1 तेबे दाऊद रामा शईरो रे नबायोत जगा ते नठी गा ओर योनातानो गे जाई की बोलणे लगेया, "मैं क्या गल़त करी राखेया? मांते क्या पाप ऊई रा? मैं तेरे बाओ री नजरा दे एड़ा कुण जा अपराध करी राखेया कि से माखे काणा चाओआ?" 2 योनाताने दाऊदो खे बोलेया, "एड़ी गल्ल नि ए, तूँ काया नि जाणा। सुण, मेरा बाओ माखे बिना बताए ना तो कोई बड़ा काम करदा ओर ना ई छोटा, तेबे तेस एड़ी गल्ल मांते कऊँ छिपाणी? एड़ी कोई गल्ल नि ए।" 3 तेबे दाऊदे कसम खाई की बोलेया, "तेरा बाओ पक्का जाणोआ कि आऊँ तेरा अच्छा दोस्त ए ओर से सोचो ऊणा कि योनातानो खे एसा गल्ला रा पता नि लगो, एड़ा नि ओ कि से दु:खी ऊई जाओ। पर जेड़े यहोवे रा ऊणा सच ए ओर तूँ जिऊँदा ए, तिंयाँ ई ये बी सच ए कि आऊँ मौती रे बऊत ई नेड़े आ!" 4 योनाताने दाऊदो खे बोलेया, "जो कुछ तेरा जियू बोलो, मां सेई तेरिया तँईं करना।"

5 दाऊदे योनातानो खे बोलेया, "सुण, काल आसा रे लोका नवें चाँदो रा त्यार मनाणा ओर माखे जरूरी ए कि आऊँ राजे साथे बैठी की रोटी खाऊँ, पर तूँ माखे बिदा कर ओर मां परसु साँजा तक मैदानो दे लूके दे रणा। 6 जे तेरा बाओ मेरे बारे दे पूछो, तो तैं बोलणा, दाऊदे आपणे शईर बेतलेहमो दे चट जाणे खे मांते छुट्टी मांगी राखी, तेसरे गोत्रो रे सारे लोका तेती, तेसरे शईरो दे सालो री बलि चढ़ाणी। 7 जे तेरा बाओ ईंयाँ बोलो, ये ठीक ए! तेबे मां जाणी लणा कि आऊँ बचीगा दा ए, पर जे तेसरा कोप बऊत पड़की जाओ, तो जाणी लणा कि से मेरा बुरा करना चाओआ। 8 तेबे तैं आपणे दासो साथे कृपा रा बर्ताओ करना, कऊँकि तैं यहोवे री कसम खुल़ाई की आपणे दासो खे आपू साथे वाचा बनाई राखी। पर जे मांते कोई अपराध ऊई रा ओ, तो तूँ माखे आपू काईदे, पर माखे आपणे बाओ रे आथो दे नि दे।" 9 योनाताने बोलेया, "एड़ी गल्ल कदी नि ऊणी! जे आऊँ पक्का जाणदा कि मेरे बाओए ताखे काणे रा मन बणाई राखेया ए, तो मां ताखे बताई देणा था।" 10 दाऊदे योनातानो ते पूछेया, "जे तेरा बाओ ताखे सख्त ज्वाब देयो, तो मांगे केस बताणा?" 11 तिने दाऊदो खे बोलेया, "चल आसे मैदानो खे निकल़ी जाऊँए।" तेबे सेयो दोनो मैदानो रिया तरफा खे चली गे।

