2 SAMUEL 5

Dawid Labale Israel Ku Yuda Ɔka

1 Ninfɛ di Israel ana nwu amuu lawa Dawid nfũ di Hebron baababuɛ alɛ, "Suoto sina ku ntɔ lɛfɔ mmu bule. 2 Saa yi, di Saul lale ni ɔka di suoto loo, afɔ niale nnwɔ nialeko ni Israel katũ di bakpɛtɛ lɛma nkpɛ kamɛ. Ni di SAATE nwu latɔkɔ fɔ alɛ, ‘Afɔ nimaleko batii nii Israel katũ, ni afɔ nikɔwa sɛka ɔbale di suoto lɛma.’ "

3 Obe wɔ di Israel banɔɔfo bamuu lawa ni Ɔka Dawid nfũ di Hebron, ni di ɔka labla kanya ninii ku mma di Hebron di SAATE nwu anu, ni baapɛ Dawid ɔfɔɔ fɛ ɔka di Israel suoto nɛ.

4 Dawid lafũ alɛɛ afosi-atiɛ fiɛ aabale ɔka, aale sɛka kafɔɔ alɛɛ afosi-ana. 5 Di Hebron, aale sɛka di Yuda suoto alɛɛ akuɛnsĩ ku awɛntɛ akuɔ. Di Yerusalem kafɔɔ, aale sɛka di Israel omuu ku Yuda suoto alɛɛ afosi-atiɛ-atiɛ.

6 Ni di ɔka Dawid ku batii nɔɔ lakyɛ Yerusalem alɛ bɔɔlaakpɛko Yebusi batii ba niasiɛ ni ninfa nɛ. Ni di Yebusi batii nwu latɔkɔ Dawid alɛ, "Flɔbadu nfũ; bia banumbiɛtɛ ku abafa nimatososa ye." Baanyu alɛ, "Dawid dilɔbafuo nfa ɔwa." 7 Kafɔɔ Dawid lafũ Sion kawofakɔ nwu, Dawid Okpoo kplɛ nwu.

8 Dii nwu nkpo, Dawid labuɛ alɛ, "Olele nielenkee Yebusi batii kamafe di ntu lɛkɛ̀ ankyɛ mba ninle ni ‘abafa ku banumbiɛtɛ’ ba ninle ni Dawid balo nfũ." Nkpo oso mambuɛ alɛ, " ‘Banumbiɛtɛ ku abafa’ dilɔbabuo lɛka-yo nɛ."

9 Ninfɛ di Dawid lalaasiɛ di ayo nwu di kawofakɔ nwu kamɛ, ni aalɛɛ ka alɛ Dawid Okpoo kplɛ nɛ. Ni aase oyoyiɛ letofo okyisa nwu, aakyeko kamɛ seyoyiɛ lɛkyɛ nɛ. 10 Ni di Dawid latɔɔwɛ osie aatɔɔkyakaa nɛ, diekye SAATE, Yaa wɔ Ninlenke ni lasiɛko nwɔ.

11 Ninfɛ di Tiro ɔka Hiram lakpee batɔkyɛntɛ ku sewoso se manlɛɛ ni sida ku asaa-bawolatɛ ku afuɔ ayo-batofotɛ baawa Dawid nfũ baabatofo lɛka-yo baata Dawid nɛ. 12 Ni di Dawid latofo alɛ SAATE nwu ntoose nwɔ fɛ ɔka di Israel suoto, ɛɛtakatɛsa kafɔɔ sɛka kalekɔ nɔɔ katoo ta Israel, batii nɔɔ oso.

13 Di Dawid ladie ni di Hebron sɛmaa, aawɛ basɔnɔ ku basɔfɔ kpinwu di Yerusalem. Ni baalofo babisuɔtɔbi ku babisankobi kpinwu baatɔɔ nɛ. 14 Nnya babi ba baalofo baatɔɔ ni di Yerusalem ayooto: Samua, Sobab, Natan, Solomon, 15 Yibhar, Elisua, Nefet, Yafia, 16 Elisama, Eliada ku Elifelet.

Dawid Lalenkee Filisti Batii

17 Di Filisti batii lanu alɛ batɔɔpɛ ni Dawid ɔfɔɔ fɛ ɔka di Israel suoto, ni baakata ku osie omuu baakyɛ baalaawolaa nwɔ nɛ. Kafɔɔ Dawid lanu nwu ole, ni aasoo aasifi kawofakɔ nwɔ nɛ. 18 Ninfɛ di Filisti batii lawa baabasisiɛ baakyaka Refiam Ɔtaata nwu nɛ; 19 nioso Dawid lawolaa kamɛ aakyeko SAATE nwu nfũ alɛ, "Nkyɛ ninaakpɛko Filisti batii? Fabayɔ ma fankpee mi ninnɛɛ?"

Ni di SAATE nwu ladiki kanya alɛ, "Kyɛ, diekye nwaako kamayɔ Filisti batii nwu nkpee fɔ ninnɛɛ."

20 Nioso Dawid lakyɛ Baal Perasim aalalenkee ma ninfa. Ni di Dawid labuɛ alɛ, "Fɛ mmle di ntu ntaa nindie nii, nkpo di SAATE nwu ntoodieko balo nii di anu nii nɛ." Nioso baalɛɛ lɛba nwu alɛ Baal Perasim*5.20 Baal Perasim lɛsɔdiki ninle alɛ, saate wɔ nimbɛ andie nii nɛ. 21 Filisti batii ladiɛ afiɔ lɛma ninfa, ni di Dawid ku batii nɔɔ latuka nya baasifiko nɛ.

22 Filisti batii lakple baakata baawa baabasisiɛ baakyaka Refaim Ɔtaata nwu; 23 nioso Dawid lawolaa kamɛ di SAATE nwu nfũ, ni aatuna nwɔ alɛ, "Tankata tinini faakyɛ, kafɔɔ fe ma sɛɛmaa, faakpɛko ma di awoso ya manlɛɛ ni balsam sitũ. 24 Nse feenu-onu kɔfɛɛfɔ sɛlɔ di balsam awoso nsintɛɛ, faadie wla, diekye nni nimatuo alɛ SAATE nwu ntoole fɔ katũ ɔɔkpɛ Filisti batii bakpɛtɛ nɛ." 25 Nioso Dawid labla fɛ mmle di SAATE nwu latɔkɔ nwɔ nii. Ni aalo Filisti batii aatɛtɛɛ di osuku omuu, diayɔ ni di Gibeon dialaadu ni Geser.