1 Cikpai Vuzavaguɗu, a̱ɗa̱ ili i wuma i gaɗi,

cikpai tsugbayin ci ni n utsura u ni.

2 Cikpai kula ku gbayin ku Vuzavaguɗu,

i kuɗa̱ngu e kelime ka vuza ciɗa ɗa baci uɓa̱tsa̱i.

3 A pana ta̱ ka̱la̱ka̱tsu ka Vuzavaguɗu a mala,

Ka̱shile ka tsugbayin ka̱ giruwa̱ ta̱,

ka̱la̱ka̱tsu ka̱ tsugiruwi ka̱ ni ka̱ ɗumgba̱ ta̱ a mala.

4 Ka̱la̱ka̱tsu ka Vuzavaguɗu,

ki ta̱ n utsura,

ka̱la̱ka̱tsu ka Vuzavaguɗu,

ki ta̱ n tsugbayin.

5 Ka̱la̱ka̱tsu ka Vuzavaguɗu ko tsu koɗo ta̱ nɗanga n Sida,

ali nu nɗanga n sida n Lebano.

6 U tsu zuwa ta̱ nsansa n Lebano n ɗikpangu tsu ndendem,

ka̱ta̱ kpamu u zuwa kusan ku Hamon ku ɗikpangu tsu medendem.

7 Ka̱la̱ka̱tsu ka Vuzavaguɗu,

ka zuwa ta̱ tsulaɗi tsu akana.

8 Ka̱la̱ka̱tsu ka Vuzavaguɗu,

ka̱ tsu gba̱ɗa̱ ta̱ kakamba,

ka̱la̱ka̱tsu ka Vuzavaguɗu,

ka tsu gba̱ɗa̱ ta̱ kakamba ka Kadeshi.

9 Ka̱la̱ka̱tsu ka Vuzavaguɗu,

ka zuwa ta̱ nɗanga n gbagbaꞋin n gba̱ɗa̱i,

u zuwai nɗanga n kutsu n sa̱ruwa̱i,

a na a yaꞋin isali i ma̱za̱nga̱ punu AꞋisa̱ a gbayin a̱ ni,

a danai,<<Tsugbayin u Ka̱shile.>>

10 Vuzavaguɗu wi ta̱ o tsugono tsu mala ma gbayin,

wi ta̱ a kulyaꞋa tsugono tsu mogono ko wannai.

11 YaꞋan Vuzavaguɗu u neke uma a̱ ni utsura,

YaꞋan Vuzavaguɗu u zuwaka le una̱singai n ma̱ta̱na̱.