1 Vuza na baci wi a̱ ida̱shi a̱

a̱ ubuta̱ u MalaꞋimili dem,

wi ta̱ a kuvuka a̱ kulu ku vuza vu utsura dem,

2 wi ta̱ a kufuɗa kudana Vuzavaguɗu,

<<Avu ɗa ubuta̱ u kusheɗeku u va̱,

m mashilya ma utsura ma̱ va̱,

avu ɗa vuza na vi a ku inda mu,

avu ɗa Ka̱shile ka̱ va̱,

wa̱ nu u ɗa n zuwai ka̱ɗu ka̱ va̱.>>

3 Mayun wi ta̱ a̱ ku utuka̱ wu a maza ma uma a gbani-gbani,

kpamu wu utuka̱ wu atakaci a na a̱ kutuka̱ n ukpa̱.

4 Wi ta̱ a kupala wu tsu na motoku,

ma tsu pala muku n ni n evelyu,

vi ta̱ a̱ kuda̱sa̱ngu m ma̱ta̱na̱ a ɗaka vi le.

Ma̱riki ma̱ ni mi ta̱ ke ere wu,

ka̱ta̱ u shamkpa wu.

5 Vi a kupana wovon wi ili i wovon i na i kuta̱wa̱ n kayin ba,

ko vishili vu na a kuyaꞋan n avu n kanna,

6 ko ma̱dukpa̱ ma na ma̱ kuta̱wa̱ n kayin,

ko uma a gbani-gbani a na a ci yaꞋan munuka n kanna a kaci.

7 Uma ka̱kpa̱n i ta̱ a̱ kuyikpa̱ ɗevu n avu,

a̱kpa̱n kupa i ta̱ a̱ kuyikpa̱ e kukiye ku usingai ku nu,

ama avu ko ili yi a̱ kuciya̱ wu ba.

8 Vi ta̱ a ku inda le n a̱shi a̱ nu,

vu ene tsu na a kutakacika aza asuvawuya.

9 A na wo okpoi avu vu danai,

Vuzavaguɗu ɗa ubuta̱ u kusheɗeku u va̱,

MalaꞋimili kpamu ubuta̱ wi ida̱shi i va̱.

10 Babu ma̱dukpa̱ ma na ma̱ kuciya̱ wu,

ko kpamu ili i gbani-gbani i na i kuyaꞋan ɗevu n kpaꞋa ku nu.

11 Vuzavaguɗu wi ta̱ a kuzuwa alingata a̱ ni inda wu,

kpamu i ta̱ e kere wu a̱ ubuta̱ u na vu banai dem,

12 i ta̱ e kukeɓe wu e ekiye e le,

adama a na ka̱ ta̱ vu ta̱ɗa̱tsa̱ a katali ba.

13 Vi ta̱ a kudasa ikawu m megu,

vi ta̱ a kudasa ikawu yi utsura n oko o tsukono.

14 adama a na u dana ta̱,

<<Mi ta̱ a ki isa aza a na a cigai mu,

mi ta̱ a ku inda aza a na e yeve mu.

15 Makyan ma na baci u ɗekei mu,

mi ta̱ a̱ ku ushuku ku yi,

mi ta̱ o kuyongo n a̱yi makyan ma na wi o kusoꞋo atakaci,

mi ta̱ a ku isa yi, ka̱ta̱ n neke yi tsugbayin.

16 Mi ta̱ a kuzuwa wuma u ni u geshe,

mayun tana mi ta̱ a ku wawa yi.>>