1 Samuel 17

गोलियतो रा इस्राएली सिपाईया खे ललकारना

1 तेस बखते पलिश्ती सिपाईए इस्राएली सेना ते युद्ध करने खे आपणी सेना कट्ठी कित्ती ओर यहूदा प्रदेशो रे सोको शईरो दे मिली की सोको ओर अजेका बीचे एपेसदम्मीम जगा दे डेरे लगाए। 2 शाऊले आपणी इस्राएली सेना खे कट्ठे करी की एला नाओं री तराईया दे पलिश्ती सेना रे सामणे डेरे लगाए। 3 पलिश्ती सेना एकी तरफा रे पाह्ड़ो पाँदे ओर इस्राएली सेना दूजी तरफा रे पाह्ड़ो पाँदे खड़े दे रये ओर दुँईं बीचे तराई थी।

4 तेबे पलिश्तिया रे डेरे बीचा ते गोलियत नाओं रा एक वीर निकल़ेया, जो गत शईरो रा था ओर तेसरी लम्बाई नौ फूटो ते जादा थी। 5 तेसरे सिरो पाँदे पीतल़ी रा टोप था ओर तिने पीतल़ी रे पत्तरे रा एक झिलम पईनी राखेया था, जेतेरे रा बजन लगभग 57 किलो था। 6 तेसरी खुटिया पाँदे पीतल़ी रे कवच थे ओर तेसरी पीठी पाँदे बड़छी बानी राखी थी। 7 तेसगे एक बऊत बड़ा बड़छा बी था, जो जुलाए रिया डोंगिया रे बराबर मोटा था, ओर तेते लोए रे बड़छे रे सिरे रा बजन लगभग सात किलो था ओर तेसगे एक ढाल बी थी जेतेखे चकणे खे एक ओर सिपाई था जो तेसते आगे-आगे चलो था। 8 गोलियत खड़ा ऊई की इस्राएली सेना खे ललकारी की बोलणे लगेया, "तुसे एती आई की लड़ाई करने खे कऊँ खड़ी रे? आऊँ पलिश्ती सेना रा एक सैनिक आ, ओर तुसे शाऊलो रे दास ए। एबे तुसे शाऊलो रिया सेना बीचा ते केसी एकी सैनिको खे मां साथे लड़ने खे पाह्ड़ो ते थाले पेजो। 9 जे से मां साथे लड़ी की माखे काई देयो, तेबे तो आसे तुसा रे दास ऊई जाणे, पर जे आऊँ तेसखे काई देऊँ, तो तुसा खे आसा रे दास बणी की म्हारी सेवा करनी पड़नी।" 10 तेबे तिने पलिश्तिये फेर बोलेया, "आऊँ आजके दिने इस्राएली सेना खे ललकारूँआ, केसी माणूंए खे मांगे पेजो, ताकि आसे एकी-दूजे साथे लड़ूँ।" 11 तेस पलिश्तिये रिया इना गल्ला खे सुणी की शाऊल ओर सारे इस्राएली कबराई गे ओर सेयो बऊत जादा डरी गे।

