Gênesis 28

ಯಕೋಬ್ ಲಾಬಾನ್‌ಕನ ಗಯೋತೆ

1 ತದೆ ಇಸಾಕ್‍ನೆ ಯಾಕೋಬನ ಬುಲೈನ್ ಆಶೀರ್ವಾದ್‍ಕರೀನ್ ಇನ ಹುಕುಮ್ ಶಾತ್‍ಕರ‍್ಯೋಕತೊ, "ತೂ ಕಾನಾನ್‌ವಾಳನಿ ಛೋ಼ಕ್ರಿನ ವ್ಯಾಹ ನಾಕರ‍್ನು. 2 ತೂ ಪದ್ದನ್‌ ಅರಾಮ್ಮ ಛಾ಼ತೆ ತಾರೊ ನಾನ ಬೆತೂವೇಲನ ಘರೆ ಚ಼ಲ್ಯೋಜಾ಼. ಹಿಜ಼್ಜ ತಾರೊ ಮಾಮ ಲಾಬಾನನಿ ಛೋ಼ರಿಯೆಮ ಏಕ್‍ಜ಼ಣಿನ ವ್ಯಾಹ ಕರಿಲೆ. 3 ಅಖ್ಖೀಸ್ ಶಕತ್ನೊ ಯೆಹೋವ ದೇವ್ ತುನ ಆಶೀರ್ವಾದ್ ಕರೀನ್ ತುನ ಘಣಿ ಪಿಳ್ಗಿನ ದೀನ್ ತಾರೇಥಿ ಕೈಯೇಕ್ ಜ಼ಗ್‌ಜಾ಼ತ್‌ ಪೈದಹುವಾನಿತರ ವಾರ್ಖ್ಹೋ ದ್ಯವಾದೆ. 4 ದೇವ್ನೆ ಅಬ್ರಹಾಮ್‍ನ ದಿದೋತೆ ಆಶೀರ್ವಾದ್ನ ತುನಾಬಿ, ತಾರಿ ಪಿಳ್ಗಿನಾಬಿ ದ್ಯವಾದೆ, ದೇವ್ ಅಬ್ರಹಾಮ್‌ನ ವಾಗ್ದಾನ್ ಕರ‍್ಯೊತೆ ತಿಮ್ಮಸ್, ತೂ ಹಮ್ಕೆ ವಶೇರೊ ಛಾ಼ತೆ ದೇಖ್ಹ್‌ನ ತೂ ಶೊಂತ್ ಕರಿಲ್ಯವಾನಿತರ ದೇವ್ ಆಶೀರ್ವಾದ್ ಕರೀನ್ ತುನಾಬಿ ತಾರಿ ಪಿಳ್ಗಿನಾಬಿ ದ್ಯವಾದೆ" ಕರಿ ಬೊಲ್ಯೊ. 5 ಇಸಾಕ್‍ ಯಾಕೋಬ್‍ನ ಪದ್ದನ್‌ ಅರಾಮ್‌ನ ಮೋಕ್ಲಾಖ್ಹತರ್‌ ಅರಾಮ್ಯವಾಳೊ ಬೆತೂವೇಲನೊ ಛಿಯ್ಯೊಬಿ ಯಾಕೋಬ ಅಜು಼ ಏಸಾವನಿ ಆಯಾ ರೆಬೆಕ್ಕನೊ ಭೈಬಿ ಹುಯಿರೋತೆ ಲಾಬಾನಕನ ಗಯೊ.

