1 Cikpa Vuzavaguɗu,

cikpa Vuzavaguɗu, wuma u va̱.

2 Mi ta̱ a ku cikpa Vuzavaguɗu ayin a wuma u va̱ ra̱ka̱,

Mi ta̱ a kucanana vishipa

vu kucikpa Ka̱shile ka̱ va̱ ali mi baci n wuma.

3 Ka̱ta̱ vu zuwa katsura,

wa aza o tsugono ba,

ko u vuma vuza,

wi a kufuɗa ku wawa wu ba.

4 Ayin ana baci a̱ kuwa̱i

ka̱ta̱ o bono a iɗika,

kusheshe ku le ko okpo ta̱

ili i gbani a kanna ka nanlo.

5 Vuza vu una̱singai ɗa vuza na

Ka̱shile ka Yakubu kaꞋa ka̱ɓa̱nki ka̱ ni,

vuza na u keɗei a̱pa̱Ꞌa̱

u Vuzavaguɗu Ka̱shile ka̱ ni.

6 Vuza na u yaꞋin gaɗi n aduniyan,

n kuyene n ili i na yi punu dem,

a̱yi na u tsu ka̱na̱ ma̱riki ma̱ ni ko wannai.

7 U tsu kiɗa ta̱ afada e mejege wa aza a na o doroi,

u ci neke ta̱ ilikulyaꞋa wa aza a kambulu,

Vuzavaguɗu u tsu uta̱ka̱ ta̱ aza a ugbashi.

8 Vuzavaguɗu u tsu zuwa ta̱ a̱yimba̱ ene,

Vuzavaguɗu u tsu ɗa̱ngusa̱ ta̱ aza a na o doroi,

Vuzavaguɗu wi ta̱ a kuciga aza a usuɓi.

9 Vuzavaguɗu u tsu ere ta̱ omoci

u tsu la̱na̱ ta̱ mkpaꞋan n agapa a̱ma̱ci,

ama u tsu la̱nga̱sa̱ ta̱

ukuna wa aza a gbani-gbani.

10 Vuzavaguɗu wi ta̱ a kulyaꞋa tsugono ko wannai,

Avu Sihiyona, Ka̱shile ka̱ nu ki ta̱ a kulyaꞋa tsugono

tsukaya a kubana a tsukaya.

Cikpai Vuzavaguɗu.