1 Vuzavaguɗu ɗa kutashi ku va̱ n kishi ka̱ va̱,

wovon u yayi n kupana?

Vuzavaguɗu ɗa ubuta̱ u kusheɗeku va̱,

wovon u yayi n kupana?

2 Ɗa baci uma a gbani-gbani a̱ ta̱wa̱i wa̱ a̱ va̱,

adama a na una mu,

i ta̱ a̱ kuta̱ɗa̱tsa̱ a̱ yikpa̱.

3 Ko ɗa baci ka̱tsura̱ ko osoji ka̱ ka̱ra̱Ꞌi mu,

mi a kupana wovon ba,

ko ɗa baci irala i va̱ a̱ tuka̱i mu n kuvon,

n nannai dem mi ta̱ o kuyongo n ka̱ɗu ida̱shi.

4 Ili i te i ɗa n folonoi u Vuzavaguɗu,

ili i na n cigai i ɗanna,

ɗaɗa n da̱sa̱ngu a kpaꞋa ku Vuzavaguɗu,

a ayin a wuma u va̱ ra̱ka̱,

ka̱ta̱ m pana uyoꞋo u Vuzavaguɗu

ka̱ta̱ kpamu n folono yi ɗe A̱Ꞌisa̱ a gbayin a̱ ni.

5 A makyan ma atakaci,

wi ta̱ o kufoɓo mu a̱ ubuta̱ wi ida̱shi i ni,

wi ta̱ a kuzuwa mu gaɗi vu kusan ku ugaɗi.

6 Ta n kulyaꞋa kelime ka irala i va̱ i na i ka̱ra̱Ꞌi nu mpa nannai,

n ma̱za̱nga̱ maꞋa n kuneke alyuka A̱Ꞌisa̱ a gbayin,

mi ta̱ a kuyaꞋan vishipa, n cikpa Vuzavaguɗu.

7 Panaka mu Vuzavaguɗu, makyan ma na baci n ɗekei nu,

pana asuvayali a̱ va̱, vu ushuku mu.

8 Vu danai, <<Ta̱wa̱ wa̱ a̱ va̱.>>

<<Mi ta̱ ta na a̱ kuta̱wa̱ wa̱ a̱ nu, Vuzavaguɗu.>>

9 Vuzavaguɗu,

ka̱ta̱ vu sokongu ku mu a̱shi a̱ nu ba,

ka̱ta̱ vu loko kagbashi ka̱ nu,

a̱ ka̱tsuma̱ ka wupa u nu ba,

avu ɗa vi a̱ kuɓa̱nka̱ mu,

ali a makyan ma ɗe,

Ka̱ta̱ vu ka̱sukpa̱ mu ba,

ka̱ta̱ vu varuku mu ba,

Ka̱shile ka̱ va̱ kishi ka̱ va̱.

10 Ko ɗa baci esheku a̱ va̱ n a̱na̱ku a̱ va̱ a variki mu,

Vuzavaguɗu wi ta̱ a̱ kula̱na̱ mu.

11 PiꞋisaka mu ili i na n kuyaꞋan,

Vuzavaguɗu,

vu tono nu mpa a uye u mejege,

adama a na mi ta̱ n irala na̱ a̱bunda̱i.

12 Ka̱ta̱ vu ka̱sukpa̱ mu n yikpa̱ ekiye a irala i va̱ ba,

aza a na i a kuyaꞋansaka mu kadanshi ka aꞋuwa,

n kadanshi ka kavama.

13 N neke ta̱ ka̱ɗu, mi ta̱ o kuyongo n wuma,

adama a na me ene kasingai ka Vuzavaguɗu,

ka na u kuyaꞋanka uma a̱ ni.

14 Zuwa ka̱ɗu u Vuzavaguɗu,

vu gbama asuvu, vu yaꞋan utsura u ka̱ɗu

zuwa ka̱ɗu u Vuzavaguɗu.