1 Kama gɔ i igara ɔɔna kasɛ i ɔ̃ igaraiyo fiɛ Bosate ɔɔtã wũ iwarã ɔbɔrɛgu i ɔ̃ matsirise ɔɖuɖu nrɔɔ̃ ame ne, 2 ɔɣere kanyaɖidze Natan sɔ, "Nyɔ, losi i seder kukolo igaraiyo ame, gɔ i Ɣaa ndamu aɖaka se i ikpayo ame."

3 Ne Natan ɔtã igara mmuai sɔ, "Irabiara nɛ mpia-ɔ i iti ame ne, bara, alasɔ Bosate piagu-ɔ."

4 Ɣɛɛ kasɛ̃ gamɔ ne, Bosate itɔ̃me ɔba Natan sɔ:

5 "Kɛlɛ aaɣere wũ ɔɖabo David sɔ, ' Bosate sɔ: Iiɖe fɔ loatsue iyo atã me losɛ i kame. 6 Ita i ɔwi wɔ lokɔ Israel mabi lobɔrɛgu i Egipte karɔ̃ iso ibo nɔme ne, loɔwe loki i kakɔi kawɛ̃ lokɛlɛ kakɔi mama gɔ ikpayo nɖe wũ kasɛkɔ. 7 Kakɔi biara ga loɔki gu Israel mabi ne, loɔkarɛ mma loɖi sɔ makɔkɔ wũ kaɖe Israel sɔ, "Be ɔso aitsue seder kukolo iyo atã me?" '

8 Kiniɔ ne, ɣere wũ ɔɖabo David sɔ, ' Bosate Ɔlesate sɔ: Lokɔ-ɔ lobɔrɛgu i masɛrɛ sikuakaɖekɔ̃, masɛrɛ inyɔiso karabara ame, lobara-ɔ nwɔ loaɖe wũ kaɖe Israel iso. 9 Loɔwegu-ɔ i kakɔi biara ga ɔɔki fiɛ loɔɖoe fɔ matsirise ma loki malɔ-ɔ i fɔ anɔ. Kiniɔ ne, loatã fɔ iyere ɔre, lɛ karɔ̃ iso maturi ma lofɔ iyere maɖo ɔwɛ̃. 10 Loatã wũ kaɖe Israel kasɛkɔ̃ fiɛ loato ma lɛ ɔraɖui, si maawe ma mɔmɔ karɔ̃ fiɛ kuwɛ̃ iisibaɖaa ma. Matilese iisibaɖe ma iso lɛ mabara ku karɔ̃kasɛkɔ̃, 11 fiɛ mala maɔbara ku ɔwi wɔ lotã makɔdze ɔkɔ wũ kaɖe Israel. Loatã-ɔ iwarã ana i fɔ matsirise ɔɖuɖu nrɔɔ̃ ame.

"Bosate sɔ tsue sɔ Bosate mɔmɔ loasɛra iyo ɔtã-ɔ: 12 Si fɔ agbanayi ɔɔsɔ̃ fiɛ ɔɔkora kama ne, loatara fɔ ɔkparɛ, fɔ mɔmɔ ɔbi fiɛ loasɛra ɔ̃ sigaraɖekɔ̃ i fɔ kama. 13 Ɔ̃ nɖe nwɔ loatsue iyo ɔtã wũ Iyere fiɛ loatã ɔ̃ sigaraiyara iibaturi inya kayi daaro. 14 Loaɖe wũ ɔse, fiɛ ɔ̃aɖe wũ ɔbibirɛrɛĩ. Si ɔɣɛrɛ ne, loasu maturi awune lɛ kadziri lokpadzɛ̃ wũ kutsue. 15 Ɣɛɛ wũ kuɖɔɛ gɔ loba lotã wũ iibaro i wũ anɔ, lɛ lomɔɛ̃ kuɖɔɛ loɖi i Saul gɔ lotara fiɛ ato aba awe. 16 Fɔ iyo gu fɔ sigarakaɖekɔ̃ aaya me i anɔ ɔwi daaro, fɔ sigaraiyara iibaturi inya.' "

