Leyo Takale Otofo Di Babel
1 Di obe owo nintɔbafe ni kamɛ; batii bamuu kaasɔ latobuɛ sele sinwii ku lɛkakatɛbi ninwii. 2 Diabawa alɛ baakyako ɔkyɛ ofe kufĩ katunkɔ, ni baalaanya kasɔ lakataa kosole kanwii di Sinar11.2 Sinar ninle Babel kasɔ nɛ kasɔ suoto, ni basiɛ ninfa nɛ.
3 Ni baatɔkɔ bawo alɛ, <<Bita bubudi atenkudi, buofiɛ nya aawɛ osie.>> Ni baayɔ atenkudi, nse baayɔ ni afuɔ, ni baayɔ kɔmaa, nse baayɔ ni kɔtɛ nwɔtɔle nɛ. 4 Ni baabuɛ alɛ, <<Biwa, biɛta bubudi okpoo buta suoto. Buotofo leyo takale diɛlaasũ koolo buofũ leyooto, munasamii ni kafɔɔ di kasɔ kamuu suoto.>>
5 Nioso Saate nwu lasoo aawa kasɔ aabanyu okpoo wɔ ku leyo takale nwu baatii kotofo nii. 6 Ni di Saate labuɛ alɛ, <<Nyu, batii ba mmle lɛbla onwii, bamuu lɛma boobuɛ sele sinwii kafɔɔ. Ni batookye kasɔ bɔɔbla nle mmle nɛ. Nioso lɛsalɛsaa kuniwii nnaa babatɔkɔ alɛ bɔɔbla ni, manamafuo ni ɔbla. 7 Bita busoo bukyɛ nfa, buɔlaakpɔkpɔtɔsa ma sele alɛ kuonwii dilaasinnu owo nɔɔ kasɔ.>>
8 Nioso Saate lasamiisa ma ninfa aakpete di kasɔ kamuu suoto, ni baadiɛ okpoo nwu obudi nɛ. 9 Nkpo oso manlɛɛ nfa alɛ Babel, diekye nfa di Saate lakpɔkpɔtɔsa sele di kayi kamuu nɛ. Nfa nfɛ di Saate lasamiisa ma aakpete kaasɔ kamuu suoto nɛ.
Diɛyɔ Ni Di Sem Banantii Diɛlaase Ni Di Abram.
10 Nnya mma mmle ninle Sem banantii nɛ.
Alɛɛ anyɔ sɛmaa di ntu layii ni kayi, Sem lafũ alɛɛ kɔlafa ni aalofo Arfasad nɛ. 11 Aalofo Afasad aaloo nii, Sem lafũ alɛɛ alafa anɔɔ ni aakple aalofo babisuɔtɔbi ku babisankobi bamba nɛ.
12 Obe wɔ di Arfasad lafũ ni alɛɛ afosi atiɛ alɛɛ anɔɔ yi, ni aalofo Sela nɛ. 13 Aalofo Sela aaloo nii, Arfasad lafũ alɛɛ alafa ana alɛɛ atiɛ ni aakple aalofo babisuɔtɔbi ku babisankobi bamba nɛ.
14 Obe wɔ di Sela lafũ ni alɛɛ afosi atiɛ yi, ni aalofo Eber nɛ. 15 Aalofo Eber aaloo nii, Sela lafũ alɛɛ alafa ana alɛɛ atiɛ ni aakple aalofo babisuɔtɔbi ku babisankobi bamba nɛ.
16 Obe wɔ di Eber lafũ ni alɛɛ afosi atiɛ alɛɛ ana yi, ni aalofo Peleg nɛ. 17 Aalofo Peleg aaloo nii, Eber lafũ alɛɛ alafa ana afosi atiɛ ni aakple aalofo babisuɔtɔbi ku babisankobi bamba nɛ.
18 Obe wɔ di Peleg lafũ ni alɛɛ afosi atiɛ yi, ni aalofo Reu nɛ. 19 Aalofo Reu aaloo nii, Peleg lafũ alɛɛ alafa anyɔ alɛɛ anaasĩ ni aakple aalofo babisuɔtɔbi ku babisankobi bamba nɛ.
20 Obe wɔ di Reu lafũ ni alɛɛ afosi atiɛ alɛɛ anyɔ yi, ni aalofo Serug nɛ. 21 Aalofo Serug aaloo nii, Serug lafũ alɛɛ alafa anyɔ alɛɛ akuɛnsĩ ni aakple aalofo babisuɔtɔbi ku babisankobi bamba nɛ.
22 Obe wɔ di Serug lafũ ni alɛɛ afosi atiɛ yi, ni aalofo Nahor nɛ. 23 Aalofo Nahor aaloo nii, Serug lafũ alɛɛ alafa anyɔ ni aakple aalofo babisuɔtɔbi ku babisankobi bamba nɛ.
24 Obe wɔ di Nahor lafũ ni alɛɛ afosi anyɔ alɛɛ anaasĩ yi, ni aalofo Tera nɛ. 25 Aalofo Tera aaloo nii, Nahor lafũ alɛɛ kɔlafa lefosi alɛɛ anaasĩ ni aakple aalofo babisuɔtɔbi ku babisankobi bamba nɛ.
26 Obe wɔ di Tera lafũ ni alɛɛ afosi akuɛnsĩ yi, ni aakple aalofo Abram, Nahor ku Haran nɛ.
Tera Banantii
27 Nnya mma mmle ninle Tera banantii nɛ.
Tera lalofo Abram, Nahor ku Haran. Ni di Haran lalofo Lot nɛ. 28 Haran lakasa ote Tera okpi di Ur okpoo di nfũ baalofo nwɔ nii, di Kyadea kasɔ suoto. 29 Kafɔɔ Abram ku Nahor mma baayɔ basanko. Abram ɔsɔfɔ leyooto niale Sarai nɛ. Nahor kafɔɔ ɔsɔfɔ leyooto niale Milka, Haran obisankobi aale. Milka ku Iska, Haran nialofo ma. 30 Sarai ɔlɛma aale, obi ditawɛ nwɔ.
31 Ninfɛ di Tera lakpaa obi nɔɔ Abram ku ɔwa nɔɔ Lot ninle ni Haran obisuɔtɔbi ku obi sɔfɔ nɔɔ Sarai, ninle ni obi nɔɔ Abram ɔsɔfɔ baadie di Ur di Kyadea kasɔ suoto alɛ boosifi Kanaan kasɔ suoto nɛ. Kafɔɔ baadu ni Haran okpoo, baasiɛ ninfa.
32 Tera lafũ alɛɛ alafa anyɔ alɛɛ anɔɔ, ninfɛ aakpi di Haran okpoo nɛ.
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)