1 Ka̱shile, yotsongu mogono tsu na u kuyaꞋan afada a mayun,

vu zuwa maku mo mogono ma yaꞋan ukuna wu usuɓi.

2 YaꞋan u yaꞋanka uduniyan u nu afada a usuɓi,

u yaꞋanka uma u nu aza a unambi ukuna u mayun.

3 YaꞋan nsasan n tuka̱ n ma̱ta̱na̱ a̱ ubuta̱ u uma,

ka̱ta̱ aginda a̱ tuka̱ n ukuna wu usuɓi.

4 YaꞋan mogono ma yaꞋanka aza a unambi afada a mayun,

u ɓa̱nka̱ muku mo ofoloni,

ka̱ta̱ u takacika aza o modoruko.

5 YaꞋan a pana wovon u nu kanna ki baci lo ko wannai,

wotoi kpamu wi baci lo tsukaya a kubana a tsukaya.

6 YaꞋan mogono mo okpo tsu mini ma na o yoꞋi a̱ mita̱ ma na a kiꞋwain,

wo okpo ci ijaꞋashi a iɗika.

7 YaꞋan aza a usuɓi o gbonguro tsu nɗanga a ayin e le,

yaꞋan a̱ ciya̱ ma̱ta̱na̱ ba̱ri ko wannai wotoi wi baci e kuneke kutashi.

8 YaꞋan tsugono ci ni ci yawa

a mala ma nampa a kubana a ma nanɗe,

ili i na i ɗikai e kuyene ku Yufiretu, ali a kubana uteku wa aduniyan.

9 YaꞋan kumaci ku na ki a kakamba ku kuɗa̱ngu e kelime ka̱ ni,

yaꞋan irala i ni i ku kuɓa̱ n kubuta̱ ki iɗika.

10 YaꞋan ngono n Tarishi n na mi o kotogu,

a̱ tuka̱ yi n kuneꞋe,

yaꞋan ngono n Sheba nu n Seba

n neke yi n kuneꞋe.

11 YaꞋan ngono ra̱ka̱ n ku kuɗa̱nku yi,

yaꞋan uduniyan ra̱ka̱ a yaꞋanka yi a̱ga̱nda̱.

12 Adama a na wi ta̱ a ku wawa aza a unambi,

ayin a na baci e ɗekei ni,

aza atakaci, n aza a na i n ka̱ɓa̱nki ba.

13 Wi ta̱ a̱ kusa̱Ꞌa̱ aza a babu utsura n aza a unambi,

ka̱ta̱ u wawa wuma wa aza a na i a kula̱nsa̱ uɓa̱nki.

14 Wi ta̱ a̱ kushiba̱ le ekiye aza o modoruko n a̱shiliki,

wuma u le wi ta̱ n tsuloboi a̱ a̱shi a̱ ni.

15 YaꞋan wuma u mogono u geshe,

yaꞋan e neke yi azanariya a Sheba,

yaꞋan uma a yaꞋanka yi avasa,

a zuwaka yi una̱singai makyan dem.

16 YaꞋan a̱ ciya̱ ishina yi a̱bunda̱i a iɗika ya,

yaꞋan ishina i gbugba̱ aginda dem.

YaꞋan umaci u le u yimkpa tsu nɗanga n Lebano,

yaꞋan likuci i shana n uma,

tsu mita̱ ma na mi a kakamba.

17 YaꞋan a ciɓasa n kula ku mogono ko wannai,

u lyaꞋa kelime n kuyaꞋan kula, kanna ki baci lo ko wannai,

yaꞋan uduniyan ra̱ka̱ u ciya̱ una̱singai wa̱ ni,

ka̱ta̱ e ɗeke yi vuza vu una̱singai.

18 Una̱singai a kubana u Vuzavaguɗu Ka̱shile, Ka̱shile ki Isaraila,

vuza na a̱yi ɗa koci u ci yaꞋan ili i mereve.

19 Una̱singai a kubana u kula ku tsugbayin ku ni ko wannai,

yaꞋan tsugbayin ci ni ci shana aduniyan ra̱ka̱.

Ta nannai! Ta nannai!

20 Na ɗa ukocishi wa avasa a Dawuda maku Jesi.