दाऊदो रा शाऊलो रे डेरे दे जाणा

12 दाऊद तो यहूदा प्रदेशो रे बेतलेहम शईरो रे यिशै नाओं रे एकी माणूंए रा पाऊ था, जो एप्राती कुलो रा था। तेसरे आठ पाऊ थे ओर से मर्द शाऊलो रे राज्य रे बखतो दे बऊत स्याणा ओर कमजोर ऊईगा था। 13 यिशै रे तीन बड़े पाऊ यो थे मतलब जेठे रा नाओं एलीआब, दूजे रा अबीनादाब ओर तीजे रा नाओं शम्मा था। ये तीनो शाऊलो पीछे ऊई की पलिश्तिया ते लड़ने खे गये थे। 14 यिशै रा सबी ते छोटा पाऊ दाऊद था ओर तेसरे तीनो बड़े पाऊ शाऊलो साथे युद्धो रे मैदानो दे लड़ने खे गये थे। 15 पर दाऊद बेतलेहमो दे आपणे बाओ रिया पेडा-बाकरिया चराओ था ओर शाऊलो गे बी आया-जाया करो था। 16 से पलिश्ती गोलियत चाल़ी दिन तक प्यागा ओर साँजा तिना रे सामणे आई तिना खे ललकारेया करो था। 17 एक दिन यिशै आपणे पाऊ दाऊदो खे बोलेया, "ये बी किलो*17:17 बी किलो एक एपा पूजेया रा नज्ज ओर इना दस रोटिया लई की डेरे दे आपणे पाईया गे फटाफट लई जा, 18 ओर पनीरो रिया यो दस टिक्किया तिना रे सेनापतिया खे लई जा ओर आपणे पाईया खे ठीक ठाक देखी की तिना री कोई नशाणी लई आया। 19 राजा शाऊल, तेरे पाई ओर सारे इस्राएली मर्द एला नाओं री तराईया दे पलिश्तिया साथे लड़ने खे जाई रे।" 20 दूजे दिने दाऊद प्यागा-प्यागा उठी की पेडा-बाकरिया खे केसी रखवाल़े गे छाडी की, आपणे बाओ यिशै रे कईणे रे मुताबिक तिना चीजा खे लई की चली गा, ओर जेबे सेना लड़ने खे जाणे लगी री थी ओर लड़ाई करने खे ललकारने लगी री थी, तेसी बखते से जेती तिने मोर्चा बानी राखेया था से तेती पऊँचेया। 21 तेबे इस्राएली सिपाई ओर पलिश्ती सिपाई आमणे सामणे युद्ध करने खे खड़े ऊईगे।

22 दाऊद आपणे समानो खे रखवाल़ेया रे आथो दे छाडी की लड़ाईया रिया जगा खे दौड़ेया ओर आपणे पाईया गे जाई की तिना रा सुख-साँद पूछेया। 23 दाऊद आपणे पाईया साथे गल्ला करने ई लगी रा था कि पलिश्तिया रिया सेना बीचा ते गत शईरो रा रणे वाल़ा गोलियत नाओं रा से पलिश्ती योद्धा आगे आई गा ओर पईले जेड़िया गल्ला बोलणे लगेया ओर दाऊदे सेयो सुणिया।

24 तेस सैनिको खे देखी की सारे इस्राएली सैनिक बऊत जादा डरी की तेसरे सामणे ते नठीगे। 25 तेबे इस्राएली सिपाई आपू बीचे बोलणे लगे, "क्या तुसे से सिपाई देखी राखेया जो आगे आऊणे लगी रा? पक्का से इस्राएली लोका खे ललकारने खे आगे आऊणे लगी रा ओर जेस केसी से काणा, तेसखे राजे बऊत पैसा देणा ओर आपणी एक बेटी तेसखे ब्यायी देणी ओर तेसरे बाओ रे कराने खे इस्राएल देशो दे मामला नि देणा पड़ना।" 26 तेबे दाऊदे तिना सिपाईया ते जो तेस साथे खड़ी रे थे पूछेया, "जेस ये पलिश्ती सिपाई काणा ओर इस्राएली लोका री बेज्जती दूर करनी तेसखे क्या ईनाम मिलणा? से तो बिना खतना कित्तेया रा माणूं ए, तेसरी क्या ईम्मत ए कि से जिऊँदे परमेशरो री सेना खे ललकारो?" 27 तेबे सिपाईए तेसखे सेयो ई गल्ला बोलिया, मतलब ये कि जो कोई तेसखे काओगा तेस साथे एड़ा-एड़ा करेया जाणा। 28 जेबे दाऊद तिना सिपाईया साथे गल्ला करने लगी रा था, तेबे तेसरा बड़ा पाई एलीआब सुणने लगी रा था ओर से दाऊदो ते बऊत रोषे ऊई की बोलणे लगेया, "तूँ एती कऊँ आई रा? बणो दे तूँ तिना थोड़िया जिया पेडा-बाकरिया खे केसगे छाडी की आई रा? तेरा कमण्ड ओर तेरे मनो री बुराई माखे पता ए; तूँ तो लड़ाई देखणे खे एती आई रा।" 29 दाऊदे बोलेया, "मैं एबे क्या करी राखेया? आऊँ तो बस पूछणे ई लगी रा था।" 30 तेबे दाऊदे आपणे पाईए रिया तरफा ते मूँ फेरी की दूजे सिपाईए रे सामणे ऊई की सेयो ई गल्ला कित्तिया ओर सिपाईए तेसखे पईले जेड़ा ज्वाब दित्तेया।

