2 Samuel 9

Dawid Ku Mefiboset

1 Ninfɛ di Dawid lakaalɛ alɛ, "Otii owo lekple eebu di Saul leyo kamɛ, kabla nwɔ ni sifutulɛ ta Yonatan oso?"

2 Saul leyo kamɛ kpɛmblatɛ onwii lawɛ baatɔɔlɛɛ ni Siba. Ni baalɛɛ nwɔ baawako Dawid anu, ni di ɔka lakaalɛ nwɔ alɛ, "Afɔ ninle Siba nɛ?"

Ni aatuna alɛ, "Kpɛmblatɛ lɛfɔ nɛ."

3 Ni di ɔka lakaalɛ nwɔ alɛ, "Kuonwii diekple abu di Saul leyo, kafuo nwɔ ni Yaa sifutulɛ ɔbla ɔta?"

Ninfɛ di Siba latɔkɔ ɔka alɛ, "Yonatan obisuɔtɔbi onwii lekple eebu; nkpaa nɔɔ nwu nnyɔ lekpi."

4 Ni di ɔka lakaalɛ nwɔ alɛ, "Ɔfɛ akpe?" Ninfɛ di Siba ladiki kanya alɛ, "Akpe di Amiel obisuɔtɔbi Makir leyo di Lo Debar."

5 Nioso Ɔka Dawid lata baalaakpaa nwɔ di Amiel obisuɔtɔbi Makir leyo di Lo Debar baawako.

6 Di Saul obisuɔtɔbi Yonatan obisuɔtɔbi Mefiboset lawa ni Dawid nfũ, aawakasɔ aatɔɔ dibu.

Ninfɛ di Dawid lalɛɛ alɛ, "Mefiboset!"

Ni aatuna alɛ, "Kpɛmblatɛ lɛfɔ nɛ."

7 Ni di Dawid latɔkɔ nwɔ alɛ, "Tan-yɛkɛ, diekye nwaako kamabla fɔ sifutulɛ, ta teefɔ Yonatan oso. Kamakplesa kasɔ ka kamuu ninle ni ɔwa lɛfɔ Saul kale nta fɔ. Obe lele kafɔɔ fabale alesaa di opunu nii suoto."

8 Ni di Mefiboset lawakasɔ aabuɛ alɛ, "Obe di kpɛmblatɛ lɛfɔ nle, alɛ faanyu ami wɔ ninte ni fɛle weewee wɔ niekpi ni?"

9 Ninfɛ di ɔka lalɛɛ Saul kpɛmblatɛ Siba aatɔkɔ nwɔ alɛ, "Ntɔɔyɔ lɛsaa biala ninle ni Saul ku leyo nɔɔ batii lele lɛta saate lɛfɔ ɔwa-suɔtɔbi. 10 Afɔ ku babisuɔtɔbi lɛfɔ ku bakpɛmblatɛ lɛfɔ bikpɛ kasɔ nwu, biɛyɔ alesaa nwu biwako, alɛ baayɔ man-nyu saate lɛfɔ ɔwa-suɔtɔbi nwu. Kafɔɔ saate lɛfɔ ɔwa-suɔtɔbi Mefiboset, kamale alesaa di opunu nii suoto obe lele." (Di obe nwu kamɛ Siba lawɛ babisuɔtɔbi lefosi-banɔɔ ku bakpɛmblatɛ afosi-anyɔ.)

11 Ninfɛ di Siba latɔkɔ ɔka alɛ, "Kpɛmblatɛ lɛfɔ kamabla lɛsaa lele di saate nii ɔka lediki kpɛmblatɛ nɔɔ kanya alɛ abla nii." Nioso Mefiboset lale alesaa di Dawid opunu suoto fɛle ɔka obisuɔtɔbi onwii okle.

12 Mefiboset lawɛ obisuɔtɔbi-kosopo onwii baatɔɔlɛɛ ni Mika, ku Siba leyo kamɛ batii bamuu lale Mefiboset bakpɛmblatɛ. 13 Nioso Mefiboset wɔ di nkpaa nwu nnyɔ lakpi ni lasiɛ di Yerusalem. Diekye obe lele aatoole alesaa di ɔka opunu suoto.