12 तेबे योनातान दाऊदो खे बोलणे लगेया, "इस्राएलो रे परमेशर यहोवे री कसम, जेबे आऊँ परसु तेरे बारे दे आपणे बाओ रा पेत जाणूं, कि से तेरे बारे दे खरा सोचोआ, तो मां ताखे बताणे खे दूत पेजणे। 13 जे मेरे बाओ रा मन ताखे काणे रा ओ, ओर आऊँ तांगे ये बताई की ताखे बिदा करुँ कि तूँ रामो दे चली जा, जे आऊँ एड़ा नि करुँ तो यहोवा मां योनातानो साथे सख्तो ते सख्त बर्ताओ करो। एबे, जेड़ा यहोवा मेरे बाओ साथे था, तेड़ा ई से तां साथे रओ। 14 जदुओ तक आऊँ जिऊँदा रऊँ, मां पाँदे दया करदे रणा, जेड़ी यहोवे री दया ओई। 15 पर मेरे मरने ते बाद बी, मेरे कराने पाँदे दया करदे रणा। तेबे बी मेरे परिवारो पाँदे दया करदे रणा, जेबे यहोवा दाऊदो रे हर एकी दुश्मणो खे तरतिया पाँदा ते नाश करी चुकोगा।" 16 ईंयाँ योनाताने दाऊदो रे कराने साथे ये बोली की वाचा बानी, "यहोवा दाऊदो रे दुश्मणा ते बदला लओ।" 17 योनातान दाऊदो ते प्यार करो था ओर तिने तेसखे फेर कसम खुल़ाई, कऊँकि से दाऊदो ते आपणे समान प्यार करो था।

18 तेबे योनाताने तेसखे बोलेया, "काल नवें चाँदो रा त्यार ए, ओर तेरी फिकर करी जाणी, कऊँकि तेरी कुर्सी खाली रणी। 19 तूँ परसु साँजा रे बखते जरूर आया ओर तेते जगा दे जाई की जेती तूँ पईले लूकेया था, मतलब एजेल नाओं रे पात्थरो गे रया ओर मेरा इन्तजार करेया। 20 तेबे मां पात्थरो रिया तरफा खे, मानो आऊँ तिना नशाणे पाँदे चलाणे लगी रा तीन तीर चलाणे। 21 तेबे मां आपणे सेवा-टईल करने वाल़े दास ये बोली की पेजणे कि जाई की तीरो खे टोल़ी की लई आओ। जे आऊँ साफ-साफ बोलूँ कि देख, तीर एती तेरी तरफा खे ए, तो तूँ तिजी खे लई आओ, कऊँकि यहोवे री जिन्दगिया री कसम, ताखे शान्तिया खे छाडी की ओर कुछ नि ऊणा। 22 पर जे आऊँ दासा खे बोलूँ, सुण, तीर तेती तेरी तरफा खे ए, तो तूँ नठी जाया, कऊँकि यहोवे तूँ बिदा करी राखेया। 23 तेते गल्ला रे बारे दे जेतेरी चर्चा मैं ओर तैं आपू बीचे करी राखी, यहोवा मां ओर तां बीचे सदा खे गवा रणा।" 24 तेबे दाऊद मैदानो दे जाई की लूकी गा ओर जेबे नवें चाँदो रा त्यार ऊआ, तेबे राजा शाऊल रोटी खाणे बैठेया। 25 राजा पईले जेड़ा आपणे तेते आसनो पाँदे बैठेया जो पीतो गे था ओर योनातान खड़ा ऊआ ओर सेना रा परदान अब्नेर शाऊलो नेड़े बैठेया, पर दाऊदो री जगा खाली रयी। 26 दाऊदो रे ना ऊणे पाँदे तेस दिने तो शाऊल ये सोची की चुप रया कि इजी री कोई ना कोई बजा ऊणी, से पक्का शुद्ध नि ऊणा। 27 तेबे नये चाँदो रे दूजे दिने फेर दाऊदो री जगा खाली रयी ओर शाऊले आपणे पाऊ योनातानो ते पूछेया, "क्या बजा ए कि यिशै रा पाऊ दाऊद ना तो काल रोटी खाणे आया था ओर ना ई आज आई रा?" 28 योनाताने शाऊलो खे बोलेया, "दाऊदे बेतलेहम शईरो दे जाणे खे मांते छुट्टी मांगी 29 ओर बोलेया कि माखे जाणे दे, कऊँकि शईरो रे म्हारे कुलो रा यज्ञ ए ओर मेरे पाईए माखे तेती आजीर ऊणे री आज्ञा देई राखी। एबे जे मां पाँदे तेरी दया-दृष्टि ओ, तो माखे जाणे दे कि आऊँ आपणे पाईया साथे मिली आऊँ। इजी बजा ते से राजे साथे रोटी खाणे नि आया।"

