1 Vuzavaguɗu zuwaka mu atsuvu, vu ushuku mu,

adama a na mpa vuza vu unambi ɗa n vuza yali.

2 Ere wuma u va̱ a̱ ubuta̱ ukpa̱,

adama a na mpa vuza vu usuɓi ɗa,

wawa kagbashi ka̱ nu,

adama a na avu ɗa Ka̱shile ka̱ va̱.

3 Pana asuvayali a̱ va̱, Vuzavaguɗu,

mi ta̱ avasa wa̱ nu kanna dem.

4 Vuzavaguɗu, zuwa kagbashi ka̱ nu

ka yaꞋan ma̱za̱nga̱,

adama a na n neke ta̱ wuma u va̱ wa̱ nu.

5 Vuzavaguɗu, avu vuza vu kasingai ɗa

n kacinukpi ka unushi,

vi ta̱ n ka̱bunda̱i ka ucigi u na u tsu sabaꞋa ba

wa aza na i e meɗevile wa̱ nu ra̱ka̱.

6 Zuwa atsuvu wa avasa a̱ va̱, Vuzavaguɗu,

pana ma̱shi ma̱ va̱ ma̱ kula̱nsa̱ uɓa̱nki.

7 Mi ta̱ e ɗeke wu a kanna ka atakaci,

adama a na vi ta̱ a̱ ku ushuku avasa a̱ va̱.

8 Vuzavaguɗu, a̱ ka̱tsuma̱ ka̱ a̱ma̱li

ko vuza te wi lo tsu nu ba,

ko vuza te, wi a kufuɗa kuyaꞋan ili i na vi a kuyaꞋan ba.

9 Uduniyan u na vu yaꞋin ra̱ka̱,

i ta̱ a̱ kuta̱wa̱ a̱ kuɗa̱ngu e kelime ka̱ nu, Vuzavaguɗu,

i ta̱ e kuneke kula ku nu tsugbayin.

10 Adama a na avu vuza gbayin ɗa,

vu na vu ci yaꞋan ili i mereve,

avu endeꞋin avu ɗa Ka̱shile,

11 Vuzavaguɗu, piꞋisaka mu ili i na vu cigai n yaꞋan,

mpa tana mi ta̱ o kutono wu mayun,

zuwa mu n ga̱nda̱ka̱ wu n ka̱ɗu kete.

12 Vuzavaguɗu Ka̱shile ka̱ va̱,

mi ta̱ a kucikpa wu n ka̱ɗu kete,

mi ta̱ a kusala tsugbayin tsu nu ko wannai.

13 Ucigi u gbayin u nu u na tsu sabaꞋa,

a kubana wa̱ va̱ wi kugisangu ba,

adama a na vu isa mu a kasaun uga̱vi.

14 Aza a ugbamukaci a̱ tuka̱ mu ta̱ n vishili, Ka̱shile,

koɓolo ka uma a gbani-gbani a̱ kula̱nsa̱ wuma u va̱,

uma a na e ci neke wu tsugbayin ba.

15 Ama avu Vuzavaguɗu, avu Ka̱shile ka asuvayali kaꞋa n kasingai,

vuza na u ci yaꞋan wupa gogo ba,

vuza wu ucigi wa̱ a̱bunda̱i m ma̱riki,

16 La̱na̱ mu, vu pana asuvayali a̱ va̱,

vu neke kagbashi ka̱ nu utsura

vu wawa maku ma kagbashi ka vuka ka̱ nu.

17 Vuzavaguɗu, yotsongu mu urotu u kasingai ka̱ nu,

aza a na iwain mu i ta̱ e kene, ka̱ta̱ a pana wono,

ɗa baci enei vu nekei mu kadanshi

vu ɓa̱nka̱i mu kpamu.