1 YaꞋan Vuzavaguɗu wu ushuku wu a ayin atakaci,

yaꞋan kula ku Ka̱shile ka Yakubu ke ere wu,

2 YaꞋan u suꞋuku n uɓa̱nki ɗe a̱ ubuta̱ u ciɗa u ni,

ka̱ta̱ u zuwaka wu kukiye a Sihiyona.

3 YaꞋan u ciɓa n alyuka a̱ nu ra̱ka̱,

ka̱ta̱ kpamu u pana uyoꞋo u kuneꞋe ku kusongu ku nu. Kuvuka

4 YaꞋan u neke wu ili i na ka̱ɗu ka̱ nu ka cigai dem,

ka̱ta̱ u zuwa vu lyaꞋa kelime n ili i na vu sheshei kuyaꞋan dem.

5 A̱tsu ci ta̱ a kuyaꞋan yoroli i ma̱za̱nga̱ adama a ulyaꞋi u kelime u nu,

ci yaꞋan ka̱ɗiva̱ adama a ulyaꞋi u kelime u nu,

n kucikpa ku Vuzavaguɗu Ka̱shile ka̱ tsu.

Ka̱shile ka isa ta̱ ufolu u nu.

6 Gogo na n yeve ta̱ Vuzavaguɗu u tsu ere ta̱ mogono ma na u zagbai,

u tsu ushuki yi ta̱ ɗe gaɗi a̱ ubuta̱ u ciɗa u ni,

n utsura u gbayin u ni u ɗa u tsu zuwa yi u lyaꞋa kelime.

7 Aza o yoku a tsu zuwa ta̱ a̱ɗu e le wu ekeke odoku e le.

aza o yoku wu odoku e le

Ama a̱tsu tsu zuwa ta̱ a̱ɗu a̱ tsu u Vuzavaguɗu Ka̱shile ka̱ tsu.

8 IcuꞋu i uma a nanlo i ta̱ a̱ kuta̱ɗa̱tsa̱ a̱ yikpa̱,

ama a̱ tsu ci ta̱ a̱ kuɗa̱nga̱ ci shamgba n utsura.

9 Vuzavaguɗu ɓa̱nka̱ mogono adama a na u ciya̱ ulyaꞋi,

yaꞋan vu panaka tsu a makyan ma na ci ɗekei.