Gênesis 38

ಯೆಹೂದ ಅಜು಼ ತಾಮಾರ

1 ಯೊ ಹಗಾಮ್ಮ ಯೆಹೂದ ಇನ ನ್ಹಾನ ಭೈಯೇನ ಮ್ಹೇಲಿನ್‌ ಘಾಟ್ ಉತ್ರೀನ್ ಅದುಲ್ಲಾಮ್ ಗಾಮ್‌ವಾಳೊ ಹೀರಾ ನಾಮ್‌ವಾಳಕನ ರ‍್ಹವಾನ ಗಯೊ. 2 ಹಿಜ್ಜಾ಼ ಯೆಹೂದನೆ ಕಾನಾನ್ಯ ಹುಯಿರೋತೆ ಶೂಗನಿ ಛೋ಼ರಿನ ದೇಖಿನ್ ಇನ ವ್ಯಹಾಕರಿಲಿದೊ. 3 ಯೊ ಬೇಜೂನಿ ಹುಯಿನ್ ಯೆಹೂದನ ಎಕ್ ಪರ್ಖ್ಹೊಲಡ್ಕು ಜ಼ಣಿ. ಇನ ಯೆಹೂದನೆ ‘ಏರ್‌’ ಕರಿ ನಾಮ್‌ಮ್ಹೇಲ್ಯೊ. 4 ಯೊ ಪಾಛು಼ ಬೇಜೂನಿಹುಯಿನ್ ಪರ್ಖ್ಹೊಲಡ್ಕು ಜ಼ಣಿ, ಇನ ‘ಓನಾನ್’ ಕರಿ ನಾಮ್‌ಮ್ಹೇಲಿ. 5 ಪಾಛಿ ಬೇಜೂನಿಹುಯಿನ್‌ ಪರ್ಖ್ಹೊಲಡ್ಕು ಜ಼ಣಿನ್ ಇನ ‘ಶೇಲಹ’ ಕರಿ ನಾಮ್‌ಮ್ಹೇಲಿ. ಹೈರಿತೆ ಆ ಲಡ್ಕು ಜ಼ಣಾನಿವಖ್ಹ್‌ತೆ ಯೆಹೂದ ಕೆಜೀಬ್ ಗಾಮ್ಮಥೊ. 6 ಯೆಹೂದನೆ ಇನೊ ಮೋಟೊಛಿಯ್ಯೊ ಏರನ ‘ತಾಮಾರ’ ಕರಿ ಛೋ಼ಕ್ರಿನ ಲಯಿನ್ ವ್ಯಾಹ ಕರ‍್ಯೊ. 7 ಕತೋಬಿ ಯೆಹೂದನೊ ಮೋಟೊಛಿಯ್ಯೊ ಏರ ಯೆಹೋವನಿ ನಜ಼ರ್‌ಮ ಖರಾಬ್‌ ಹುಯಿರೋಥೊ. ಇನಾಖ್ಹಾಜೆ ಯೆಹೋವನೆ ಇನ ಮಾರಿನಾಖ್ಯೊ. 8 ಇನಕೇಡೆಥು ಯೆಹೂದನೆ ಓನಾನನ, "ತೂ ತಾರಿ ಮುಂಡಚ್ಚಿ ಭೋಜೈ಼ಕನ ಖ್ಹುಯಿನ್ ದೇವರ್‌ನು ಕರ್ನುತೆ ಪರಕ್ಮ ಬರೋಬರ್‌ಥಿ ಚಾ಼ಲಿಲಿನ್ ತಾರಭೈನ ಪಿಳ್ಗಿ ಭಡಾವ್" ಕರಿ ಬೊಲ್ಯೊ. 9 ಕತೋಬಿ ಓನಾನನೆ, ಅಮ್‌ ಹುವಾನು ಪಿಳ್ಗಿ ಮಾರು ಉಶೆಕೋಯ್ನಿ ಕರಿ ಮಾಲುಮ್‌ಕರಿಲಿದೊ. ಮೋಟಭೈನಿ ಪಿಳ್ಗಿ ಪೈದಕರಾನ ಯೊ ಮಾನ್ಯೊಕೊಯ್ನಿ. ಇನಿ ಭೋಜೈನಿ ಜೋಡ್ಮ ಖ್ಹುತೊಥೋತೆ ತದೆ ಇನೆ ಕಾಮಾನ ರಖ್ಹ್‌ನ ಬಿಛಾ಼ವ್ಣಪರ್ ರಂಚಿನಾಖಿ ದೆತೋಥೊ. 