1 Vuza vu ma̱za̱nga̱ ɗa,

vuza na u tsu la̱na̱ aza a unambi,

Vuzavaguɗu wi ta̱ a ku wawa yi,

a makyan ma atakaci.

2 Vuzavaguɗu wi ta̱ e ku ere yi, u foɓo wuma u ni.

Vuzavaguɗu wi ta̱ a kuzuwa yi u pana uyoꞋo a iɗika ya.

wi a̱ ku ka̱sukpa̱ yi ekiye a irala i ni ba.

3 Vuzavaguɗu wi ta̱ a̱ kuɓa̱nka̱ yi a ayin a na wi a̱ mɓa̱la̱.

wi ta̱ o ku bonoko yi n ma̱ta̱na̱ mi ikyamba ma̱ ni mayin.

4 N danai, <<Vuzavaguɗu, n yaꞋanka wu ta̱ unushi.

pana asuvayali a̱ va̱ ka̱ ta̱ vu potsokpo mu.>>

5 Irala i va̱ yi ta̱ a kuyaꞋansa

kadanshi ka gbani-gbani adama a̱ va̱,

A kudana, <<Wannai ɗai u ku kuwa̱,

a cinukpa n a̱yi?>>

6 Aza a na a̱ tsu ta̱wa̱ n a̱ kya̱sa̱i mu,

n ka̱ɗu kete kaꞋa a̱ tsu ta̱wa̱ ba,

o tsu ɓolongu su ta̱ arabali aꞋuwa adama a̱ va̱,

ka̱ta̱ a bana a̱ ka̱na̱ kudansa kaꞋa a̱ ubuta̱ dem.

7 Irala i va̱ ra̱ka̱ i ta̱ a̱ kuyun n otoku ele adama a̱ va̱,

e kusheshe ku le n laꞋa ta̱ yaba dem ka gbani-gbani.

8 A kudansa, <<Mɓa̱la̱ n ka̱na̱ yi ta̱ gbani-gbani,

wi a kufuɗa ku ɗa̱nga̱ a̱ ubuta̱ mɓa̱la̱ n ni ba.>>

9 Ali ka̱ja̱Ꞌa̱ ke ɗevu ka̱ va̱, vuza na n laꞋi kuneke ka̱ɗu ka̱ va̱,

vuza na tsu ci lyaꞋa koɓolo, u bonoi a tsurala nu mpa.

10 Vuzavaguɗu, pana asuvayali a̱ va̱,

vu bonoko mu m ma̱ta̱na̱ mi ikyamba ma̱ va̱,

adama a na n tsupa ili i na irala i va̱ i yaꞋankai mu.

11 Mi ta̱ e kuyeve vi ta̱ a kupana uyoꞋo u va̱,

adama a na i a kufuɗa kulyaꞋa kelime ka̱ va̱ ba.

12 Vi ta̱ a̱ kuɓa̱nka̱ mu adama a na mi ta̱ a kuyaꞋan ili i na yi derere,

Vi ta̱ a ku zuwa mu n yongo e kelime ka̱ nu ko wannai.

13 YaꞋan tsu cikpa Vuzavaguɗu, Ka̱shile ka aza Israila,

cikpa ni gogo na a kubana ko wannai Tanannai, Tanannai.