1 N ciga ta̱ Vuzavaguɗu,

adama a na u pana ta̱ ka̱la̱ka̱tsu ka̱ va̱,

u pana ta̱ ma̱shi ma asuvayali ma̱ va̱.

2 Mi ta̱ e kuɗeke yi

a ayin a wuma u va̱ dem,

adama a na u tsu zuwaka mu ta̱ atsuvu,

3 Maza ma̱ ukpa̱ ma̱ ka̱na̱ mu ta̱,

wovon u kasaun u kimba̱ mu ta̱.

kadama n una̱mgbuka̱tsuma̱ u ciya̱ mu ta̱.

4 Ɗa n ɗekei kula ku Vuzavaguɗu, n danai,

<<Vuzavaguɗu, n folono wu ta̱, wawa mu.>>

5 Vuzavaguɗu vuza kasingai ɗa,

n vuza vu usuɓi

Ka̱shile ka̱ tsu vuza va asuvayali ɗa.

6 Vuzavaguɗu u tsu ere ta̱

aza a na o goyoi ka̱ci ke le.

A makyan ma na mi a̱ kula̱nsa̱ uɓa̱nki,

u wawai mu.

7 Ka̱ɗu ka̱ va̱ vaꞋanku,

Vuzavaguɗu vuza kasingai ɗa wa̱ nu.

8 Adama a na Vuzavaguɗu, vu wawa ta̱,

wuma u va̱ a̱ ukpa̱,

a̱shi a̱ va̱ a̱ ubuta̱ u ku uta̱ka̱ kujilya

ene a̱ va̱ adama a̱ kuta̱ɗa̱tsa̱.

9 Adama a na n fuɗa n wala

e kelime ka Vuzavaguɗu,

a iɗika ya aza a wuma.

10 Ko a na n danai, <<A takacika mu ta̱ ka̱u.>>

n neke ta̱ ka̱ɗu,

11 A̱ ka̱tsuma̱ ka̱ uripuli u va̱, n danai,

<<Uma ra̱ka̱ a yaꞋin a uwa ɗa.>>

12 Ya̱ɗa̱i n kuneke u Vuzavaguɗu,

adama a kasingai ka̱ ni wa̱ va̱ ra̱ka̱?

13 Mi ta̱ a̱ kuɗa̱ngusa̱ kuneꞋe ku ma̱kya̱n

tsu ucikpi adama a wishi

ka̱ta̱ n ɗeke kula ku Vuzavaguɗu.

14 Mi ta̱ e kuneke Vuzavaguɗu,

ili i na n kucinai kuneke,

e kelime ka uma a̱ ni dem.

15 Vuzavaguɗu u ɗika ta̱ wuma wa aza a usuɓi

n ugaꞋin ka̱u.

16 Vuzavaguɗu, mayun mpa kagbashi ka̱ nu kaꞋa,

mpa kagbashi ka̱ nu kaꞋa,

maku ma kagbashi ka̱ nu vuka

vu shikpa mu ta̱ a ikani.

17 Mi ta̱ e kuneke alyuka a ucikpi,

ka̱ta̱ n ɗeke kula ku Vuzavaguɗu.

18 Mi ta̱ e kuneke Vuzavaguɗu,

ili i na n kucinai kuneke,

e kelime ka uma a̱ ni dem,

19 a ulanga u kpaꞋa ku Vuzavaguɗu,

a̱ ka̱tsuma̱ ka Urushelima.

Cikpai Vuzavaguɗu.