1 Cikpai Vuzavaguɗu,

cikpai kula ku Vuzavaguɗu,

cikpai ni, a̱ɗa̱ agbashi a Vuzavaguɗu,

2 a̱ɗa̱ na yi a̱ga̱nda̱ a kpaꞋa ku Vuzavaguɗu,

a ulanga u kpaꞋa ku Ka̱shile ka̱ tsu.

3 Cikpai Vuzavaguɗu,

adama a na Vuzavaguɗu

vuza kasingai ɗa.

Cananai vishipa adama a kula ku ni,

adama a na nannai va u gaꞋan ta̱.

4 Vuzavaguɗu u zagba ka ta̱ ka̱ci ka̱ ni Yakubu,

Isaraila tana wo okpo ta̱ upecu u singai u ni.

5 Adama a na n yeve ta̱

Vuzavaguɗu vuza gbayin ɗa,

Vuzavaguɗu vu tsu u laꞋa ta̱ a̱ma̱li dem.

6 Ili i na Vuzavaguɗu u cikalai dem

i ɗaɗa u ci yaꞋan,

ko ɗe gaɗi ko a iɗika,

punu a mala ko a ɗaka vu uga̱vi u mini dem.

7 A̱yi ɗa u tsu ɗa̱ngusa̱ eleshu a uteku wa aduniyan,

u tsu suku ta̱ kutashi m mini,

ka̱ta̱ wu utuka̱ n wunla̱i a̱ a̱nu a kuzuwa a̱ ni.

8 A̱yi ɗa wu unai muku mu ugiti mi iɗika i Masar,✝

muku mu ugiti n uma m mu nnama

9 U suki iyoci n ili i mereve

a̱ ka̱tsuma̱ ka̱ ɗa̱ a Masar

u FiriꞋauna n agbashi a̱ ni ra̱ka̱.

10 Wu unai uduniyan wa̱ a̱bunda̱i,

ɗa wu unai ngono m gbagbaꞋin.

11 Sihon mogono ma aza a Amoriya,

n Ogu, mogono ma Bashan

n tsugono tsu KanaꞋana ra̱ka̱,

12 ɗa u nekei iɗika i le tsu ili yu uka̱ni,

ili yu uka̱ni wa aza a Isaraila.

13 Vuzavaguɗu, kula ku nu ko wannai ɗa,

kula ku nu ili kuciɓa i ɗa

tsukaya a kubana a tsukaya.

14 Adama a na Vuzavaguɗu,

wi ta̱ o kuyotsongu uma a̱ ni

a na i n unushi ba,

ka̱ta̱ u sa̱Ꞌa̱ agbashi a̱ ni.

15 A̱ma̱li a uduniyan wa,

azurufa a ɗa n azanariya,

a na uma a yaꞋin n ekiye e le.✝

16 I ta̱ n una̱, ama a tsu dansa ba,

i ta̱ n a̱shi, ama e ci ene ba.

17 I ta̱ n atsuvu, ama a tsu pana ba,

a ci yinvuka ba.

18 Aza a na a yaꞋin le i ta̱ o ko okpo ci le

aza a na e nekei katsura ke le we le,

i ta̱ o ko okpo ci le,

19 Cikpai Vuzavaguɗu kpaꞋa ki Isaraila,

cikpai Vuzavaguɗu kpaꞋa ku Haruna.

20 Cikpai Vuzavaguɗu kpaꞋa ku Levi,

a̱ɗa̱ na yi a kupana wovon u Vuzavaguɗu,

cikpai Vuzavaguɗu.

21 Una̱singai u ɗa u Vuzavaguɗu a Sihiyona

a̱yi na wi ida̱shi a Urishelima.

Cikpa Vuzavaguɗu.