1 Ka̱ɗu ka̱ va̱ ka shana ta̱ n kadanshi ka singai.

Makyan ma na mi a̱ ku zuɓa̱ vishipa vu mogono.

Kelentsu ka̱ va̱ tsu kayakiɗani kaꞋa u kaɗani.

2 A̱ ka̱tsuma̱ ka uma ra̱ka̱ avu ɗa vu laꞋi n ugaꞋin,

avu vuza vu ufuɗi u kadanshi kasingai kaꞋa.

Ka̱shile ka zuwaka wu ta̱ una̱singai makyan dem.

3 Shiya kotokobi ka̱ nu,

mogono ma tsugbayin,

avu vuza vu utsura ɗa.

4 A̱ ka̱tsuma̱ ka tsugbayin tsu nu yaꞋan nwalu n kulyaꞋa kelime,

vu shamkpa kamayun n ku usuɓi.

adama a utsura u nu, vi ta̱ a kulyaꞋa kelime.

5 AyaꞋa a̱ nu i ta̱ lyalyaꞋan,

a tsu sapa ta̱ a̱ɗu a irala i nu,

uma a̱ ku yikpa̱sa̱ a ɗaka vu e ene a̱ nu.

6 Ka̱shile, kakuba ko tsugono ka̱ nu,

ki ta̱ o kuyongo ko wannai.

Vi ta̱ a kulyaꞋa tsugono tsu uma a̱ nu n usuɓi.

7 Vu tsu ciga ta̱ ili i na yi mejege,

vu ci iwan ta̱ ili i gbani-gbani.

Adama a nannai Ka̱shile, Ka̱shile ka̱ nu ka zagba wu ta̱,

ɗa u tsunki nu n maniꞋin me kerengu m ma̱za̱nga̱ ma̱ a̱bunda̱i ali vu laꞋa yaba dem.

8 Akashi a̱ nu a̱ ku uta̱ ma̱gula̱ni mi ili ma̱gula̱ni i Mariti n aloyes n kashiya kpamu,

tsuwaꞋi a iꞋuwa yi ngono,

a iꞋuwa i na a kalai n anga a kagiwa dem,

a kuzuwa wu ma̱za̱nga̱.

9 Muku mu nkere mo ngono,

i ta̱ punu a̱ ka̱tsuma̱ ka̱ a̱ma̱ci a na a̱ ciya̱i tsugbayin,

e kukiye ku usingai ku kakuba ko tsugono tsu nu,

egbere wi ta̱ kisani,

a uki na u canuku u singai,

wa azanariya u na u laꞋi nu ugaꞋin ra̱ka̱.

10 Pana ili i na n kudansa, avu vuka vu savu vu mogono,

vu cinukpa n uma a̱ nu n kumaci ku nu.

11 Adama a na avu vi ta̱ n ugaꞋin,

mogono mi ta̱ a kuciga wu,

a̱yi ɗa vali vu nu, ka̱ta̱ vu tono yi.

12 Uma a Taya i ta̱ a̱ kutuka̱ wu n kuneꞋe,

aza a̱ uciyi i ta̱ a̱ kuta̱wa̱ a̱ la̱nsa̱ mapasa ma singai wa̱ a̱ nu.

13 Vuka vu savu vu mogono,

wi ta̱ a ku uwa a kpaꞋa ku mogono,

yiɗa̱i a kugisanku n ugaꞋin u ni,

n tsugbere tsa azanariya tsu ɗa a caꞋi motogu ma̱ ni,

14 A bankai ni a̱ ubuta̱ u mogono u uki na aminya a singai,

a̱ja̱Ꞌa̱ ni nkere o kutono, a̱ tuka̱i le a̱ ubuta̱ u mogono.

15 N ma̱za̱nga̱ maꞋa a̱ ta̱wa̱i,

a uwai e kefeku ko mogono.

16 Vi ta̱ a kumatsa muku n ali n a̱bunda̱i,

aza a na a̱ ku ka̱na̱ tsugbayin ci ikaya i nu,

vi ta̱ a kuzuwa le a lyaꞋa tsugono tsa aduniyan dem.

17 Vishipa vu va̱ vi ta̱ a kuzuwa,

a̱ ka̱na̱ kuciɓasa n kula ku nu ko wannai,

ka̱ta̱ uma ra̱ka̱ a cikpa wu,

ali a tsukaya tsu na tsa̱ kuta̱wa̱.