31 जेबे दाऊदो रिया गल्ला री चर्चा ऊणे लगी, तेबे किने जाईकी राजा शाऊलो खे बी सेयो गल्ला सुणाईया। फेर तिने दाऊद आपू गे बुलाया। 32 तेबे दाऊदे राजा शाऊलो खे बोलेया, "आसा बीचा ते केसी खे बी तेसते डरने री जरूरत नि ए, ओ राजा तेरा दास जाई की तेस पलिश्ती माणूंए साथे लड़ना।" 33 शाऊले दाऊदो खे बोलेया, "तूँ जाई की तेस पलिश्ती माणूंए साथे नि लड़ी सकदा, कऊँकि तूँ बाल़क ईए ओर से तो पईले ते ई बड़ा योद्धा ए।" 34 पर दाऊदे शाऊलो खे ज्वाब दित्तेया, "ओ राजा, तेरा दास आपणे बाओ रिया पेडा-बाकरिया चराओआ ओर जेबे कोई शेर या पालू चूण्डो बीचा ते केसी मिन्टूए खे चकी की लई जाओ था, 35 तेबे आऊँ तेसरा पीछा करी की तेसखे बचाऊँ था ओर मिन्टू तेसरे मुंए ते छुड़ाया ओर जेबे से मां पाँदे अमला करो था, तेबे आऊँ तेसखे थोबड़े ते पकड़ी की काई देऊँ था। 36 तेरे दासे शेर ओर पालू दोनो काये ओर से बिना खतना कित्ते रा पलिश्ती बी काया जाणा, कऊँकि तिने जिऊँदे परमेशरो री सेना ललकारी राखी।" 37 तेबे दाऊदे आगे बोलेया, "यहोवा जिने आऊँ पालू ओर शेर दुँईं रे पंजे ते बचाई राखेया, तेस आऊँ एस पलिश्तिये ते बी बचाणा।" शाऊले दाऊदो खे बोलेया, "जा, यहोवा तां साथे रओ।" 38 तेबे शाऊले आपणे टाल्ले खोली की दाऊदो खे पन्याए ओर पीतल़ी रा टोप तेसरे सिरो पाँदे राखी ता ओर झिलम तेसखे पन्याया। 39 दाऊदे तेसरी तलवार टाल्लेया पाँदे गूड़ी ओर चलणे री कोशिश कित्ती, तिने सेयो पईले कदी बी पईनी नि राखे थे। इजी री खातर दाऊदे शाऊलो खे बोलेया, "इना खे पईनी की मांते चली नि ऊँदा, कऊँकि मैं यो पईले कदी बी पईनी नि राखे।" तेबे दाऊदे सेयो खोली ते। 40 तेबे तिने आपणा डण्डा आथो दे लई की नाल़े ते पाँज चिकणे पात्थर छाँटी की आपणे गवाल़े री थैलिया, मतलब आपणे चोल़े दे राखे ओर आपणा खरेबण आथो दे लई की पलिश्तिये रे नेड़े चली गा।

दाऊदो रा गोलियतो खे काणा

41 पलिश्ती चलदे-चलदे दाऊदो रे नेड़े पऊँछणे लगेया ओर जिने माणूंए तेसरी बड़ी टाल़ लई राखी थी से तेसते आगे चलणे लगी रा था।

42 जेबे पलिश्ती सिपाईए दाऊद देखेया, तेबे से तेसरा मजाक उडाणे लगेया, कऊँकि से बाल़क ई था ओर तेसरे मुंए पाँदे लाली चमको थी ओर से सुन्दर था। 43 तेबे पलिश्तिये दाऊदो खे बोलेया, "तूँ डण्डा लई की मांगे आऊणे लगी रा ताखे क्या लगोआ कि आऊँ एक कुत्ता ए?" तेबे से आपणे देवतेया रे नाओं लई की दाऊदो खे कोसणे लगेया।

