1 Vuzavaguɗu, avu Ka̱shile ka kutsupa ili i na a yaꞋin,

Ka̱shile avu na vu tsu tsupa ili i na a yaꞋin,

utuka̱ wupa u nu,

2 kayaꞋinkafada ka aduniyan,

ɗa̱nga̱ vu tsupa aza a̱ra̱ɗi,

ili i na yu untsai le.

3 Ali n wannai ɗai aza a gbani-gbani

a kulyaꞋa kelime n kuyaꞋan ma̱za̱nga̱?

Ali n wannai ɗai, Vuzavaguɗu?

4 Ali n wannai ɗai a̱ kuka̱na̱ ku dansa kavama,

ali n wannai ɗai aza asuvawuya a kulyaꞋa kelime n a̱ra̱ɗi?

5 Vuzavaguɗu, i ta̱ o ku yokumo uma a̱ nu,

o kudoro uma a̱ nu ili yi uka̱ni i nu.

6 A ku una agapa a̱ma̱ci, n omoci,

nu mkpaꞋan kpamu,

7 a kudana, <<Vuzavaguɗu wi e kene tsu ba

Ka̱shile ka Yakubu ka zuwaka n ili i na yi lo a̱ kugita̱ ba.>>

8 Niniɗai yi okpoi a̱ta̱m,

alau wannai ɗai i ku gbojo?

9 Ka̱shile ka na ka yaꞋin atsuvu, a̱yi wi a kupana ba?

Ka̱shile ka na ka yaꞋin a̱shi a̱yi wi e kene ba?

10 A̱yi ɗa wi o kutono n uduniyan u na u buwai,

wi a kutakacika le ba?

A̱yi na wi a kupiꞋisaka uma,

wi n kuyeve ba?

11 Vuzavaguɗu u yeve ta̱ kusheshe ku vuma,

u yeve ta̱ kusheshe ku ni gbani ɗa.

12 Vuzavaguɗu, vuza vu ma̱za̱nga̱ ɗa vuza na vu gbarai,

vuza na vi a kupiꞋisaka wila̱ u nu,

13 Adama a na u yongo asuvu a̱ ida̱shi a ayin atakaci,

ali a̱ ga̱va̱ka̱i aza asuvawuya asaun.

14 Adama a na Vuzavaguɗu wi a ku iwan uma a̱ ni ba,

wi tana a̱ ku ka̱sukpa̱ uma a̱ ni,

ili yi uka̱ni i ni ba,

15 KuyaꞋan ka afada ki ta̱ o kubono a̱ ubuta̱ wa aza a usuɓi,

aza e mejege i ta̱ a̱ kushuku n a ɗa.

16 Yayi u kushamkpa ka mu u yaꞋan tsurala n aza a gbani-gbani?

Yayi u kuɓa̱nka̱ mu adama a na n takacika aza a gbani-gbani?

17 Ishi baci Vuzavaguɗu u ɓa̱nka̱ mu ba,

a na gogo na n yawa ta̱ ɗe a̱ ubuta̱ wa̱ a̱kpisa̱.

18 N danai, <<Mi ta̱ ukuna u kuyikpa̱,>> ama Vuzavaguɗu, ucigi u nu u na u tsu sabaꞋa ba u keɗe mu ta̱.

19 Ana atakaci a yaꞋin mu a̱bunda̱i,

ɗa vu kparasai mu, vu zuwai mu n yaꞋin ma̱za̱nga̱.

20 Wi ta̱ a kuyaꞋan vu ɓolongu tsugono n aza a gbani-gbani?

Ko n aza a na a tsu zuwa wila̱ u kavama?

21 O tsu foɓusoko ta̱ uma a usuɓi ka gbani-gbani,

a tsu kiɗaka ta̱ vuza vu babu unushi afada a̱ ukpa̱.

22 Ama Vuzavaguɗu u tsu ere mu ta̱,

Ka̱shile ka̱ va̱ a̱yi ɗa ubuta̱ u kusheɗeku u va̱.

23 A̱yi ɗa u kutakacika le adama a kawuya ke le,

wu una le adama a unushi u le,

Vuzavaguɗu Ka̱shile ka̱ tsu ki ta̱ a ku una le.