10 ಆ ಚಾ಼ಲ್ ಯೆಹೋವನಿ ನಜ಼ರ್‌ಮ ಖರಾಬ್‌ಥೂತೆ ಇನಖ್ಹಾಜೆ ದೇವ್ನೆ ಇನ ಮಾರಿನಾಖ್ಯೊ. 11 ಇನಪಾರ್ ಯೆಹೂದನೆ, ಏಕ್‌ವೇಳ್ ಶೇಲಹಬಿ ಇನ ಭೈಯೆನಿ ತರಾಸ್ ಮರಿಜಾ಼ಶೆಕರಿ ಸೋಚಿನ್ ಇನಿ ವ್ಹವ್ ತಾಮಾರನ, "ಮಾರೊಛಿಯ್ಯೊ ಶೇಲಹ ಜ಼ವಾನಿ ಹುವಾಲಗು ತೂ ಮುಂಡಚ್ಚಿಹುಯಿನ್ ಅಯಾಬಾನ ಘರ್‌ಮರ‍್ಹೆ" ಕರಿ ಭಾಣುಕರ‍್ಯೊ ಯೊ ಆಯಾಬಾನ ಘರ್ಮಜೈ಼ನ್ ಹಿಜ್ಜಾ಼ಸ್‌ ಜಿವ್ಣುಕರಿ. 12 ಥೋಡ ದನ್ನಪಾರ್ ಯೆಹೂದನಿ ಬಾವಣ್ ಹುಯಿರ‍್ಹಿತೆ ಶೂಗನಿ ಛೋ಼ರಿ ಮರಿಗೈ. ಯೆಹೂದನೆ ದುಖ್‌ಭೈಕಿ ಹುಯಿಜಾ಼ವಾದಿನ್‌, ಇನ ಮೇಂಢಾನ ರುಯ್‌ ಕತ್ರಾವಾಳಕನ ಇನೊ ದೋಸ್ತಿ ಹೀರಾ ಕರಿ ಅದುಲ್ಲಾಮ್ಯವಾಳನಿ ಜೋ಼ಡ್ಮ ತಿಮ್ನಾಗಾಮ್‌ನ ಗಯೊ. 13 ಮಾಮ ಇನು ಮೇಂಢಾವ್ನು ರುಯ್‌ ಕತ್ರಾನ ಖ್ಹಾಜೆ ತಿಮ್ನಾ ಗಾಮ್ನ ವಳ್ಯೋಜಾ಼ಸ್ ಕರಿ ಬೋಲಾನಿ ವಾತ್ ತಾಮಾರನ ಖ್ಹಮಜ್ ಪಡ್ಯು. 14 ತದೆ ಇನೆ, ‘ಶೇಲಹ ಜ಼ವಾನಿ ಹುಯಿಗೊತೋಬಿ ಮನ ಇನಿಜೋ಼ಡ್ಮ ಬಾವಣ್‍ ಕರಾಯೊಕೊಯ್ನಿನಿ’ ಕರಿಬೋಲಿನ್ ಇನು ಮುಂಡಚ್ಚಿನು ಲುಂಗ್ಡಾನ ಕಾಡಿಮ್ಹೇಲಿನ್‌ ಘುಮ್‌ಟೊ ನಾಖಿನ್ ಶನ್‍ಗಾರ್‌ಕರಿನ್ ತಿಮ್ನಾಗಾಮ್‌ನು ವಾಟ್‌ಪರ್‌ ಏನಯಿಮ್ ಗಾಮ್‌ನು ದರ‍್ವಾಜ಼ಕನ ಬೇಶಿಗೈ. 15 ಯೆಹೂದನೆ ಇನ ದೇಖಾನಿವಖ್ಹ್‌ತೆ ಇನ ಮ್ಹೋಡಪರ್ ಘುಮ್‌ಟೊ ಥೋತೆ ಇನಖ್ಹಾಜೆ ಇನ ಶೂಳೆ ಕರಿ ಲಾಝ್ಯೊ. 16 ಇನ ವ್ಹವ್‌ಕರಿ ಮಾಲುಮ್‌ ಪಡ್ಯುಕೊಂತೆ ವಾಟ್ಪರ್‌ಥೊ ವ್ಹೇಡಿ ಇನಾಕನ ಜೈ಼ನ್, "ಮಾರಿಜೋ಼ಡ್ಮ ಖ್ಹುವಾನ ಆವಸ್‌ಕಿಶೂ?" ಕರಿ ಬುಲಾಯೊ. ಇನೆ, "ಆವ್ಣುಕತೊ ಶಾತ್‌ದೀಶ್?" ಕರಿ ಬೋಲಿ. 