44 तेबे पलिश्तिए दाऊदो खे बोलेया, "मांगे आओ, मां ताखे काई की तेरा मास सर्गो रे पंछिया खे ओर बणो रे जानवरा खे देई देणा।" 45 दाऊदे पलिश्तिए खे बोलेया, "तूँ तो तलवार, भाल़ा ओर कटार लई की मांगे आऊणे लगी रा, पर आऊँ सेना रे परमेशर यहोवे रे नाओं ते तांगे आऊणे लगी रा, जो इस्राएली सेना रा परमेशर ए ओर तैं सेई ललकारी राखेया! 46 आज यहोवे तूँ मेरे जरीये अराई देणा, मां तूँ काणा, तेरा सिर तेरे धड़ो ते लग करना ओर मां आज पलिश्ती सिपाईया रिया लाशा सर्गो रे पंछिया खे ओर तरतिया रे जानवरा खे देई देणियां, तेबे सारी तरतिया रे लोका खे पता लगी जाणा कि इस्राएलो दे एक परमेशर आ। 47 तेबे एती जितणे लोक ए तिना सबी बी जाणी लणा कि यहोवा तलवार या भाल़े रे जरीये नि बचांदा, कऊँकि लड़ाई यहोवे री ए ओर तेस ई तुसे म्हारे जरीये अराणे।"

48 जेबे पलिश्ती गोलियत उठी की दाऊदो ते लड़ने खे नेड़े आया, तेबे दाऊद तिना रिया सेना रिया तरफा खे तेसरा सामणा करने खे दौड़ेया। 49 तेबे दाऊदे आपणी गवाल़ेया री थैलिया दे आथ पाई की तिजी बीचा ते एक पात्थर काडेया ओर से खरेबणो दे राखी की पलिश्ती गोलियतो रे माथे दे एड़ा बाया कि पात्थर तेसरे माथे रे पीतरे कूसी गा ओर से जमीना दे मुंए रे पारे रूड़ी गा। 50 दाऊदो रे आथो दे तलवार नि थी, फेर बी दाऊदे पलिश्ती गोलियतो पाँदे खरेबण ओर एक ई पात्थरो रे जरीये प्रबल ऊई की से काईता। 51 तेबे दाऊद दौड़ी की पलिश्ती गोलियतो पाँदे खड़ा ऊआ ओर तेसरी ई तलवार पकड़ी की म्यानो ते खींजी ओर तेते की तेसरा सिर बाडीता। ये देखी की कि म्हारा वीर माणूं मरी गा पलिश्ती सिपाई नठीगे। 52 तेबे ये देखी की इस्राएली लोक ओर यहूदी सैनिक ललकारने लगे ओर गत ओर एक्रोनो रे बड़े द्वारो तक तिना रा पीछा करदे गये ओर पलिश्ती सिपाईया रिया लाशा शारैमो*17:52 शारैमो यहूदा प्रदेशो रे शपेला जगा रा एक शईर ए, जो एस बखते पलिश्तिया रे कब्जे दे था। रिया बाटा दे ओर इना शईरा तक पड़िया दिया रईया। 53 तेबे इस्राएली सिपाई पलिश्तिया रा पीछा छाडी की वापस आईगे ओर तिना रे डेरे लूटी ले। 54 तेबे दाऊद पलिश्ती गोलियतो रा सिर यरूशलेम शईरो दे लईगा ओर तेसरे अथियार आपणे डेरे दे राखी ते।

55 जेबे शाऊले दाऊद तेस पलिश्ती गोलियतो ते लड़ने खे जांदा ऊआ देखेया, तेबे तिने आपणे सेनापति अब्नेरो ते पूछेया, "ओ अब्नेर, से जवान केसरा पाऊ ए?" तिने बोलेया, "ओ राजा, तेरी जिन्दगिया री कसम, आऊँ नि जाणदा।" 56 राजे तेसखे बोलेया, "तूँ पता करी लो कि से जवान केसरा पाऊ ए।"

57 जेबे दाऊद पलिश्ती गोलियतो खे काई की वापस ऊआ, तेबे अब्नेरे दाऊद पलिश्तिये रा सिर आथो रे लई की राजा शाऊलो सामणे पऊँचाया। 58 तेबे शाऊले तेसते पूछेया, "तूँ केसरा पाऊ ए?" दाऊदे ज्वाब दित्तेया, "ओ राजा, आऊँ तो तेरे दास बेतलेहमी यिशै रा पाऊ ए।"