ಏಸಾವನ ಬಿಜೇಕ್ ಬಾವಣ್

6 ಇಸಾಕನೆ ಯಾಕೋಬನ ಆಶೀರ್ವಾದ್‍ಕರೀನ್ ಪದ್ದನ್‌ ಅರಾಮ್ಮ ಛೋ಼ಕ್ರಿ ಢೂಂಡಿನ್ ವ್ಯಾಹ ಕರಿಲ್ಯವಾನ ಮೋಕ್‌ಲ್ಯೊತೇಬಿ, ಇನೆ ಯಾಕೋಬನ ಆಶೀರ್ವಾದ್ ಕರಾನಿವಖ್ಹ್‌ತೆ ಇನ, ತೂ ಕಾನಾನ್‌ವಾಳನಿ ಛೋ಼ಕ್ರಿನ ನಾಲೇವ್ಣುಕರಿ ಹುಕುಮ್ ದಿದೋತೇಬಿ, ಏಸಾವನೆ ದೇಖ್ಯೊ. 7 ಯಾಕೋಬನೆ ಆಯಾ ಬಾ ಬೋಲನಿತ್ರಸ್ ಮೆಸಪಟೋಮಿಯನ ಗಯೋತೇಬಿ ಏಸಾವನೆ ದೇಖ್ಯೊ. 8 ಕಾನಾನ್‌ವಾಳನಿ ಛೋ಼ಕ್ರಿಯೆ ಇನೊ ಬಾ ಇಸಾಕ್‍ನ ಪಸಂದ್‍ಕೊಯ್ನಿ ಕರೀಬಿ ಮಾಲುಮ್‍ ಕರಿಲಿನ್ ಇನೆ, 9 ಏಸಾವ ಇಷ್ಮಾಯೇಲ್‌ಕನ ಜೈ಼ನ್ ಅಬ್ರಹಾಮ್‌ನೊ ಛಿಯ್ಯೊ ಇಷ್ಮಾಯೇಲ್‌ನಿ ಛೋ಼ರಿ ನೆಬಾಯೋತ್‌ನಿ ಭೇನ್‍ಬಿ ಹುಯಿರೀತೆ ಮಹಲತನ ವ್ಯಾಹ ಕರಿಲಿದೊ.