17 ಇನೆ, "ಮಂಧಾಮಾಥೊ ಎಕ್ ಬೋಕ್ಡೊ ದೀನ್ ಮೋಕ್ಲುಸ್, ಕರಿಬೋಲಖ್ಹತರ್ ಇನೆ ಬೋಲಿ ಯೊ ದ್ಯಾವಲಗು ಮಾರಕನ ಶಾತ್ತೋಬಿ ಆಡುಮ್ಹೇಲಾಸ್ ಕಿಶು? ಕರಿಬೋಲಿ. 18 ಇನೆ, ಮೇ ಶಾತ್ ಆಡುಮ್ಹೇಲು ಕರಿ ಬೋಲಾಖ್ಹತರ್ ಹೈರಿತೆ, ತಾರೊ ಮುದ್ರಾನಿ ಅಂಗೂಠಿ, ಕಂದೋರೊ, ಹಾತ್ಮಾನೊ ಲಠ್ಠೊ, ಆ ತೀನ್ನಾಬಿ ಮ್ಹೇಲ್ ಕರಿಬೋಲಿ. ಇನೆ ಯೊ ಅಖ್ಖು ದೀನ್ ಇನಾಕನ ಖ್ಹುತೊ. ಹೈರಿತೆ ಇನಾಕನ ಬೇಜೂನಿ ಹುಯಿ. 19 ತದೆ ಯೊ ಘರ್ಕನ ಆಯಿನ್ ಇನೆ ಫೇರಿರಾಖಿಥೀತೆ ಘುಮ್‌ಟಾನ ಕಾಡಿ ಮ್ಹೇಲಿನ್ ಮುಂಡಚ್ಚಿನು ಪೇರ್ವಾಖ್ಹೊ ಪಾಛಿ ಫೇರಿಲಿದಿ. 20 ಯೆಹೂದನೆ ಯೊ ತಯೇಡಕನ ಮ್ಹೆಲ್ಯೋತೆ ಆಡು ಛೋ಼ಡಾವಾನಖ್ಹಾಜೆ ಇನೊ ದೋಸ್ತಿ ಹುಯಿರೋತೆ ಅದುಲ್ಲಾಮ್ಯನ ಹಾತ್ಮ ಬೋಕ್ಡಾನು ಚೆಲ್ಕಾನ ದಿಮೋಕ್ಲಾಖ್ಹತರ್ ಯೋಹೈರಿತೆ ಇನ ಮಳಿಕೊಯ್ನಿ. 21 ಅದುಲ್ಲಾಮನೆ ಇನ ಗಾಮ್‌ವಾಳನ, "ಏನಯಿಮ್‌ಗಾಮ್ಕನ ವಾಟ್ನ ಭೀಡೆ ಬೆಠಿಥೀತೆ ಶೂಳೆಕ್ಯಾ?" ಕರಿ ಪುಛಾ಼ವಖ್ಹತರ್‌ ಇವ್ಣೆ, "ಹಜ್ಜಾ಼ ಖೆವಿ ಶೂಳೇಬಿ ಕೊಯ್ನಿ" ಕರಿ ಬೋಲ್ಯು. 22 ಇನೆ ಯೆಹೂದಕನ ಪಾಛೋ಼ಫರಿ ಆಯಿನ್, "ಮನ ಯೊ ಮಳಿಕೊಯ್ನಿ ಅಜು಼ ಪುಛಾ಼ವನಿ ವಖ್ಹ್‌ತೆ ಯೊ ಗಾಮ್‌ವಾಳು ಹಜ್ಜಾ಼ ಖೆವಿ ಶೂಳೇಬಿಕೊಯ್ನಿ" ಕರಿ ಬೋಲ್ಯು. ಕರಿ ಖ್ಹಮ್‌ಜಾ಼ಡ್ಯೊ. 23 ಇನಖ್ಹಾಜೆ ಯೆಹೂದನೆ, "ಬಿಜು಼ ಅಪ್ಣೆ ಖ್ಹರಮ್‌ ಕಡೈಲಿಶು ಮೇ ಮ್ಹೇಲ್ಯೋತೆ ಆಡು ಯೋಸ್ ರಾಖಿಲ್ಯಾವಾದೆ, ಮೇತೊ ಬೋಕ್ಡಾನ ಚೆಲ್ಕಾನ ದೀಮೋಕ್‌ಲ್ಯೊ, ಯೋಹೈರಿತೆ ತುನ ಮಳಿಕೊಯ್ನಿ ಎತ್ರೇಸ್ ಕರಿ ಬೊಲ್ಯೊ. 