17 Natan ɔba ɔ̃aɣere David kaɖikate atɔ̃me ɔɖuɖu wagbe.

18 Ɔwi kama ne Igara David ɔkɛlɛ ɔsɛ ɔ̃asɛ i ikpayo nɛ ɔɣedza ɔtã ndamu aɖaka i Bosate anɔ fiɛ ɔɣɛ sɔ,

Bosate Wɔ Nsiguso, loiɖe kuira, fiɛ wũ iyo maturi iiɖe kumawɛ̃ fiɛ ɔɔkɔ me aba aabogu ta ngbe. 19 O Bosate Wɔ Nsiguso fiɛ lɛ nnɛgbe iisi-ɔ ne, ɔɔɣɛ ara sɛɛ asɛ i fɔ ɔɖabo iyo iso. O Bosate Wɔ Nsiguso, kumɛgɔgbe nɖe ɔri wɔ iso asɛ abara ara ku ɔturi biara?

20 "Be i David aaɣɛ ɔbua ana? O Bosate Wɔ Nsiguso, ala aɣe fɔ ɔɖabo. 21 I fɔ itɔ̃me iti gu fɔ kuɖɔɛ kanya ne, ɔɔbara ira siare nɛgbe fiɛ ɔɔtã fɔ ɔɖabo ɔtsue ne.

22 "Amɔ lo Bosate Wɔ Nsiguso! Kuwɛ̃ iise lɛ fɔ, fiɛ Ɣaa mama kuwɛ̃ na iɖo fɔ, lɛ boɔnɔ ala bo mɔmɔ atsue. 23 Fiɛ Kaɖe kukawɛ̃ ga nse lɛ fɔ maturi Israel na - kaɖe kawɛ̃ ga iti i Ɣaa ɔsɛ ɔ̃atã kuso ɔfɔ ɔtã so, sɔ ɔ̃afɔ iɣere ɔtã so fiɛ ɔbara awawãra siare gu nwa mba ifɔ̃ gɔ ɔsa nɖebi gu ma aɣɔ i fɔ maturi ma aɖi atã so, mma iti atã kuso fiɛ aɖi abɔrɛgu i Egipte karɔ̃ iso katɔ̃. 24 Ɔɔsɛra Israel kaɖe lɛ fɔ mare ɔwi daaro fiɛ Bosate ɔɔkpese ma Ɣaa lo.

25 "Kiniɔ ne, Bosate Ɣaa, mɔɛ̃ kaɣɛkasɛ ga abara i fɔ ɔɖabo gu i ɔ̃ iyo iso la ɔwi ɖaa. Bara lɛ aɣɛ asɛ, 26 si fɔ iyere aare kayi daaro. Iyɔ maturi aaɣɛ sɔ, ' Bosate Ɔlesate nɖe Ɣaa i Israel kaɖe iso!' Fiɛ fɔ ɔɖabo David iyo aana kayakpa i fɔ anɔ.

27 "O Bosate Ɔlesate wɔ nɖe Israel Ɣaa, ɔɔɖi nnɛgbe ate fɔ ɔɖabo aɣɛ sɔ, 'Loatsue iyo lotã-ɔ.' Ne ɔso i fɔ ɔɖabo ɔna ɔtu ɔto ɔkparamakayi ɔɣere-ɔ nwagbe ne. 28 O Bosate Wɔ Nsiguso, Ɣaa aɖe! Fɔ ndamu ɖe nnɛ iso maasiaiti fiɛ ɔɔɣɛ ara sɛɛ wagbe asɛ i fɔ ɔɖabo iso. 29 Kiniɔ ne, tã so si siɣɔ-ɔ si afere fɔ ɔɖabo iyo kusɛkusɛ sɔ iakɛlɛ i katɔ̃ iya i fɔ anɔ kayi daaro ala fɔ Bosate wɔ Nsiguso loɔɖeika fiɛ ku fɔ kusɛkusɛ ne, fɔ ɔɖabo iyo to iaɖe kusɛkusɛ kayi daaro."