1 Ka̱ta̱ vu na̱mgba̱ ka̱tsuma̱ adama a uma a gbani-gbani ba,

ko kpamu vu yaꞋan cisheꞋe tsa aza a na i a kuyaꞋan ka gbani-gbani ba.

2 Adama a na, megeshe kenu i ta̱ a̱ kupuwa̱nka̱ tsu mita̱ ma na me ɗekpei

i ta̱ a ku lumba tsu mita̱ ma savu,

3 Neke ka̱ɗu u Vuzavaguɗu,

ka̱ta̱ vu yaꞋan kasingai,

ka̱ta̱ vu da̱sa̱ngu a iɗika ya, vu ciya̱ ma̱ta̱na̱.

4 La̱nsa̱ ma̱za̱nga̱ u Vuzavaguɗu,

a̱yi tana wi ta̱ e kuneke wu i na ka̱ɗu ka̱ nu ka cigai.

5 Neke ka̱ci ka̱ nu u Vuzavaguɗu,

vu neke ka̱ɗu ka̱ nu wa̱ a̱ ni,

wi ta̱ tana a̱ kuɓa̱nka̱ wu.

6 Wi ta̱ a kuzuwa kasingai ka̱ nu ka tasa tsu kutashi,

usuɓi u nu kpamu wa akana tsu kanna a kaci.

7 Shamgba shiriri u Vuzavaguɗu,

ka̱na̱ ka̱ɗu ka̱ nu vu vana yi,

ka̱ta̱ vu na̱mgba̱ ka̱tsuma̱,

adama a ulyaꞋi u kelime u vuza ba,

ko u vuza vu ulyaꞋi,

a̱ ka̱tsuma̱ ka̱ a ubuta̱ wo ofoɓuso a ka gbani-gbani ka̱ ni ba.

8 Ka̱ta̱ vu yaꞋan wupa, ko vu na̱mgba̱ ka̱ɗu ba.

ka̱ta̱ vu na̱mgba̱ ka̱tsuma̱ ba,

adama a na, nannai va u tsu tuka̱ n koyoku ba,

sai ka gbani-gbani.

9 Aza a na a zuwai a̱ɗu u Vuzavaguɗu,

i ta̱ a kuyaꞋan ida̱shi i le m ma̱ta̱na̱ a iɗika ya,

ama i ta̱ o kuloko aza a gbani-gbani,

10 M megeshe kenu, uma a gbani-gbani i ta̱ a̱ kupuwa̱nka̱,

vi ta̱ a̱ kula̱nsa̱ le, ama vi a̱ ku ciya̱ le ba.

11 Ama aza a na a ɗikai ka̱ci ke le ili ba, i ta̱ a kulyaꞋa uka̱ni wi iɗika ya,

a pana uyoꞋo u ma̱ta̱na̱ mayin.

12 Vuma vu gbani-gbani u tsu foɓusoko ta̱ vuma vu usuɓi kawuya,

ka̱ta̱ u ka̱na̱ ku lungana yi adama a tsurala,

13 ama Vuzavaguɗu u tsu zoꞋoso ta̱ vuza vu gbani-gbani,

adama a na u yeve ta̱ makyan ma na a ku una yi, mi ta̱ lo a̱ kuta̱wa̱.

14 Aza a gbani-gbani a tsu tala ta̱ otokobi ele,

o rono ta̱ utan u le,

adama a na a una aza a unambi,

una aza a usuɓi.

15 ama otokobi ele i ta̱ a ku una le,

i ta̱ kpamu o koɗoso utan u le.

16 Ili i kenu i na vuza vu usuɓi wi n i ɗa,

i laꞋa ta̱ uciyi u vuma vu gbani-gbani.

17 Adama a na Vuzavaguɗu wi ta̱ o kukoɗo utsura u vuza vu gbani-gbani,

ama u tsu ere ta̱ vuza vu usuɓi.

18 Vuzavaguɗu u tsu la̱na̱ ta̱ aza a na i o kutono yi,

iɗika ya yi ta̱ okpo ili yi uka̱ni i le ko wannai,

19 I a kupana wono a makyan ma atakaci ba.

i ta̱ a̱ kuciya̱ ilikulyaꞋa ba̱ri a ayin a kambulu.

20 Ama uma gbani-gbani i ta̱ a̱ ku kuwa̱.

aza na a iwain Vuzavaguɗu i ta̱ a̱ kupuwa̱nka̱ tsu a̱pa̱lu,

i ta̱ kupuwa̱nka̱ an ka̱nga̱ a laza.