ಬೇತೇಲ್‍ಮ ಯಾಕೋಬನು ಖ್ಹೋಣ್ಯು

10 ತದೆ ಯಾಕೋಬ ಹಾರಾನ್ನ ಜಾ಼ವ್ಣುಕರಿ ಬೇರ್ಷೆಬಥೊ ನಿಕ್‍ಳ್ಯೊ. 11 ಯೊ ಚಾ಼ಲ್‍ಕುಚ಼್ ಕರ್ತೊಹುಯಿನ್ ಜಾ಼ತೊರ‍್ಹಾವನಿ ವಖ್ಹ್‌ತೆ ದನ್‍ ಡುಬಿಗೋತೆಖ್ಹಾಜೆ ಯೊ ರಾತ್ ಹಿಜ್ಜಾ಼ಸ್ ರ‍್ಹೀಗೊ. ಇನೆ ಹಿಜ್ಜಾ಼ಥೂತೆ ಬಂಡಾವ್‍ಮ ಎಕ್ ಬಂಡಾನ ಶಿರಾಣೆದೀನ್ ಯೊ ಝ಼ಗೋಮಸ್ ಖ್ಹುಯ್ಗೊ. 12 ಯೊ ರಾತ್ ಇನೆ ಎಕ್ ಖ್ಹೋಣ್ಯು ದೇಖ್ಯೊ. ಯೊ ಖ್ಹೋಣ್ಯಾಮ ಎಕ್ ಏಣಿ ಜ಼ಮೀನ್‌ಪರ್‌ ಭಿಯೂಥು. ಇನಿ ನೋಕ್ ಸೊರ್ಗನ ಚಿಕೈರ‍್ಹೂಥು. ಇನಪರ್ ದೇವ್‍ನು ದೂತಖ್ಹಾರು ಛ಼ಡಾನು ಉತ್ರಾನು ಕರುಕರ್ತೂಥು. 13 ಆ ನಾಹುಯಿನ್ ಯೆಹೋವ ದೇವ್ ಇನಾಪರ್ ಭೀರಿನ್, "ತಾರೊ ನಾನ ಅಬ್ರಹಾಮ್‌ನೊ ದೇವ್‌ಬಿ, ಇಸಾಕ್‍ನೊ ದೇವ್‌ಬಿ ಮೇಸ್. ತೂ ಖ್ಹುತೊಸ್ತೆ ಜ಼ಮೀನ್ನ ತುನಾಬಿ ತಾರಿ ಪಿಳ್ಗಿನಾಬಿ ದೆವುಸ್‌. 14 ತಾರಿ ಪಿಳ್ಗಿ ಜ಼ಮೀನ್‍ಪರ‍್ನು ಕಾಕ್ರಿಯೆತ್ರು ಗಣ್ತಿಕೊಂತೆ ಉಶೆ. ತೂ ಪೂರಬ್, ಪಶ್ಚಿಮ್, ದಕ್ಷಿಣ್, ಉತ್ತರ್ ದಿಕ್‍ಮ ಫೈಲೈಜೈ಼ಶ್. ತಾರೇಥಿಬಿ, ತಾರಿ ಪಿಳ್ಗಿಥೀಬಿ, ಜ಼ಮೀನ್ನು ಖ್ಹಾರೀಸ್‍ ಖೂಮ್‍ವಾಳು ಆಶೀರ್ವಾದ್ ಲೀಲಿಶೆ. 15 ಹಂದೇಕ್, ಮೇ ತಾರಿ ಜೋ಼ಡ್ಮ ರ‍್ಹೀನ್ ತೂ ಕಿಜ಼್ಜ ಗಯೋತೋಬಿ ತುನಾ ಬಚಾ಼ಡಿನ್, ಪಾಛೊ಼ ಆ ದೇಖ್ಹ್‌ಮ ಬುಲೈಲಿನ್ ಅಯಿಶ್‌. ಅಜು ಮೇ ತುನ ಬೋಲ್ಯೋತೆ ವಾಗ್ದಾನ್‌ ಚ಼ಲವ್‌ಕೊಂತೆ ಮ್ಹೇಲಿಶ್‍ಕೊಯ್ನಿ" ಕರಿ ಬೊಲ್ಯೊ. 16 ಯಾಕೋಬನೆ ನಿಂದರ್‌ಮಾಥೊ ಉಠೀನ್, "ಖ್ಹಾಚಾಮ ಯೆಹೋವ ಆ ಝ಼ಗೋಪರ್ ಛಾ಼. ಆ ಮನ ಮಾಲುಮ್ಮಸ್ ಪಡ್ಯುಕೊಯ್ನಿ" ಕರಿ ಬೊಲ್ಯೊ. 17 ಯೊ ಡರಿನ್, "ಆ ಝ಼ಗೊ ಪರಿಶುದ್ ಹುಯಿರುಸ್. ಆ ದೇವ್‍ನೂಸ್ ಘರ್‌ಪಣ್ಕಿ ಬಿಜು಼ ಕಾಹೆ, ಆ ಸೊರ್ಗನು ಬಾಕಲ್" ಕರಿ ಬೊಲ್ಯೊ. 18 ಯಾಕೋಬ ವ್ಹಾಣೆ ಉಠೀನ್ ಇನೆ ಶಿರಾಣು ದೀರಾಖ್ಯೋಥೋತೆ ಯೊ ಬಂಡಾನ ಪಾಡಿನ್ ಖ್ಹಣೇದ್ನು ಖಂಬು ಕರಿ ಭೀರಾಖಿನ್ ಇನಾಪರ್ ತೇಲ್ನ ನಾಖ್ಯೊ. 19 ಆ ನಾಹುಯಿನ್ ಇನೆ ಲೂಜ಼್ ಕರಿ ನಾಮ್‍ಥೂತೆ ಯೊ ಗಾಮ್ನ ಬೇತೇಲ್‌ ಕರಿ ನಾಮ್‌ಮ್ಹೇಲ್ಯೊ. 20 ಯಾಕೋಬನೆ ಹಿಜ್ಜಾ಼ ಕಬೂಲೀನ್, "ದೇವ್‍ ಮಾರಿಜೋಡೆ ರ‍್ಹೀನ್ ಮೇ ಜಾ಼ವಾನಿ ಆ ವಾಟ್‍ಮ ಮನ ಬಚಾ಼ಡಿನ್ ಪೇಟ್ನ ಖಾಣುಬಿ, ಫೇರಾನ ಲುಂಗ್ಡೂಬಿ, ಮನ ದೀನ್, 21 ಪಾಛು಼ ಫರೀನ್ ಮಾರ ಬಾನ ಘರೆ ಜ಼ತನ್‍ಥಿ ಆವಖ್ಹರ್ಕು ಕರ‍್ಯೋತೊ ಯೆಹೋವಾಸ್ ಮನ ದೇವ್‍ ಹುಯಿರಿಶೆ. 22 ಆ ನಾಹುಯಿನ್ ಮೇ ಖ್ಹಣೇದ್ನು ಖಂಬು ಕರೀನ್‌ ಭೀರಾಖ್ಯೋತೆ ಆ ಬಂಡೊ ದೇವ್ನು ಘರ್‌ ಹುಯಿರಿಶೆ. ತದೆ ತೂ ಮನ ದೀಶ್‍ತೆ ಅಖ್ಖಾಸ್‌ಮಾಥು ದಖ್ಹ್‌ಮಾನು ಏಕ್‍ಭಾಗ್‌ನ ತುನ ಮೇ ದೀಶಸ್‍ ದೀಶ್" ಕರಿ ಹರ‍್ಕೆ ಕರಿಲಿದೊ.