1 Ka̱shile, tsu pana ta̱ na atsuvu a̱ tsu,

ikaya i tsu i dana tsu ta̱,

ili i gbagbaꞋin i na vu yaꞋin a makyan me le,

a ayin a cau.

2 Tsu na avu n ka̱ci ka̱ nu vu lokoi aza o kutono a̱ma̱li,

ɗa vu zuwai uma a̱ nu a iɗika i le.

tsu na vu lokoi uduniyan u na u buwai,

ama ɗa vu zuwai uma a̱ nu o yongo ba̱ri.

3 N otokobi e le a ɗa a lyaꞋi iɗika ya ba,

n utsura u le u ɗa a lyaꞋi iɗika ya ba,

ama n utsura u nu u ɗa,

tsu na vu yotsongi le vi ta̱ koɓolo n ele,

vi o kuyotsongu le vu ciga le ta̱.

4 Avu ɗa mogono ma̱ va̱ n Ka̱shile ka̱ va̱,

vu zuwai uma a Yakubu a̱ ciya̱i ulyaꞋi.

5 N utsura u nu u ɗa tsu unai irala i tsu.

N kula ku nu ku ɗa tsu dasasai irala i tsu.

6 N zuwa ka̱ɗu ka̱ va̱ a utan u va̱ ba,

kotokobi ka̱ va̱ ki a ku isa mu ba.

7 Ama vu isa tsu ta̱ ekiye a irala i tsu,

vu lokoi aza a na a iwain tsu.

8 Ka̱shile, ci ta̱ a ku cikpa wu makyan dem,

ka̱ta̱ kpamu tsu cikpa kula ku nu ko wannai.Kuvuka

9 Ama gogo na Ka̱shile vu vakangu tsu ta̱,

vu ka̱sukpa̱i o lokoi tsu,

vu doku vu uta̱ vu yaꞋan nwalu n osoji a̱ tsu ba.

10 Vu zuwai tsu sumai e kelime ka irala i tsu,

ɗa isai ili i na ci ni i ɗa yo okpoi i le.

11 Vu ka̱sukpa̱i a kiɗai tsu tsu nlala,

ɗa vu wacuwai tsu a̱ ka̱tsuma̱ ka iɗika i yoku.

12 Vu dengei uma a̱ nu,

n ikebe kenu,

vu ciya̱ kodokpotsu ka tsulaga tsa ba.

13 Aza a na ci ida̱shi ɗeɗevu o ku zoꞋoso tsu adama a̱ nu,

a kuyaꞋanka tsu ulami, o bonokoi tsu ili yi ugulani,

14 Vu zuwai tsu tsu okpoi ili ya agisana a̱ ka̱tsuma̱ ku uduniyan,

uduniyan a̱ kugba̱ɗa̱sa̱ ka̱ tsu aci,

n o goyoi tsu,

15 Makyan dem mi ta̱ a̱ ka̱tsuma̱ ko wono,

wono u kimba̱ mu ta̱ ra̱ka̱.

16 Adama aza a kadanshi ka gbani-gbani n ishikushi,

n adama a irala i va̱ aza a na a tsu ciga ku tsupa kutan.

17 Ili i nampa ya ra̱ka̱ i gita̱ ta̱ n a̱tsu,

ko a na wo okpoi tsu cinukpa n avu ba,

tsu koɗo kpamu uzuwakpani u na vu yaꞋin n a̱tsu ba.

18 Tsu yaꞋanka wu unambi wu usuɓi ba,

tsu ka̱sukpa̱ tana kutono kadanshi ka̱ nu ba.

19 N nannai dem vu kpa̱ɗa̱i kuɓa̱nka̱ tsu,

a nnama n kakamba n nanlo ma,

vu ka̱sukpa̱i tsu a̱ ka̱yimbi ka kpaɓam.

20 Ishi baci tsu ka̱sukpa̱ ta̱ kutono Ka̱shile ka̱ tsu,

ci yaꞋin avasa wa̱ a̱ma̱li,

21 mayun vi ta̱ e kuyeve,

adama a na vu yeve ta̱ kusheshe ku uma.

22 Ka̱shile, adama a̱ nu a ɗa i a ku una tsu makyan dem.

o bonokoi tsu a na nkyon n na a kukiɗa.

23 Ɗa̱nga̱! Vuzavaguɗu, yiɗa̱i ɗa vi alavu?

Ɗa̱nga̱! Ka̱ta̱ vu iwan tsu ko wannai ba.

24 Yiɗa̱i i zuwai ɗa vi o ku sokongu a̱shi a̱ nu?

Yiɗa̱i i zuwai ɗa vi a kucinukpa n atakaci a̱ tsu?

Adama a̱ yiɗa̱i vu zuwaka n tsu na i a kutakacika tsu ba.

25 Ci yikpa̱ ta̱, ɗa a tsugbai tsu a iɗika

a̱ ka̱sukpa̱i tsu ivaꞋin a̱ kubuta̱.

26 Ɗa̱nga̱, vu ɓa̱nka̱ tsu,

vu shiba̱ tsu,

adama a ucigi u nu una u tsu sabaꞋa ba.