ಆದಿಕಾಂಡ 29

ಲಾಬಾನನ ಘರ್ಮ ಯಾಕೋಬ ಆಯೊತೆ

1 ತದೆ ಯಾಕೋಬ ಚಾ಼ಲ್‍ಕುಚ಼್‍ಕರಿನ್ ಪೂರಬ್ ದಿಕ್‌ನು ಲೋಗ್‌ನ ತಬರ್ಖಾನ ಆಯೊ. 2 ತದೇಸ್‌ ಇನ ಯೊ ಜ಼ಂಗಳ್‌ಮ ಎಕ್ ಬಾವ್ಡಿನ ದೇಖ್ಯೊ. ಹಿಜ್ಜಾ಼ ಮೇಂಢಾನು ತೀನ್ ಮಂಧುಖ್ಹಾರು ಥು. ಮೇಂಢ ಚ಼ರಾವವಾಳು ಮಂಧಾವ್ನ ಲಯಿನ್ ಯೊ ಬಾವ್ಡಿನು ಪಾಣಿ ಪಿಡಾವ್ತು ಥು. ಯೊ ಬಾವ್ಡಿಪರ್ ಎಕ್ ಮೋಟೊ ಬಂಡೊ ಮ್ಹೇಲೈರೋಥೊ. 3 ಮಂಧುಖ್ಹಾರು ಹಿಜ್ಜಾ಼ ಭರಾವನಿ ವಖ್ಹ್‌ತೆ ಮೇಂಢ ಚ಼ರಾವವಾಳು ಬಾವ್ಡಿಪರ್ ಮೂಚೈ಼ರ‍್ಹೋತೆ ಬಂಡಾನ ಖ್ಹರ್‌ಕೈನ್ ಮೇಂಢಾವ್ನ ಪಾಣಿ ಪಿಡೈನ್ ಪಾಛು಼ ಬಂಡಾನ ಬಾವ್ಡಿಪರ್ ಮೂಚಿನಾಕ್‍ತೂಥು. 4 ಯಾಕೋಬನೆ ಇವ್ಣುನ, "ಭೈಯೇವೊ, ತುಮೆ ಕಿಜ್ಜಾ಼ವಾಳ?" ಕರಿ ಬೋಲಖ್ಹತರ್ ಇವ್ಣೆ, "ಹಮೆ ಖಾರಾನ್ ಗಾಮ್‌ವಾಳ" ಕರಿ ಬೋಲ್ಯು. 5 ತದೆ ಇನೆ ಇವ್ಣುನ, "ನಾಹೋರನೊ ನಾತ್ಯೊ ಲಾಬಾನ ತುಮುನ ಮಾಲುಮ್‍ಕಿಶೂ?" ಕರಿ ಬೋಲಖ್ಹತರ್, "ಹಮುನ ಯೊ ಮಾಲುಮ್" ಕರಿಬೋಲ್ಯು. 6 ಇನೆ ಇವ್ಣುನ, "ಯೊ ಅಛ್ಛೊ ಛಾಕಿಶೂ?" ಕರಿ ಬೋಲನಿವಖ್ಹ್‌ತೆ ಇವ್ಣೆ, "ಅಛ್ಛೋಛಾ. ಹುಜ್ಜಾ ದೇಕ್, ಇನಿ ಛೋರಿ ರಾಹೇಲ್ ಮೇಂಢಾವ್ನಿ ಜೋ಼ಡ್ಮ ಉಳಿಆವಸ್" ಕರಿ ಬೋಲ್ಯು. 7 ಯಾಕೋಬನೆ ಇವ್ಣುನ, "ದನ್ ಡುಬಾನ ಬಿಜೂ಼ಬಿ ಘಣಿ ವಖ್ಹತ್ ಛಾ಼, ಮೇಂಢಾವ್ನ ಎಕ್ಟುಕರಾನಿ ವಖ್ಹತ್ ಹುಯಿರ‍್ಹಿಕೊಯ್ನಿ; ಪಾಣಿ ಪಿಡೈನ್ ಶನ ಚರಾವ್ಣುನಾ?" ಕರಿಬೋಲ್ಯೊ. 8 ಮಂಧುಖ್ಹಾರು ಆವಾದಿನ್ ಇವ್ಣೆ ಬಾವ್ಡಿಪರ್ ಮೂಚಿರಾಖ್ಯುಥೂತೆ ಬಂಡಾನ ಕಾಡಿನ್; ಮೇಂಢವ್‌ನ ಪಾಣಿ ಪಿಡೈಯೇಸ್" ಕರಿ ಬೋಲ್ಯು. 9 ಯೊ ಇವ್ಣಿಜೋ಼ಡ್ಮ ವಾತ್ ಬೋಲುಕರಾನಿ ವಖ್ಹ್‌ತೇಸ್ ರಾಹೇಲ್ ಇನ ಬಾನ ಮೇಂಢಾವ್ನಿ ಜೋ಼ಡ್ಮ ಆಯಿ; ಯೋಸ್ ಯೊ ಅಖ್ಖಾನ ಚ಼ರಾವ್‍ತೀಥಿ. 