1 Vuzavaguɗu, makyan dem avu ɗa ubuta̱ wi ida̱shi i tsu.

Ali tsukaya n tsukaya.

2 Kafu vu yaꞋan nsasan,

kafu a iɗika

kafu kpamu vu yaꞋan aduniyan,

avu Ka̱shile kaꞋa ko wannai.

Vi n ugiti ba tana vi n ukocishi ba.

3 Vu tsu bonoko ta̱ uma tsu na ishi kubuta̱,

vu dana, <<O bono kubuta̱ a̱ ubuta̱ u na uta̱i.>>

4 A̱ya̱ ka̱kpa̱n wa̱ nu i ta̱ tsu kanna ke te,

i ta̱ tsu kanna ke te ka na ka lazai,

tsu makyan ma kayin ma na ma lazai.

5 Vu tsu pura̱ngu ta̱ uma tsu alavu a̱ ukpa̱

i ta̱ tsu mita̱ ma na ma̱ tsu uta̱ n usana,

6 o gbonguro ali a yaꞋan a̱pa̱lu,

ka̱ta̱ n kulivi a lumba e ɗekpe.

7 Tsu kuwa̱ ta̱ adama a wupa u nu,

tsu dagaza ta̱ adama asuvu a usuɗukpi a̱ nu.

8 Vu gere ta̱ unushi u tsu e kelime ka̱ nu,

unushi u tsu wu usokongi kpamu,

vu zuwai u ɗa a̱ ubuta̱ u na ve kene le.

9 Wupa u nu u jebe ta̱ ayin a wuma a̱ tsu,

wuma u tsu u kotsoi tsa ayinviki.

10 A̱ya̱ a wuma a̱ tsu ra̱ka̱ a ɗaɗa amangatatsunkupa

ci baci m ma̱ta̱na̱ a̱ya̱ amanga̱na̱shi,

n nannai dem ili i na a̱ya̱ a nanlo

a tsu tuka̱ tsu ɗaɗa

atakaci n una̱mgbuka̱tsuma̱,

gogoꞋo lo a laza,

a̱tsu tamkpamu tsu puwa̱nka̱.

11 Yayi u yevei utsura u wupa u nu?

Yayi u yevei wovon u na wupa u nu u kutuka̱?

12 PiꞋisaka tsu ci yeve a na wuma u tsu u makyan me kenu maꞋa,

adama a na tsu okpo aza a ugboji.

13 Vuzavaguɗu, bono,

ali n wannai ɗai tsa̱ kuka̱na̱ kuvana wu?

Pana asuvayali agbashi a̱ nu.

14 Usana dem yotsongu tsu,

ucigi u nu u na u tsu sabaꞋa ba,

adama a na tsu canana ishipa i ma̱za̱nga̱

a ayin a wuma a̱ u tsu ra̱ka̱.

15 Zuwa tsu ci yaꞋan ma̱za̱nga̱,

tsu ka̱bunda̱i ka ayin a na ci atakaci,

tsu ka̱bunda̱i ka̱ a̱ya̱ a na tsu takacikai.

16 YaꞋan a̱tsu agbashi a̱ nu,

ci ene ulinga u gbayin u nu,

yaꞋan ntsukaya n tsu me ene,

utsura u tsugbayin tsu nu.

17 Vuzavaguɗu Ka̱shile ka̱ tsu,

yaꞋan una̱singai u nu u yongo n a̱tsu,

vu zuwa tsu ci lyaꞋa kelime a ili i na ci a kuyaꞋan dem,

vu neke tsu ulyaꞋi a ili i na ci a kuyaꞋan dem.