18 ಆ ಹುವಾದಿನ್ ಯೆಹೋವ ದೇವ್ನೆ, "ಅದ್ಮಿ ಎಕೆಲೋ ರ್ಹವಾನು ಅಛ್ಛು಼ಕಾಹೆ, ಇನ ಬರೋಬರ್ನಿ ಜೋ಼ಡ್ವಾಳಿನ ಬಣಾವುಸ್" ಕರಿಬೋಲ್ಯೊ. 19 ಅಮ್ ಯೆಹೋವನೆ ಖ್ಹಾರುಸ್ ಧರ್ತಿನು ಜ಼ಂತ್ನಾಬಿ ಆಬ್ನು ಜಿನಾವರ್ನಾಬಿ, ಜ಼ಮೀನ್ನಿ ಮಾಟಿಥಿ ಉಬ್ಜೈ಼ನ್ ಆ ಅಖ್ಖಾನ ಅದ್ಮಿ ಖಿವುಖಿವು ನಾಮ್ ಮ್ಹೇಲಸ್ಕಿ ದೇಖ್ಯೆಕರಿ ಇನಾಕನ ಆವಾಖ್ಹರ್ಕು ಕರ್ಯೊ. ಅದ್ಮಿನೆ ಏಕೇಕ್ ಜಾನ್ವರ್ನ ಖೆವುಖೆವು ನಾಮ್ ಮ್ಹೇಲ್ಯೋಕಿ ಯೋಸ್ ಯೊ ಅಖ್ಖಾನು ನಾಮ್ಹುಯು. 20 ಅಮ್ ಯೊ ಅದ್ಮಿನೆ ಖ್ಹಾರೂಸ್ ಜಾನ್ವರ್ನಾಬಿ, ಆಬ್ನು ಜಿನಾವರ್ನಾಬಿ, ಝಾ಼ಡೀನು ಜಾನ್ವರ್ನಾಬಿ, ನಾಮ್ ಮ್ಹೇಲ್ಯೊ. ಕತೋಬಿ ಇನ ಬರೋಬರ್ನು ಜೋ಼ಡು ಮಳ್ಯುಕೊಯ್ನಿ. 21 ಅಮ್ರ್ಹಾವಪರ್ ಯೆಹೋವ ದೇವ್ನೆ ಯೊ ಅದ್ಮಿನ ಭರ್ನಿಂದರ್ ಆವಾನಿಘೋಣಿ ಕರಿನ್ ಇನಿ ಪಾಖ್ಹ್ಳಿಯೆಮಾಥು ಏಕ್ನ ಕಾಡಿಲೀನ್ ಯೊ ಝ಼ಗೋಮ ಬೋಟಿಥಿ ಮೂಚ಼್ಯೊ. 22 ಯೆಹೋವನೆ ಅದ್ಮಿಥಿ ಕಾಡ್ಯೋತೆ ಪಾಖ್ಹ್ಳಿನ ತಯೇಡಕರಿ ಬಣೈನ್, ಇನ ಯೊ ಅದ್ಮಿಕನ ಬುಲೈಲೀನ್ ಆಯೊ. 23 ತದೆ ಇನೆ ಯೊ ತಯೇಡನ ದೇಖಿನ್, "ಹಮ್ಕೆ ಬರೋಬರ್ ಆ ಹೈರಿತೆ ಮಾರಿ ಹಡ್ಕೇಥಿ ಐತೆ ಹಡ್ಕ್ಯು, ಮಾರಿ ಬೋಟಿಥಿ ಐತೆ ಬೋಟಿ ಹುಯಿರ್ಹೀಸ್. ಆ ಹೈರಿತೆ ಅದ್ಮಿಥಿ ಉಬ್ಜೀತೆ ಇನಖ್ಹಾಜೆ ತಿರಿಯಕರಿ ಬೋಲೈಲಿಶೆ" ಕರಿಬೋಲ್ಯೊ. 24 ಇನಖ್ಹಾಜೆ ಪರ್ಖ್ಹೊ ಆಯ ಬಾನ ಮ್ಹೇಲಿನ್ ಇನಿ ಬಾವಣ್ಣ ಮಳಿಜಾ಼ಸ್ ಇವ್ಣೆ ಬೇಜ಼ಣ ಎಕ್ಕಸ್ ಶರೀರ್ ಹುಯಿರ್ಹೇಸ್.
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)