1 Cikpai Vuzavaguɗu.

Cikpai Vuzavaguɗu adama a na a̱yi vuza kasingai ɗa,

ucigi u ni u na u tsu sabaꞋa ba wi ta̱ lo ko wannai.

2 Yayi u kusala ili i gbagbain

i na Vuzavaguɗu u yaꞋin,

ko u dansa ucikpi u ni?

3 Aza a̱ ma̱za̱nga̱ a ɗa,

ele na a̱ ka̱na̱i ukuna wu usuɓi,

ele na a ci yaꞋan i na yi derere makyan dem.

4 Ciɓa nu mpa, Vuzavaguɗu,

ayin a na baci vu yaꞋankai uma a̱ nu kasingai,

ɓa̱nka̱ mu Vuzavaguɗu,

a ayin a na baci vu wawai le,

5 ciya̱ m pana uyoꞋo wu ulyaꞋi u kelime

wa aza a na vu zagbai,

ciya̱ n yaꞋan feu ma̱za̱nga̱ n uma a̱ nu,

ka̱ta̱ n uwa a̱ ka̱tsuma̱ ka

ili yi uka̱ni i nu n kucikpa.

6 Tsu nusa ta̱,

tsu na ikaya i tsu i yaꞋin,

ci yaꞋan derere ba,

ci yaꞋin ka gbani-gbani.

7 Ayin a na ikaya i tsu yi ishi a Masar,

a zuwaka n ukuna wu ili i mereve i nu ba,

a ciɓa n ucigi u nu u na u tsu sabaꞋa ba.

ɗa a yaꞋin ugbamiwasuvu

a Mala ma Shili.

8 N nannai dem,

ɗa u wawai le adama a kula ku ni.

Ciya̱ u yotsongu utsura u ni,

u gbayin u ɗa.

9 U ɓarangi Mala ma Shili,

ɗa me ɗekpei.

U tonoi n ele punu

adanshi iɗika i ɗekpu i ɗa.

10 U wawai le

e ekiye a irala.

U shiba̱i le,

e ekiye aza a na a iwain le.

11 Ɗa mini ma lyaꞋi irala i le.

ko vuza te a̱ ka̱tsuma̱ ke le u laꞋa ba.

12 Ɗa e nekei a̱ɗu n uzuwakpani u ni,

ɗa a cikpai ni.

13 Ama gogoꞋo lo ɗa a cinukpai

n ili i na u yaꞋankai le,

a vana odoki a̱ ni ba.

14 A̱shi a wuya a̱ ka̱na̱i le e meremune,

ɗa o kondoi Ka̱shile a kakamba ka ɗe.

15 Ɗa u nekei le ili i na o folonoi,

ama ɗa u suꞋuki le nu mɓa̱la̱ m gbani-gbani.

16 A yaꞋin tsurala m Musa a̱ ka̱tsura̱ ka ɗe

koɓolo n Haruna, a̱yi na Vuzavaguɗu we erengi.

17 Iɗika i ɓa̱yuwa̱i ɗa i soɗongi Datan.

ɗa i ciɗa̱ngi uma a Abiram.

18 Akina a lyaꞋi aza a na i o kutono le.

ɗa melentsu ma akina me leɓecei aza a gbani-gbani.

19 A yimai medendem

ma azanariya a Horebu,

ɗa a cikpai ka̱ma̱li ka na a̱ luwa̱i va.

20 O bonoi a ɗikai tsugbayin tsu Ka̱shile

e nekei ka̱ma̱li ko iyoci i kobomburon,

ka na ka tsu takuma ijanu.

21 A cinukpai n Ka̱shile ka na ka wawai le,

a̱yi vu na u yaꞋin ili i gbagbaꞋin a Masar,

22 ili i mereve i na u yaꞋin a iɗika i Ham

n ili i gbagbaꞋin kpamu i na u yaꞋin

a Mala ma Shili.

23 Adama a nannai ɗa u danai

wi ta̱ a ku una le,

ama Musa mazagbi ma̱ ni,

u uwai e mere me le n Ka̱shile,

adama a na u sa̱nka̱ wupa u ni ku una le.

