1 Cananai ishipa i savu u Vuzavaguɗu,

adama ili i mereve i na u yaꞋin.

Utsura u kukiye ku singai ku ni,

n utsura u kukiye ku ciɗa ku ni,

ku ciya̱ka̱i ni ulyaꞋi.

2 Vuzavaguɗu u yotsongu ta̱ utsura u wishi u ni,

ɗa u yotsongi usuɓi u ni a uduniyan.

3 U ciɓa ta̱ n ucigi u ni u na u tsu sabaꞋa ba n usuɓi u ni,

a kpaꞋa ki Isaraila.

Aduniyan ra̱ka̱ ene ta̱

ulyaꞋi u Ka̱shile ka̱ tsu.

4 YaꞋin ishipa i ma̱za̱nga̱ u Vuzavaguɗu, aduniyan ra̱ka̱,

cananai ishipa i ma̱za̱nga̱ i ɗa̱ngusa̱ a̱la̱ka̱tsu

5 Cikpai Vuzavaguɗu n umolu,

n umolu n a̱la̱ka̱tsu a ugaꞋin.

6 I lika̱ ishari n avana,

i sala adama a̱ ma̱za̱nga̱ u Vuzavaguɗu mogono.

7 YaꞋan mala ma yaꞋan yura̱,

n ili i na yi punu dem,

aduniyan n aza a na i punu ida̱shi.

8 YaꞋan mala ma ɓasa ekiye adama a̱ ma̱za̱nga̱,

aginda kpamu ra̱ka̱ a̱ ɗa̱ngusa̱ a̱la̱ka̱tsu a̱ ma̱za̱nga̱,

9 e kelime ka Vuzavaguɗu,

adama a na wi ta̱ a̱ kuta̱wa̱,

u yaꞋanka aduniyan afada.

Wi ta̱ a kuyaꞋanka aduniyan afada a usuɓi,

n kuyaꞋan ka afada e mejege u uma ra̱ka̱.