10 ಯಾಕೋಬನೊ ಮಾಮ ಲಾಬಾನನಿ ಛೋ಼ರಿ ರಾಹೇಲ್‍ನಾಬಿ ಇನ ಮೇಂಢಾವ್‍ನಾಬಿ ದೇಖಾನಿವಖ್ಹ್‌ತೆ ಬಾವ್ಡಿಕನ ಜೈ಼ನ್ ಇನಪರ್ ಮೂಚೈ಼ರ‍್ಹೊಥೋತೆ ಬಂಡಾನ ಧಕೈನ್ ಲಾಬಾನನ ಮೇಂಢಾವ್ನ ಪಾಣಿ ಪಿಡಾಯೊ. 11 ಅಜು಼ ಇನೆ ರಾಹೇಲ್‍ನ ಬುಚ್ಚಾ಼ದೀನ್‌ ಜೋ಼ರೆಖ್ಹು ರೋಯೊ. 12 "ಮೇ ತಾರ ಬಾನೊ ಖಾಂದಾನ್‌ವಾಳೊ ತಾರಿ ರೆಬೆಕ್ಕನೊ ಛಿಯ್ಯೊ ಯಾಕೋಬ" ಕರಿ ಬೊಲ್ಯೊ. ತದೆ ರಾಹೇಲ್ ನಾಶಿಜೈ಼ನ್ ಯೊ ವಾತ್ನ ಇನ ಬಾನ ಖ್ಹಮ್‍ಜಾ಼ಡಿ. 13 ಲಾಬಾನ ಇನಿ ಭೇನ್ನೊ ಛಿಯ್ಯೊ ಯಾಕೋಬ ಆಯೋತೆ ವಾತೆ ಖ್ಹಮ್‍ಜಿನ್ ಇನ ಬುಲಾವನ ನಾಶಿಆಯಿನ್ ಬಥೈನ್‌ ಇನ ಘರೆ ಬುಲೈಲೀನ್ ಗಯೊ. ತದೆ ಹಿಜ್ಜಾ಼ ಚಾ಼ಲೀತೆ ಖ್ಹಾರಿವಾತೆನ ಯಾಕೋಬನೆ ಲಬಾನನ ಬೊಲ್ಯೊ. 14 ಲಾಬಾನನೆ ಇನ, "ಖ್ಹಾಚಾಮ ತೂ ಮಾರುಸ್ ಲ್ಹೊಯಿಬಿ ಬೋಟಿ ಹುಯಿರೋಸ್" ಕರಿ ಬೊಲ್ಯೊ. ಏಕ್‍ ಮಹಿನಾಲಗೂಬಿ ಯೊ ಲಾಬಾನಕನ ರ‍್ಹಯೊ.

15 ತದೆ ಲಾಬಾನನೆ ಯಾಕೋಬನ, "ತೂ ಮಾರೊ ಸಂಬಂದಿ ಹುಯಿರ‍್ಹೋತೆ ಇನಖ್ಹಾಜೆ ಫುಗಟ್ನಿ ಚಾ಼ಕ್ರಿ ಕರೈಲ್ಯಾವಾನು ಬರೋಬರ್‌ಕೊಯ್ನಿ, ತಾರ ಕಾಮ್‍ನ ಕೆತ್ರ ಪೈಶ ಹೋಣು? ಕರಿ ಪುಛಾ಼ಯೊ. 16 ಲಾಬಾನನ ಬೇ ಛೋ಼ರಿಯೇಥಿ; ಮೋಟಿನು ನಾಮ್ ಲೇಯ, ನ್ಹಾನಿನು ನಾಮ್ ರಾಹೇಲ್. 17 ಲೇಯ ಭುಂಬ್ಳಾ ಡೋಳವಾಳಿ ಹುಯಿರ‍್ಹಿಥಿ, ಕತೋಬಿ ರಾಹೇಲ್‍ ರಂಗ್‌ರೂಪ್ಮ ಶನ್‌ಗಾರ್‌ವಾಳಿ ಥಿ. 18 ಯಾಕೋಬನೆ ರಾಹೇಲ್‍ನ ಪ್ಯಾರ್‌ ಕರುಕರ್ತೊಥೊ ಇನಖ್ಹಾಜೆ, "ತಾರಿ ನ್ಹಾನಿ ಛೋ಼ರಿ ರಾಹೇಲ್‍ನ ವ್ಯಾಹ ಕರಾನಖ್ಹಾಜೆ ಖ್ಹಾತ್‍ ವರಖ್ಹ್‌ ಚಾ಼ಕ್ರಿ ಕರುಸ್" ಕರಿ ಬೊಲ್ಯೊ. 19 ಲಾಬಾನನೆ, "ಇನ ಬಿಜೇಕ್ ಜ಼ಣಾನ ದ್ಯಾವಥೀಬಿ ತುನಾಸ್‍ ದ್ಯಾವಾನು ಅಛ಼್ಛು. ಇನಖ್ಹಾಜೆ ತೂ ಮಾರಿ ಜೋ಼ಡ್ಮ ರ‍್ಹೇ" ಕರಿ ಬೊಲ್ಯೊ. 