1 जेबे सुलैमान ये प्रार्थना परमेशरो ते करी चुकेया, तेबे स्वर्गो ते आग निकल़ी की होमबलि ओर बाकी बलिया फूकी तिया ओर यहोवे रा तेज मन्दरो दे परी गा। 2 पुरोईत यहोवे रे मन्दरो दे नि जाई सके, कऊँकि यहोवे रा तेज मन्दरो दे परी गा था। 3 ओर जेबे आग निकल़ी ओर यहोवे रा तेज मन्दरो पाँदे छाईगा, तेबे सारे इस्राएली देखदे रये ओर मेल्ले दे पड़ी की आपणा-आपणा मूँ जमीना रिया तरफा खे करी की माथा टेकेया ओर ईंयाँ बोली की यहोवे रा तन्यवाद कित्तेया, "यहोवा पला ए, तेसरी करूणा सदा री ए।"

4 तेबे सारी प्रजा समेत राजे यहोवे खे ओर बलि चढ़ाई। 5 सुलैमान राजे 22,000 बल़द ओर 120,000 पेडा-बाकरिया चढ़ाईया। ईंयाँ पूरी प्रजा समेत राजे यहोवे रे मन्दरो री प्रतिष्ठा कित्ती। 6 तेबे पुरोईत आपणा-आपणा काम करने के खड़े रये ओर लेविये बी यहोवे रा गीत गाणे खे बाजे लई की खड़ी रे थे, जो दाऊद राजे यहोवे री सदा री करूणा रिया बजा ते तेसरा तन्यवाद करने खे बणाई की तिना रे जरीये स्तुति कराई थी ओर तिना सामणे पुरोईत लोक तुरहिया बजांदे रये ओर सारे इस्राएली खड़े रये। 7 तेबे सुलैमाने यहोवे रे मन्दरो रे सामणे आँगणो बीचे एक जगा पवित्र करी की होमबलि ओर मेलबलिया री चर्बी तेथी चढ़ाई, कऊँकि सुलैमानो री बणाई री पीतल़ी री बेदी होमबलि ओर नज्जो री बलिया री चर्बिया खे छोटी थी।

8 तेस ई बखते सुलैमाने ओर तेस साथे हमातो री काट्टिया ते लई की मिस्रो रे नाल़े तको रे सारे इस्राएलो रे लोके साता दिना तक चूँगड़िया रा त्यार मनाया। 9 ओर आठुए दिने तिने सबी मिली की एक बड़ी सभा कित्ती, तिने बेदिया री प्रतिष्ठा सात दिन तक कित्ती ओर त्यार बी साता दिना तक मनांदे रये। 10 सातुए मीन्ने रे तेईए दिने तिने प्रजा रे लोक बिदा कित्ते कि सेयो आपणे-आपणे डेरे खे जाओ ओर सेयो तेसा पलाईया रिया बजा ते जो यहोवे दाऊद ओर सुलैमान ओर आपणी प्रजा इस्राएलो पाँदे कित्ती थी खुश थे।

11 ईंयाँ राजा सुलैमान परमेशरो रा मन्दर ओर राजमईलो खे बनाणे रा काम पूरा कित्तेया ओर यहोवे रे मन्दरो दे ओर आपणे मईलो दे जो कुछ तिने बनाणा चाया, तिदे तेसरे मनो री इच्छा पूरी ऊई। 12 तेबे यहोवे राती तेसखे दर्शण देई की तेसखे बोलेया, "मैं तेरी प्रार्थना सुणी ओर ये जगा हर तरआ रे बलिदानो खे देई राखी। 13 जे आऊँ केसी दिने सर्गो खे एड़ा बन्द करुँ कि बर्खा नि ओ या टिड्डिया खे देश उजाड़ने खे बोलूँ या आपणी‍ प्रजा दे बमारी फैलाऊँ, 14 तेबे जे मेरी प्रजा रे लोक जिना खे मेरे बोलोए, दीन ऊई की प्रार्थना करो ओर मेरे दर्शणो खे टोल़ो ओर आपणी बुरी चाला ते फिरो, तो मां स्वर्गो ते सुणी की तिना रे पाप माफ करने ओर तिना रा देश जेड़ा पईले फसल पैदा करो था तेड़ा ई फेर फसल पैदा करने वाल़ा बणाई देणा।" 15 आजो ते लई की जो प्रार्थना मांते एते जगा दे करी जाणी, तिना रिया तरफा खे मां त्यान देणा ओर सेयो प्रार्थना मां सुणनिया। 16 कऊँकि एबे ये मन्दर मेरा ए ओर मैं ये पवित्र करी राखेया ए, ओर एथी हमेशा खे मेरी आराधना ऊँदी रणी, मां एसा जगा ते कदी बी आपणिया आखी ओर कान नि फेरने। 17 जे तूँ आपणे बाओ दाऊदो जेड़ा आपू खे मां सामणे जाणी की चलदा रये ओर मेरिया सारिया आज्ञा रे मुताबिक करेया करे ओर मेरी बिधिया ओर नियम मानदा रये, 18 तो मां तेरी राजगद्दी बणाई दी राखणी; जेड़ा कि मैं तेरे बाओ दाऊदो साथे वादा कित्तेया था कि तेरे कुलो रा कोई ना कोई इस्राएलो पाँदे राज करने वाल़ा सदा बणेया रा रणा। 19 यहोवा आगे बोलोआ, "पर जे तुसे लोक मांते फिरो ओर मेरी बिधिया ओर आज्ञा जो मैं तुसा खे देई राखिया मानणा छाडो ओर जाई की पराये देवतेया री आराधना करो ओर तिना गे माथा टेको, 20 तो मां सेयो आपणे देशो ते जो मैं तिना खे देई राखेया, जड़ी ते पटी देणे ओर ये मन्दर जो मैं आपणियां तँईं पवित्र करी राखेया, आपणी नजरा ते दूर करना ओर एड़ा करना कि देशो-देशो रे लोका बीचे तेतेरा उदारण बोली की बेज्जती ऊणी।" 21 ये मन्दर जो इतना बड़ा ए, तिसिये आऊणे-जाणे वाल़ेया हैरान ऊई कि पूछणे, "यहोवे एस देशो साथे ओर एस मन्दरो साथे एड़ी खतरनाक गल्ल कऊँ करी राखी?" 22 तेबे ओरी लोका बोलणा कि इस्राएली लोके आपणे पितरा रे परमेशर यहोवे खे जो तिना खे मिस्र देशो ते निकयाल़ी कि ल्याया था छाडी की पराये देवता माने ओर तिना गे माथा टेकी की तिना री आराधना कित्ती, इजी बजा ते ये सारी मुसीबत तिना पाँदे पड़ी।