21 Vuza vu gbani-gbani u ci lyaꞋa ta̱ kutan ka̱ta̱ u iwan ku tsupa,

ama vuza vu usuɓi vuza kasingai ɗa,

vuza na u ci neke n ka̱ɗu ba̱ri.

22 Aza a na Vuzavaguɗu u zuwakai una̱singai,

i ta̱ a̱ kuciya̱ ida̱shi i ma̱ta̱na̱ a iɗika ya,

ama aza a na u yaꞋankai una̱wuya i ta̱ o kuloko le.

23 Vuzavaguɗu u tsu tono ta̱ n vuma,

a uye u na u gaꞋin u tono,

u tsu pana ta̱ uyoꞋo u kuyongo ku ni,

24 ko u ta̱ɗa̱tsa̱ baci, wi a̱ kuyikpa̱ a iɗika ba,

adama a na Vuzavaguɗu u tsu ka̱na̱ yi ta̱ n kukiye ku ni,

25 Ali ayin a na mi ishi maku, ama gogo na n kutsa ta̱,

n saꞋawa kene Vuzavaguɗu u vakangi vuza vu usuɓi ba,

ko ene muku n ni ufolu wi ilikulya ba.

26 Makyan dem u tsu neke ta̱ ili ba̱ri,

u tsu neke ta̱ okopu wa aza o yoku,

muku n ni una̱singai u ɗa,

27 Ka̱sukpa̱i ka gbani-gbani i yaꞋan kasingai.

yi ta̱ o kuyongo a iɗika ya ko wannai.

28 Adama a na Vuzavaguɗu u ciga ta̱ ili i na yi derere,

u tsu ka̱sukpa̱ uma a usuɓi a̱ ni ba.

e kere le makyan dem,

ama kumaci ku uma a gbani-gbani i ta̱ o kuloko le.

29 Aza a usuɓi i ta̱ a kulyaꞋa uka̱ni wi iɗika ya,

ka̱ ta̱ a̱ da̱sa̱ngu punu i ɗa ko wannai.

30 Una̱ u vuza vu usuɓi u tsu dansa ta̱ kakuna ke kuyeve,

kelentsu ka̱ ni ka tsu dansa ta̱ ili i na yi derere.

31 Wila̱ u Ka̱shile ka̱ ni wi ta̱ a̱ ka̱ɗu ka̱ ni,

u tsu ka̱sukpa̱ u ɗa ba ko wannai.

32 Aza a gbani-gbani a̱ tsu puta̱ ta̱ aza a usuɓi,

a̱ tsu la̱nsa̱ le ta̱ adama a na a una le.

33 Ama Vuzavaguɗu wi a̱ ku ka̱sukpa̱ le ekiye i irala i le ba,

ko kpamu u ka̱sukpa̱ a yaꞋanka le afada a gbani-gbani ba.

34 Neke ka̱ɗu u Vuzavaguɗu,

ka̱ ta̱ kpamu vu yongo a uye u ni,

a̱yi tana wi ta̱ a kuzuwa wu vu ciya̱ uka̱ni wi iɗika ya,

vi ta̱ e kene o kuloko uma a gbani-gbani.

35 Me ene ta̱ vuma gbani-gbani ko asuvayali,

u laꞋa ta̱ yaba dem ugaɗi,

a na nɗanga n Lebano.

36 Ama makyan kenu,

a na m bonoi, me ene yi ba.

n la̱nsa̱ ni, ama me ene yi ba.

37 Indana uma a̱ ma̱riki, vu la̱na̱ uma a usuɓi,

vuza vu ma̱ta̱na̱ u tsu ciya̱ ta̱ ntsukaya.

38 Ama i ta̱ a ku una aza a unushi gbende,

ka̱ta̱ a̱ pura̱ngu ntsukaya n le.

39 Vuzavaguɗu u tsu isa ta̱ aza a usuɓi,

a̱yi ɗa ubuta̱ u kusheɗeku u le a ayin atakaci.

40 Vuzavaguɗu u tsu ɓa̱nka̱ le ta̱ ka̱ta̱ kpamu wu isa le,

u tsu isa le ta̱ ekiye aza a gbani-gbani,

adama a na a̱ la̱nsa̱ ta̱ ubuta̱ u ku sheɗeku wa̱ a̱ ni.