1 Ka̱shile, panaka mu, n tuka̱ baci n mavura ma̱ va̱ gogo na

ere wuma u va̱ a̱ ka̱rikpa̱ni ka irala i va̱ i na yi a kutakacika mu.

2 Ere mu a nsata n uma a gbani-gbani,

n koɓolo ka aza a kawuya.

3 O tsu gboro ta̱ elentsu e le a na otokobi,

ka̱ta̱ a gisanku ayaꞋa e le a na i kadanshi ka una̱mgbi u ka̱tsuma̱,

4 ka̱ta̱ o bopo a tawa aza babu unushi n ayaꞋa,

a tsu tawa vuza gogoꞋo lo ko wovon.

5 E ci nekpenei ta̱ kadanshi

a̱ ubuta̱ u kuyaꞋan ka gbani-gbani ke le.

O ci yongo ta̱ a kadanshi

tsu na a ku azuku ayakuru e le,

e kusheshe, <<Ko vuza u kene le ba.>>

6 A̱ tsu ka̱na̱ ta̱ kusheshe tsu na a kuyaꞋan kawuya, a dana,

<<Tsu kotso ta̱ kusheshe mayin.>>

Ka̱ɗu ka vuma ki ta̱ n awuya e kuyeve.

7 Ama Ka̱shile ki ta̱ a ku tawa le n kayaꞋa ka̱ ni,

wi ta̱ a kulapa le gogoꞋo lo.

8 Kadanshi ke kelentsu ke le, ki ta̱ o kubono a kaci ke le ka una le,

Vuzana baci we enei le dem wi ta̱ a̱ ku gba̱ɗa̱ kaci ka̱ ni.

9 Ka̱ta̱ uma ra̱ka̱ a pana wovon,

i ta̱ a kudansa ulinga u Ka̱shile,

ka̱ta̱ a̱ ka̱na̱ aciɓa adama ili i na u yaꞋin.

10 Vuza vu usuɓi wi ta̱ a kuyaꞋan ma̱za̱nga̱ u Vuzavaguɗu,

wi ta̱ a̱ kuciya̱ ubuta̱ u kusheɗeku wa̱ a̱ ni,

aza a̱ ma̱riki ra̱ka̱ i ta̱ a̱ kuciya̱ ucikpi.