24 ಖ್ಹುಮಾರ್ ತೀನ್‌ಮಹಿನ ಹುವಾದಿನ್ ಯೆಹೂದನೆ, ಇನಿ ವ್ಹವ್ ತಾಮಾರ ವ್ಯಬಿಚಾರ್‌ಥಿ ಬೇಜೂನಿ ಹುಯಿರೀಸ್ ಕರಿ ಖಬರ್‌ನ ಖ್ಹಮ್‌ಜಿನ್, "ಇನ ಭಾರ್‌ಖೇಚಿಲ್ಯಾವೊ, ಬಾಳಿನಾಕ್ಣು" ಕರಿ ಬೊಲ್ಯೊ. 25 ಇವ್ಣೆ ಇನ ಭಾರ್ ಖೇಚಿ ಲ್ಯಾವನಿವಖ್ಹ್‌ತೆ, ಹೈರಿತೆನೆ ಇನೊ ಮಾಮನ, ಯೊ ಆಡು ಮ್ಹೇಲಿಹುಯು ಜಿನಖ್ಹ್‌ಅಖ್ಖು ಮೋಕ್ಲಿನ್, "ಆ ಅಖ್ಖು ಕಿನೂಕಿ ಯೋಸ್ ಅದ್ಮಿಥೀಸ್‌ ಮೇ ಬೇಜೂನಿ ಹುಯಿರೀಸ್ತೆ. ಮುದ್ರಾನಿ ಅಂಗೂಠಿ, ಧಾಗೊ, ಲಠ್ಠೊ ಆ ಅಖ್ಖಾನಿ ಖ್ಹಣೇದ್ ದೇಖಿನ್ ಮಾಲುಮ್ ಕರಿಲಿಯೇಜಾ಼ಯ್" ಕರಿ ಬೋಲಿ ಮೋಕ್ಲಿ. 26 ಯೆಹೂದನೆ ಯೊ ಅಖ್ಖಾನು ಖ್ಹಣೇದ್ ಧರೀನ್, "ಮೇ ಮಾರೊಛಿಯ್ಯೊ ಶೇಲಹನ ಇನ ವ್ಯಾಹ ಕರಿ ದಿದೊಕೊಂತೆ ಇನಖ್ಹಾಜೆ ಯೊ ಮಾರೇಥಿಬಿ ನ್ಯಾವ್‌ಥೀಸ್ ಚಾ಼ಲಿಲಿದಿ." ಕರಿ ಬೊಲ್ಯೊ. ಇನೆ ಪಾಛೊ಼ ಇನಿ ಖ್ಹಂಗ್‌ ಕರ‍್ಯೊಕೊಯ್ನಿ. 27 ತಾಮಾರನ ಜ಼ಣತ್‌ನ ದನ್ ಆವಾನಿವಖ್ಹ್‌ತೆ ಇನಪೇಟ್‌ಮ ಅವ್ಳಿಜವ್ಳಿ ಲಡ್ಕರ‍್ಹಾವಾನು ಮಾಲುಮ್ ಪಡ್ಯು. 28 ಯೊ ಜ಼ಣ್‌ವಾನಿವಖ್ಹತ್ ಎಕ್ ಲಡ್ಕು ಹಾತ್ ಖ್ಹಾಮೆ ಕರ್ತಾನ ತದೆ ಜ಼ಣಾವವಾಳಿನೆ, "ಆ ಪಹಿಲೆ ಪೈದಹುಯು" ಕರಿ ಇನ ಹಾತ್ನ ಲಾಲ್ ಧಾಗೊ ಭಾಂದಿ. 29 ಕತೋಬಿ ಯೊ ಹಾತ್ ಪಾಛು಼ ಕಾಡಿಲಿದು. ಇನಿ ಜೋ಼ಡ್ಮ ಥೂತೆ ಬಿಜೇಕ್ ಲಡ್ಕು ಪೈದಹುಯು. ಇನ ಜ಼ಣಾವವಾಳಿನೆ ದೇಖಿನ್‌, "ತೂ ಧಕೇಲಿನ್ ಆಯೋನಿ" ಕರಿ ಇನಖ್ಹಾಜೆ ಯೊ ಲಡ್ಕಾನ ‘ಪೆರೆಚ್‌’ ಕರಿ ನಾಮ್‌ಹುಯು. 30 ಇನಪಾರ್ ಹಾತ್ನ ಲಾಲ್‌ಧಾಗೊ ಭಂದಾಯುಹುಯು ಲಡ್ಕು ಪೈದಹುಯು. ಇನ, ‘ಜೆರಹ’ ಕರಿ ನಾಮ್‌ಹುಯು.