1 Ka̱shile ka̱ va̱ ka na mi a kucikpa.

Ka̱ta̱ vu paɗa bini ba,

2 adama a na uma a gbani-gbani

n aza ma̱ya̱nsa̱ka̱,

a̱ ɓa̱yuwa̱ ta̱ una̱ u le adama a̱ va̱,

a kudansa ka aꞋuwa adama a̱ va̱.

3 A kanza mu ta̱ n kadanshi ka tsurala,

a kuzama mu vishili ko unushi.

4 Kucikpa i o kubonoko mu n ka gbani-gbani,

ama mpa vuza va avasa ɗa.

5 A tsupai mu n ka gbani-gbani,

a na a kutsupa mu n kasingai,

n cigai le, ama ɗa a iwain mu.

6 Ɗa a danai,<<Zuwa vuma vu gbani-gbani

wo okpo yi vuza vu kanananai,

yaꞋan vuza na u shamkpa ni

u neke yi unushi.

7 Makyan ma na i a kuyaꞋanka yi afada,

yaꞋan a̱ ka̱na̱ yi n unushi,

yaꞋan avasa a̱ ni okpo unushi.

8 YaꞋan ayin a̱ ni okpo kenu,

yaꞋan vuza yoku u ɗika tsugbayin ci ni.

9 YaꞋan muku n ni mo okpo mkpaꞋan,

vuka vi ni kpamu vo okpo kagapa.

10 YaꞋan muku n ni

n ka̱na̱ kuka̱ra̱Ꞌa̱sa̱ a ufolu,

ka̱ta̱ kpamu o loko le a gali a ana i a̱ ida̱shi.

11 YaꞋan vuza na wi o kutono yi kutan

wi isa i li i na wi n ɗa ra̱ka̱,

omoci kpamu a̱ pura̱ ili i na u takacikai u ciya̱i.

12 Ka̱ta̱ vuza u yaꞋanka yi kasingai ba,

ko u sa̱Ꞌa̱ a mkpaꞋan n ni ba.

13 YaꞋan ntsukaya n ni ra̱ka̱ n kuwa̱,

ura ula e le a tsukaya tsu na tsa̱ kuta̱wa̱.

14 YaꞋan Vuzavaguɗu u ciɓa n unushi wi ikaya i ni,

ka̱ta̱ a cinukpa n unushi wa̱ a̱na̱ku a̱ ni ba.

15 YaꞋan Vuzavaguɗu u ciɓa n unushi u le ayin tutu,

adama a na a cinukpa n ula ele ra̱ka̱ aduniyan,

16 Adama a na u saꞋawa kusheshe kuyaꞋan ka singai ba,

ama u tsu takacika ta̱ aza a unambi n aza a yali

n aza a na a takpai a̱ɗu e le ali a̱ kuwa̱i.

17 U tsu ciga ta̱ kuyaꞋanka vuza una̱,

yaꞋan u ɗa u bono wa̱ ni,

u tsu ciga kuzuwaka vuza una̱singai ba,

yaꞋan vuza u zuwaka yi una̱singai ba.

18 U bonokoi una̱wuya tsu motogu ma ku uka,

yaꞋan una̱wuya u tono yi tsu mini mo kusoꞋo,

u uwa etele a̱ ni tsu maniꞋin ma̱ kusukuya̱.

19 YaꞋan wo okpo tsu kalaba

ka na a lapangi a kavangatsu ka̱ ni.

tsu kaɗambura ka na a shiyaka ni ko wannai.>>

20 YaꞋan Vuzavaguɗu,

u tsupa aza a na i a kushika mu,

aza na i a kadanshi ka gbani-gbani

adama a wuma u va̱.

21 Ama a vu Vuzavaguɗu,

vuzagbayin ɓa̱nka̱ mu,

adama a na e neke kula ku nu tsugbayin.

Adama a kasingai ku ucigi u nu u na u tsu sabaꞋa ba,

wawa mu.

22 Adama a na mpa vuza vu unambi ɗa,

vuza yali kpamu,

m pana ta̱ mɓa̱la̱ ka̱u a̱ ka̱ɗu ka̱ va̱.

23 M puwa̱nka̱i tsu kulu ku kulivi,

i a̱ ku ka̱pa̱tsa̱ mu tsu akyun a na uta̱ni u ka̱na̱i.

24 A̱ka̱nga̱tsu a̱ va̱ a̱ kuwa̱ ta̱

adama a kakuli n kambulu,

n yamba ta̱ ra̱ka̱.

25 Mo okpoi ili yi izoshi wa aza ishikushi,

a̱ tsu fila̱ ta̱ aci e le e enei mu baci.

26 Ɓa̱nka̱ mu, Vuzavaguɗu Ka̱shile ka̱ va̱.

wawa mu,

adama a ucigi u nu u na u tsu sabaꞋa ba.

27 Vuzavaguɗu! YaꞋan irala i va̱ e yeve

a na kukiye ku nu ku ɗa, ku yaꞋin nannai.

28 I ta̱ a kuyaꞋanka mu una̱wuya,

ama a vu vi ta̱ a kuzuwaka mu una̱singai,

i ta̱ a̱ kuta̱wa̱ n vishili, ka̱ta̱ okpo n wono

ka̱ta̱ mpa kagbashi ka̱ nu, n yaꞋan ma̱za̱nga̱.

29 YaꞋan wono u pala irala i va̱,

a pala le n akashi o wono.

30 N una̱ u va̱ u ɗa mi a kucikpa Vuzavaguɗu,

mi ta̱ a kucikpa yi o koɓolo ka uma a̱bunda̱i,

31 Adama a na u tsu shamkpa ta̱

vuza yali u wawa yi

e ekiye aza na i a kukiɗaka yi afada a ukpa̱.