30 तेबे शाऊल योनातानो पाँदे बऊत गुस्से ऊआ ओर तिने तेसखे बोलेया, "तूँ आपणी माया जेड़ा राजद्रोही ऊईगा दा, से बी मेरी गल्ल नि मानदी, आऊँ जाणूंआ कि तूँ यिशै रे पाऊए साथे आ। ये सब तेरे ओर तेरिया माया खे बेज्जतिया री गल्ल ऊणी। 31 कऊँकि जदुओ तक यिशै रा पाऊ तरतिया पाँदे जिऊँदा रणा, तदुओ तक ना तो तूँ ओर ना तेरा राज बणेया दा रणा। इजी री खातर यबु पेजी की तेसखे मांगे ल्याओ, कऊँकि से पक्का काया जाणा।" 32 योनाताने आपणे बाओ खे ज्वाब देई की बोलेया, "से कऊँ काणा? तिने क्या करी राखेया?" 33 तेबे शाऊले तेसखे काणे खे तेस पाँदे भाल़ा चलाया, इजी ते योनाताने जाणी ला कि मेरा बाओ दाऊदो खे काणा चाओआ। 34 तेबे योनातान रोषो रे जल़ी की मेजो गे ते उठी गा ओर त्योआरो रे दूजे दिने रोटी नि खाई, कऊँकि से बऊत दु:खी था, कऊँकि तेसरे बाओए दाऊदो री बेज्जती कित्ती थी।

35 आगली प्यागा योनातान एकी छोटे पाऊए खे साथे लई की मैदानो दे दाऊदो खे मिलणे खे ठराई री जगा दे गया। 36 योनाताने तेस माठे खे बोलेया, "दौड़ी की जो-जो तीर आऊँ चलाऊँ तिना खे टोल़ी की ली आओ।" पाऊ दौड़ने ई लगी रा था कि तिने एक तीर तेसते आगे चलाया। 37 जेबे पाऊ योनातानो रे चलाए रे तीरो री जगा दे पऊँचेया, तेबे योनाताने तेसखे पीछा ते आका पाई की बोलेया, "तीर तो तेरे आगे आ।" 38 तेबे योनाताने पाऊए खे पीछा ते आका पाई की बोलेया, "फटाफट कर, रूक नि।" तेबे योनातानो साथे गया दा पाऊ तीर कट्ठे करी की योनातानो गे लई आया। 39 इजी रा पेत पाऊ तो कुछ नि जाणो था, बस योनातान ओर दाऊद ई इजी गल्ला खे जाणो थे। 40 योनाताने आपणे तीर ओर बाण तेस पाऊए गे देई की बोलेया, "जा, इना खे शईरो दे लई जा।" 41 जिंयाँ ई पाऊ चली गा, तिंयाँ ई दाऊद दक्खण दिशा ते पात्थरो रे टेरो गे ते उठेया ओर योनातानो रे सामणे तीन बार थाले चूकी की तन्यवाद कित्तेया, तेबे तिने एकी-दूजे खे गल़े लगाया ओर एकी-दूजे साथे रोए, पर दाऊदो रा रोणा योनातानो ते जादा था। 42 तेबे योनाताने दाऊदो खे बोलेया, "रामो रे चली जा, कऊँकि आसे दुँईं एकी-दूजे साथे ये बोली की यहोवे रे नाओं री कसम खाई राखी कि यहोवा मां ओर तां बीचे ओर मेरे ओर तेरे कुलो बीचे सदा रओ।" तेबे से उठी की चली गा ओर योनातान शईरो दे वापस गया।