20 ಆ ಪರಕ್ಮ ಯಾಕೋಬನೆ ರಾಹೇಲ್‍ನಖ್ಹಾಜೆ ಖ್ಹಾತ್‍ ವರಖ್ಹ್‌ ಚಾ಼ಕ್ರಿ ಕರ‍್ಯೊ. ಇನೆ ರಾಹೇಲ್‍ನ ಘಣು ಪ್ಯಾರ್ ಕರ‍್ಯೊತೆ ಇನಖ್ಹಾಜೆ ಯೊ ಇನ ಥೋಡ ದನ್ನಿತರಸ್ ದೆಖಾಯು. 21 ಇನಾಪಾರ್ ಯಾಕೋಬನೆ ಲಾಬಾನನ, "ಮಾರಿ ಚಾ಼ಕ್ರಿನಿ ವಖ್ಹತ್ ಖ್ಹತಮ್ ಹುಯಿಗು. ತಾರಿ ಛೋ಼ರಿನ ಮನ ವ್ಯಾಹ ಕರೀದೆ" ಕರಿ ಬೊಲ್ಯೊ. 22 ತದೆ ಲಾಬಾನನೆ ಯೊ ಗಾಮ್‌ವಾಳ ಖ್ಹಾರಾಸ್ನ ವ್ಯಹಾನಿ ಇರಂದಿ ಪಿಕಾಯೊ. 23 ಕತೋಬಿ ರಾತ್ನಿ ವೇಳ್ಮ ರಾಹೇಲ್‌ನ ಬದಲ್‌ ಇನಿ ಮೋಟಿ ಛೋ಼ರಿ ಲೇಯನ ಯಾಕೋಬಕನ ಮೋಕ್‌ಲ್ಯೊ. ಇನೆ ಲೇಯನ ಮಳ್ಯೊ. 24 ಲಾಬಾನನೆ ಇನಿ ಛೋ಼ರಿ ಲೇಯನ ಜಿಲ್ಪಾ ಕರಿ ಎಕ್ ದಾಸಿನದಿದೊ. 25 ವ್ಹಾಣೆ ದೇಖಾಖ್ಹತರ್‌ ಯೊ ಲೇಯ ಕರಿ ಯಾಕೋಬನ ಮಾಲುಮ್ ಪಡ್‌ತಾನ ಇನೆ ಲಾಬಾನನ, "ತೂ ಮನ ಅಮ್‌ ಶನ ಕರ‍್ಯೊ? ರಾಹೇಲ್‍ನಖ್ಹಾಜೆ ತುನ ಚಾ಼ಕ್ರಿ ಕರ‍್ಯೋನಿ; ಶನಾ ಮನ ಠಗಾಯೋತೆ?" ಕರಿ ಬೊಲ್ಯೊ, 26 ಲಾಬಾನನೆ, "ಮೋಟಿ ಛೋ಼ರಿಥಿ ಅಗಾಡಿ ನ್ಹಾನಿ ಛೋ಼ರಿನ ವ್ಯಾಹ ಕರಿದ್ಯಾವಾನು ಹಜ಼್ಜಾನು ಪದತ್ತಿಕಾಹೆ. 27 ಮೋಟಿನಿ ಜೋ಼ಡ್ಮ ವ್ಯಹಾನೊ ಥೋಡ ದನ್‌ಕಾಡ್‌ ಇನಬಾದ್‌ಮ ಮಾರಿ ನ್ಹಾನಿ ಛೋ಼ರಿನಾಬಿ ತುನ ದೆವುಸ್; ಅನಾಖ್ಹಾಜೆ ತೂ ಬಿಜೂ಼ಬಿ ಖ್ಹಾತ್ ವರಖ್ಹ್ ಚಾ಼ಕ್ರಿ ಕರ್‌" ಕರಿ ಬೊಲ್ಯೊ. 28 ಯಾಕೋಬ ಯೊ ವಾತ್ನ ಮಾನೀನ್ ಲೇಯನಿ ಜೋಡ್ಮ ವ್ಯಹಾನ ದನ್ನ ಪೂರಕರ‍್ಯೊ. ತದೆ ಲಾಬಾನನೆ ಇನಿ ನ್ಹಾನಿಛೋ಼ರಿ ರಾಹೇಲ್‍ನ ಯಾಕೋಬನ ವ್ಯಾಹ ಕರಿದಿದೊ. 29 ಲಾಬಾನನೆ ಇನಿ ದಾಸಿ ಬಿಲ್ಹಾನ ಇನಿ ಛೋ಼ರಿ ರಾಹೇಲ್‍ನ ದಾಸಿ ಕರಿದಿದೊ. 30 ಯಾಕೋಬನೆ ರಾಹೇಲ್‍ನ ಮಳಿನ್ ಇನ ಲೇಯಥೀಬಿ ಜಾ಼ಖ್ಹತ್ ಪ್ಯಾರ್‌ ಕರ‍್ಯೊ. ಇನಖ್ಹಾಜೆ ಲಾಬಾನಕನ ಬಿಜೂ಼ಬಿ ಖ್ಹಾತ್ ವರಖ್ಹ್ ಚಾ಼ಕ್ರಿಕರ‍್ಯೊ.