24 Ɗa uma o goyoi iɗika i singai ya.

e neke a̱ɗu n uzuwakpani u ni ba.

25 O yongoi o mololo,

punu a̱ a̱pa̱m e le.

Ɗa a̱ kpa̱ɗa̱i kutono,

kadanshi ka Vuzavaguɗu.

26 Ɗa u kucinakai le,

u ɗengusa̱i ekiye gaɗi u danai.

Wi ta̱ a kuzuwa le a̱ kuwa̱ e meremune,

27 ka̱ta̱ u zuwa ntsukaya n le

n wacuwa a uduniyan kakau,

a̱ kuwa̱ a iɗika yi uduma.

28 A gbaɓai kaci n ka̱ma̱li ka BaꞋalu vu Piyo,

ɗa a lyaꞋi alyuka a na a yaꞋankai

ka̱ma̱li ka na ki n wuma ba,

29 a zuwai Vuzavaguɗu wupa

adama a ili i gbani-gbani i na a yaꞋin,

ɗa ta na ma̱dukpa̱ ma uwai le.

30 Ama Finihasu u ɗa̱nga̱i,

ɗa u kiɗai kadanshi,

ɗa ma̱dukpa̱ ma zuwakai uteku.

31 Adama a ili yi usuɓi i na u yaꞋin,

ɗa yo okpoi ili i kuciɓasa,

ali a kubana a tsukaya n tsukaya.

32 Ɗevu n kuɗolu ku Meriba

a zuwai Vuzavaguɗu wupa,

ɗa kadama ka cinai Musa adama e le,

33 adama a na a yaꞋanka ta̱

Ayinviki a̱ Ka̱shile ugbamiwasuvu,

ali a zuwai Musa wupa

ɗa u dansai wa̱u.

34 Una uma a ba,

tsu na Vuzavaguɗu u danai le ba,

35 ama o bonoi a gbaɓai n uduniyan wa,

o tonoi kuyongo ku le.

36 A cikpai a̱ma̱li uduniyan a,

a na okpoi le maza.

37 A lyukai olobo n ni nkere n le

a̱ ubuta̱ u wunla̱i u gbani-gbani.

38 A̱ tsuwa̱in mpasa

ma aza a na i n unushi ba,

mpasa m muku le olobo ni nkere,

aza a na a lyukai wa̱ a̱ma̱li a KanaꞋana,

ɗa iɗika i na̱mgba̱i

adama a mpasa n le.

39 A natukpai ka̱ci ke le

adama a ili i na a yaꞋin,

o tonoi a̱ma̱li o yoku.

40 Adama a nannai,

ɗa Vuzavaguɗu u yaꞋin wupa n uma a̱ ni,

ali u ka̱na̱i ku ene unata wi ili yi uka̱ni i ni.

41 U nekei le e ekiye uduniyan u yoku,

ɗa irala i le i lyaꞋakai le tsugono.

42 Irala i le i takacikai le,

a gutsakai le, a yaꞋanka le ulinga.

43 U tsu wawa le ta̱ ayin dem,

ama ɗa a̱ ka̱na̱i kuyaꞋanka yi

ugbamiwasuvu,

ali unushi u le u tuka̱i le n kugoyi.

44 Ama ɗa u zuwakai n atakaci e le,

ana u panai ma̱shi me le,

45 ɗa u ciɓai n uzuwakpani u ni n ele,

ɗa u panai asuvayali e le,

adama ucigi u ni u na u tsu sabaꞋa ba.

46 U zuwai aza a na a ɗikai le,

tsa agbashi a̱ sa̱Ꞌi le.

47 Vuzavaguɗu Ka̱shile ka̱ tsu, Wawa tsu,

ka̱ta̱ vu ɓolongu tsu a̱ ubuta̱ wu uduniyan,

adama a na tsu cikpa kula ku ciɗa ku nu

ci neke wu tsugbayin a̱ ubuta̱ u kucikpa wu.

48 Una̱singai a kubana u Vuzavaguɗu,

Ka̱shile ki Isaraila,

a tsukaya a kubana tsukaya,

YaꞋan uma a aduniyan dem a̱ ushuku a dana, <<Ta nannai>>

Cikpai Vuzavaguɗu.