1 İzrailyne paççahne, Davudne dixen, Sıleymanın k’oran uvhiybı.

2 Mançin k’orana ək’eliy terbiye heles,

k’orane ats’aalika uvhiyn cuvab alyaat’as kumag ha’as.

3 Mançin ək’elikana ı’mı’r haa’as xət qa’as.

Manke ğu qopkuna, adaletnana ı’mı’r haa’as.

4 Mançin caahilyaaşis k’oraba ı’mı’r g’avces xət qa’as,

mek’vunbışis ats’aaliy darraka heles.

5 Hasre hikmatnang’vee k’ırı alixhxhı, ats’al xət qixhecen,

hasre ək’elikang’vee yugna mısləhət alept’ecen.

6 Məxüd insanaaşilqa dekkaaşe uvhiynbı, misaalabı,

hikmatnanbışe eyhenbıyiy manbışin dağamın cuvabbı hixharasınbı.

7 Rəbbile qəpq’ı’niy ats’alyne q’oma ulyozzur,

saccu bəç’əraaşik’le k’orana ək’eliy terbiye g’umooce vob.

8 Yizda dix, dekkee helene terbiyel k’ırı alixhxhe,

yedee xət qa’anbıd yik’el hixan hıma’a.

9 Man yiğne vuk’lel micagın tac xhinne g’aces,

gardanılib gıranın t’exa xhinne ixhes.

10 Yizda dix, hımaysar bınahnanbışe

ğu yəqqı’le qığehecen.

11 Manbışe vak’le eyhesın: «Qora, şaka gugu hav’u, eb k’yaa’as,

həməxübcab taxsir deşinbışilqa k’yooharas.

12 Qora, manbı ahalın xhinne üç’übba k’ööğəs,

manbı bıkırba nyuq’vneeqa əlyhəənbışik akaraba vuxhecen.

13 Manke şi manbışike curayn-curayn gıranın karbı alyaat’as,

yişin xaybıd ing’une-şeng’une karaka gyatsts’a’as.

14 Şaka sarçe,

havasre şaqa sa boxçe vuxhecen!»

15 Yizda dix, manbışika sımaraççe,

manbışde yəqqı’n ımayk’an.

16 Manbışin g’elybı pisde suraqqa,

eb k’yaa’as g’adayxhvan.

17 Şit’yaaşine ulene ögil gugu haa’axhee,

manbı maqa gyatk’vas deş.

18 Mane insanaaşeme höö-qöö gugu conemeecab haa’a,

manbışe conacab eb k’yaa’a.

19 Mıssıne ulynanbışda yəq gırgıne gahbışil həməxüb vooxhe,

Mıssıne uleka merıng’uke alyaat’uyne karan manbışin can ileşşe.

20 K’orane ək’elin g’ad axtıda ona’a,

maydambışee mançin nıq' axtı qexhe.

21 Şahrabışee, geeb insanarnane cigabışee, mançin ona’an,

şaharne akkabışisnee eyhen:

22 «Mısılqameene şos, caahilyaaşis,

əvəmiyvalla vukkiykanas?

Mısılqameene matsxara haa’anbışe

matsxaravalike kef ts’ıts’a’as?

Mısılqameene beynyavabışik’led ats’al g’ımece ixhes?

23 Şu aq’veeqa uvhiyne yizde cuvabıl k’ırı alixhxhinxhiy,

zı şu yizde fıkırbışikaniy gyavts’aa’as,

yizın k’oran cuvabniy şolqa hixhara’as.

24 Zı şolqa onuiyng’a, şu zal k’ırı gidyaqqiyn,

zı şolqa xıl hotk’umeeyid, şu zalqa sapk’ıl deş.

25 Şu yizde mısləhətbışiqa ilyaakı deş,

aq’veeqa uvhiyn yizın cuvabıd əq’əna qı’ı.

26 Mançil-allab şolqa ver vüqqəmee, zı əqəna ha’as,

qəpq’ı’niyn şu alyapt’ımee, zı şadxhesda.

27 Mane gahıl t’ufan xhinne qəpq’ı’niy şolqa k’yooharas,

it’umna mıts xhinnen divan şolqa alles,

şu dağamiyvaleeqa, əq’übeeqa gyapk’as.

28 Şu manke zalqa ona’amee, şos zı alidghıniy qeles deş,

şu nimee zı t’abal he’ee, aveykes deş.

29 Şos ats’al dekkan ıxhayke,

Rəbbile qı’dəəq’ən vuxhayke,

30 yizda mısləhət g’umooce vob,

yizın cuvabıd ıkkan deş.

31 Mançil-allab şu vuşde yəqqı’n q’ap’ın şagav oxhanas,

vuşde pisde mısləhətbışika aats’es.

32 Caahilyar zake sapk’ılva manbı hapt’asınbı,

beynyavabışeb nişinacab hidyaa’ava, manbışikın ixhesın.

33 Zal k’ırı alixhxhıynbışeme vaxxariyna ı’mı’r haa’as,

manbı pisınçileb qəvəəq’ənas deş».