1 Mamwenye 2

Che Daudi akwapa che Selemani malajisyo

1 Che Daudi paŵaŵandichile kuwa, ŵaŵilasile che Selemani mwanagwe ni kwapa malajisyo gambesi achitiji, 2 "Mwanangu une awuwu uli ulendo. Nlimbe ntima ni kuŵa ni ntima wangali woga. 3 Ngakamulisye gaakunlajisya Ambuje Akunnungu, Akunnungu ŵenu, ntendeje gaakugasaka ni kukamula malajisyo gakwe ni makanyo gakwe, kugachimbichisya malamusi gao mpela yaitite pakulembekwa mu malajisyo ga che Musa, kuti indu yose injendele uchenene, ni kukola upile kwakulikose kuchinjaule. 4 Mwaajitichisyaga Ambuje Akunnungu, nombewo chakwanilisye lilangano lyao liŵalitesile kwa une paŵaasalile kuti, ‘Iŵaga uŵelesi wenu taachitama yakutikusachilwa, ni iŵaga takamulisye malajisyo gangu kwa mitima jao jose, nganlepela kukola mundu jwakutamila chitengu cha umwenye cha Isilaeli.’