ಯಾಕೋಬನ ಲಡ್ಕಾ

31 ಅಮ್‌ರ‍್ಹಾವಪರ್ ಲೇಯ ಯಾಕೋಬನ ಪಸಂದ್ ಕೊಯ್ನಿಕರಿ ಯೆಹೋವ ದೇವ್ನ ಮಾಲುಮ್‍ಪಡೀನ್, ಯೊ ಬೇಜೂನಿ ಹುವಾನಿತರ ವಾರ್‌ಖ್ಹೊದಿದೊ; ರಾಹೇಲ್‍ ವಾಂಝ್‌ಣಿ ಹುಯ್‍ರೀಥಿ. 32 ಲೇಯ ಬೇಜೂನಿಹುಯಿನ್‌ ಪರ್ಖ್ಹೊ ಲಡ್ಕು ಜ಼ಣೀನ್, "ಯೆಹೋವನೆ ಮಾರಿ ಹಾಲತ್‍ನ ದೇಖ್ಯೊ, ಅನಾಪಾರ್ ಮಾರೊ ಬಾವ್ರಿ ಮನ ಪ್ಯಾರ್‌ ಕರ್ಶೆ. ಕರಿ ಬೋಲಿನ್ ಇನ *29:32 ಹಿಬ್ರು ವಾತೇಮ, ದೇಕ್‌ ಏಕ್‌ ಛಿಯ್ಯೊ ಮಾರಿ ದುಖ್‌ನ ದೇಖ್ಯೊ‘ರೂಬೇನ್’ ಕರಿ ನಾಮ್‌ಮ್ಹೇಲಿ" 33 ಯೊ ಪಾಛಿ ಬೇಜೂನಿ ಹುಯಿನ್‌ ಪರ್ಖ್ಹೋ ಲಡ್ಕು ಜ಼ಣಿ, "ಮೇ ಬಾವ್ರಿನ ಪಸಂದ್ ಕೋಹುಯ್ನಿಕರಿ, ಯೆಹೋವನೆ ಮಾಲುಮ್‍ ಕರಿನ್‌ ಆ ಲಡ್ಕಾನ ದಿದೊಕರಿ ಇನ ‘ಸಿಮೆಯೋನ್‌’ ಕರಿ ನಾಮ್‌ಮ್ಹೇಲಿ" 34 ಯೊ ಪಾಛಿ ಬೇಜೂನಿ ಹುಯಿನ್‌ ಪರ್ಖ್ಹೊಲಡ್ಕು ಜ಼ಣೀನ್, "ಹಮ್ಕೆತೋಬಿ ಮಾರೊ ಬಾವ್ರಿಬಿ ಮೇಬಿ ಎಕ್ಟ ರ‍್ಹಿಶು, ಇನ ತೀನ್‍ ಪರ್ಖ್ಹಾ ಲಡ್ಕಾವ್ನ ಜ಼ಣಿ ದಿರಾಖಿಸ್ನಿ" ಕರಿ ಬೋಲಿನ್ ಇನ "ಲೇವಿ" ಕರಿ ನಾಮ್‌ಮ್ಹೇಲಿ. 35 ಯೊ ಬಿಜೂಪಾಛಿ ಬೇಜೂನಿ ಹುಯಿನ್‌ ಪರ್ಖ್ಹೊಲಡ್ಕು ಜ಼ಣೀನ್, "ಹಮ್ಕೆ ಮೇ ಯೆಹೋವನ ಸ್ತುತಿಕರುಸ್" ಕರಿ ಬೋಲಿನ್ ಇನ "ಯೆಹೂದ" ಕರಿ ನಾಮ್‌ಮ್ಹೇಲಿ. ಇನಾಪಾರ್‌ ಲೇಯನ ಲಡ್ಕಹುವಾನು ಭೀರಿಗಯು.