katoo alenke ni batii bamuu.

18 "Obe di Dawid kakple ambuɛ antɔkɔ fɔ ankyakaa di dibu le fɛɛta ni kpɛmblatɛ lɛfɔ? Diekye faye kpɛmblatɛ lɛfɔ, 19 Oo SAATE. Ta kpɛmblatɛ lɛfɔ ku dibiesaa lɛfɔ kanya oso, fatɔɔbla lɛsaa kplɛ le mmle fɛɛta beetofo kafɔɔ asaa kplɛ ya mmle amuu feebuɛ fɛɛtɛ nii.

20 "Oo SAATE, Yaa kuonwii nnaa fɛle afɔ, Yaa kuonwii kafɔɔ nnaa diediki lete lɛfɔ, fɛ mmle butoonu ni ku atoko loo amu. 21 Bawe kafɔɔ ninte fɛle batii lɛfɔ Israel- kale ka kanwii di kasɔ suoto di Yaa ladie aakyɛ aalaadiki ni fɛ batii aata ni suoto nɔɔ. Alɛ oofũ leyooto anta ni suoto nɔɔ, ambla ni asaa kplɛ ku ayɛkɛsaa ya niɛbla ni ɔkpɛ, aatososa ni nnle ku afiɔ lɛma aadiki ni di batii lɛfɔ anu, mba faadiki faakyeko ni Egipte? 22 Oo SAATE, faabla batii lɛfɔ Israel bale fɔ bamubamu dinaa ni kaloo, ni di afɔ, fatookple Yaa lɛma nɛ.

23 "SAATE, kafɔɔ kanunua ta ɔlaa wɔ feebuɛ fɛɛtɛ fɛɛta ni kpɛmblatɛ lɛfɔ ku leyo nɔɔ batii kuwa kaanya dinaa ni kaloo. Bla di mmle feebuɛ fɛɛtɛ ni kanya, 24 alɛ kuate di mmle di leyooto lɛfɔ kamakpɛ ni dinaa ni kaloo. Ni batii nwu kamabuɛ alɛ, ‘SAATE wɔ Ninlenke ni, Yaa nwu di Israel suoto ninle Israel Yaa nɛ!’ Ni babatɛ kpɛmblatɛ lɛfɔ Dawid leyo di anu lɛfɔ.

25 "Afɔ, Yaa nii, fatodiki fɛɛtuo kpɛmblatɛ lɛfɔ falɛ afɔ nimatofo leyo fantɔɔ. Nkpo oso di kpɛmblatɛ lɛfɔ lɛwɛ sɛkambi alɛ ɔɔpɛ ɔlaa anta fɔ nɛ. 26 Oo SAATE, afɔ ninle Yaa! Fatoobuɛ asaa biene ya mmle fɛɛtɛ fɛɛta kpɛmblatɛ lɛfɔ. 27 Kanunua otu ntɔyɔɔ fɔ alɛ faata kpɛmblatɛ lɛfɔ leyo lɛtɔtrɔ, alɛ diatɔɔkyɛ sitũ di anu lɛfɔ dinaa ni kaloo; Oo SAATE, diekye afɔ niɛta ni lɛtɔtrɔ, babata ni lɛɔtrɔ kafɔɔ dinaa ni kaloo."